Patiala News: ਮੀਟਰ ਰੀਡਰਾਂ ਨੇ ਫੁਹਾਰਾ ਚੌਕ ਜਾਮ ਕੀਤਾ

ਯੂਨੀਅਨ ਆਗੂਆਂ ਦਾ ਕਹਿਣਾ ਸੀ ਕਿ ਵਿਭਾਗ ਵੱਲੋਂ ਜਾਰੀ ਵਰਕ ਆਰਡਰ ਅਨੁਸਾਰ ਮੀਟਰ ਰੀਡਰਾਂ ਨੂੰ ਅਨਸਕਿੱਲਡ ਵਰਕਰ ਦੀ ਕੁੱਲ 14247 ਰੁਪਏ ਅਤੇ ਕਟੌਤੀ ਕਰਕੇ 10996.04 ਰੁਪਏ ਦੇਣ ਦਾ ਜ਼ਿਕਰ ਹੈ ਪਰੰਤੂ ਤਨਖਾਹ ਵਿੱਚ ਹੁੰਦੀ ਲੁੱਟ ਵਿਭਾਗ ਦੇ ਅਧਿਕਾਰੀਆਂ ਦੇ ਧਿਆਨ ਵਿੱਚ ਹੁੰਦੇ ਹੋਏ ਵੀ ਭਿਸ਼ਟਾਚਾਰ ਲਗਾਤਾਰ ਜਾਰੀ ਹੈ। ਪ੍ਰਧਾਨ ਅਖਵਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਵਰਕ ਆਰਡਰ ਵਿੱਚ ਬਿਲਿੰਗ ਕਰਨ ਲਈ ਮੋਬਾਈਲ ਅਤੇ ਨੈੱਟ ਪੈਕ ਦੇਣ ਦਾ ਜ਼ਿਕਰ ਵੀ ਹੈ ਪਰੰਤੂ ਅਜਿਹਾ ਨਹੀਂ ਹੋ ਰਿਹਾ। ਉਨ੍ਹਾਂ ਕਿਹਾ ਕਿ ਜਥੇਬੰਦੀ ਵੱਲੋਂ ਸਮਾਰਟ ਮੀਟਰ ਲਗਾਉਣ ਦਾ ਵਿਰੋਧ ਵੀ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਜਿੱਥੇ ਸਮਾਰਟ ਮੀਟਰਾਂ ਨਾਲ ਪੰਜਾਬ ਦੇ ਲੋਕਾਂ ’ਤੇ ਆਰਥਿਕ ਬੋਝ ਪਵੇਗਾ, ਉੱਥੇ ਹੀ ਪੰਜਾਬ ਦੇ ਹਜ਼ਾਰਾਂ ਨੌਜਵਾਨਾਂ ਦਾ ਰੁਜ਼ਗਾਰ ਵੀ ਖਤਮ ਹੋਵੇਗਾ।

ਯੂਨੀਅਨ ਦੇ ਆਗੂਆਂ ਦਾ ਕਹਿਣਾ ਸੀ ਕਿ ਪਾਵਰਕੌਮ ਨੇ ਡੀ ਸੀ ਰੇਟ ’ਤੇ ਤਨਖਾਹ ਦੇਣ ਅਤੇ 28 ਫਰਵਰੀ ਤੱਕ ਸਾਰੇ ਬਕਾਏ ਜਾਰੀ ਕਰਨ ਦਾ ਭਰੋਸਾ ਦਿੱਤਾ ਸੀ ਜਿਸ ਤਹਿਤ ਹੜਤਾਲ ਖਤਮ ਕਰ ਦਿੱਤੀ ਗਈ ਸੀ ਪਰ ਜਦੋਂ ਇਸ ਵਾਅਦੇ ਦੀ ਪੂਰਤੀ ਨਾ ਹੋਈ ਤਾਂ ਮੀਟਰ ਰੀਡਰਾਂ ਨੇ ਮੁੜ ਸੂਬਾਈ ਹੜਤਾਲ ਸ਼ੁਰੂ ਕਰ ਦਿੱਤੀ।