ਬਹਾਦਰ ਸਿੰਘ ਮਰਦਾਂਪੁਰ
ਰਾਜਪੁਰਾ, 23 ਸਤੰਬਰ
ਇੱਥੋਂ ਦੇ ਮਹਿੰਦਰਗੰਜ ਦੀ ਪੁਰਾਣੀ ਕਚਹਿਰੀ ਰੋਡ ਅਤੇ ਕੈਲੀਬਰ ਮਾਰਕੀਟ ਵਿੱਚ ਨਗਰ ਕੌਂਸਲ ਵੱਲੋਂ ਵਿਛਾਈ ਜਾ ਰਹੀ ਸੀਵਰੇਜ ਲਾਈਨ ਦਾ ਕਾਰਜ ਲਮਕਣ ਕਾਰਨ ਦੁਕਾਨਦਾਰਾਂ ਤੇ ਰਾਹਗੀਰਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੁਰਾਣੀ ਕਚਹਿਰੀ ਰੋਡ ਵਾਲੇ ਬਾਜ਼ਾਰ ਦੇ ਦੁਕਾਨਦਾਰਾਂ ਅਰਜਨ ਰੋਜ਼, ਰਮੇਸ਼ ਗੋਇਲ, ਸੰਦੀਪ ਜਿੰਦਲ ਤੇ ਸੁਰਿੰਦਰ ਗੁਪਤਾ ਨੇ ਦੱਸਿਆ ਕਿ ਇਸ ਸੜਕ ਨੂੰ ਨਗਰ ਕੌਂਸਲ ਦੇ ਠੇਕੇਦਾਰ ਵੱਲੋਂ ਸੀਵਰੇਜ ਪਾਈਪ ਲਾਈਨ ਪਾਉਣ ਲਈ ਲੰਘੇ ਮਹੀਨੇ ਪੁੱਟਿਆ ਗਿਆ ਸੀ ਪਰ ਸੀਵਰੇਜ ਲਾਈਨ ਪਾਉਣ ਦੇ ਬਾਵਜੂਦ ਸੜਕ ਦੀ ਮੁਰੰਮਤ ਨਾ ਕੀਤੇ ਜਾਣ ਕਾਰਨ ਥੋੜ੍ਹਾ ਜਿਹਾ ਮੀਂਹ ਪੈਣ ’ਤੇ ਸਾਰੇ ਬਾਜ਼ਾਰ ਵਿੱਚ ਚਿੱਕੜ ਭਰ ਜਾਂਦਾ ਹੈ। ਇਸ ਨਾਲ ਜਿਥੇ ਉਨ੍ਹਾਂ ਦੀ ਦੁਕਾਨਦਾਰੀ ਪ੍ਰਭਾਵਿਤ ਹੋ ਰਹੀ ਹੈ, ਉੱਥੇ ਰਾਹਗੀਰਾਂ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦੁਕਾਨਦਾਰਾਂ ਨੇ ਮੰਗ ਕੀਤੀ ਕਿ ਇਸ ਸੜਕ ਦੀ ਤੁਰੰਤ ਮੁਰੰਮਤ ਕੀਤੀ ਜਾਵੇ।
ਨਗਰ ਕੌਂਸਲ ਦੇ ਪ੍ਰਧਾਨ ਨਰਿੰਦਰ ਸਾਸ਼ਤਰੀ ਦਾ ਕਹਿਣਾ ਹੈ ਕਿ ਬਰਸਾਤ ਕਾਰਨ ਸੜਕ ਦੇ ਮੁਰੰਮਤ ਕਾਰਜ ਵਿੱਚ ਖੜੋਤ ਆਈ ਹੈ। ਮੌਸਮ ਸਾਫ਼ ਹੋਣ ’ਤੇ ਮੁਰੰਮਤ ਕਰਵਾ ਦਿੱਤੀ ਜਾਵੇਗੀ। ਕੈਲੀਬਰ ਮਾਰਕੀਟ ਵਿੱਚ ਆ ਰਹੀ ਪ੍ਰੇਸ਼ਾਨੀ ਬਾਰੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਸੀਵਰੇਜ ਪਾਈਪ ਪਾਉਣ ਸਬੰਧੀ ਪ੍ਰਵਾਨਗੀ ਨਾ ਲਏ ਜਾਣ ’ਤੇ ਜੰਗਲਾਤ ਵਿਭਾਗ ਵੱਲੋਂ ਸੀਵਰੇਜ ਲਾਈਨ ਪਾਉਣ ਦਾ ਕੰਮ ਰੋਕ ਦਿੱਤਾ ਗਿਆ ਹੈ।
ਸ਼ੰਭੂ ਫਲਾਈਓਵਰ ’ਤੇ ਮਿੱਟੀ ਦੇ ਢੇਰਾਂ ਕਾਰਨ ਲੋਕ ਪ੍ਰੇਸ਼ਾਨ
ਘਨੌਰ (ਪੱਤਰ ਪ੍ਰੇਰਕ): ਸ਼ੰਭੂ ਦੇ ਰੇਲਵੇ ਸਟੇਸ਼ਨ ਨੇੜੇ ਰੇਲਵੇ ਫਲਾਈਓਵਰ ’ਤੇ ਲੱਗੇ ਮਿੱਟੀ ਦੇ ਢੇਰ ਰਾਹਗੀਰਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣ ਗਏ ਹਨ। ਜਾਣਕਾਰੀ ਅਨੁਸਾਰ ਇਸ ਸੜਕ ’ਤੇ ਕਰੀਬ 800 ਮੀਟਰ ਲੰਮੇ ਫਲਾਈਓਵਰ ਦੀ ਉਸਾਰੀ ਕੀਤੀ ਗਈ ਹੈ। ਫਲਾਈਓਵਰ ਦੇ ਉੱਪਰ ਸੁਰੱਖਿਆ ਕੰਧਾਂ ਦੇ ਨੇੜੇ ਕੁਝ ਮਹੀਨੇ ਪਹਿਲਾਂ ਤੱਕ ਸਫਾਈ ਨਾ ਹੋਣ ਕਾਰਨ ਮਿੱਟੀ ਜਮ੍ਹਾਂ ਹੋ ਕੇ ਉਸ ਉੱਪਰ ਘਾਹ ਉੱਗ ਗਈ ਸੀ। ਇਹ ਮਾਮਲਾ ਵਿਭਾਗ ਦੇ ਅਧਿਕਾਰੀਆਂ ਦੇ ਧਿਆਨ ਵਿੱਚ ਲਿਆਉਣ ’ਤੇ ਕਰੀਬ ਦੋ ਮਹੀਨੇ ਪਹਿਲਾਂ ਵਿਭਾਗ ਦੇ ਕਰਮਚਾਰੀਆਂ ਵੱਲੋਂ ਫਲਾਈਓਵਰ ਦੀ ਸੁਰੱਖਿਆ ਕੰਧਾਂ ਨੇੜੇ ਪਈ ਮਿੱਟੀ ਨੂੰ ਇਕੱਠੀ ਕਰਕੇ ਢੇਰ ਲਗਾ ਦਿੱਤੇ ਗਏ ਪ੍ਰੰਤੂ ਦੋ ਮਹੀਨੇ ਬਾਅਦ ਵੀ ਮਿੱਟੀ ਦੇ ਢੇਰਾਂ ਦੀ ਚੁਕਾਈ ਨਾ ਹੋਈ। ਹੁਣ ਇਹ ਢੇਰ ਦੋਪਹੀਆ ਵਾਹਨ ਚਾਲਕਾਂ ਤੇ ਹੋਰ ਰਾਹਗੀਰਾਂ ਲਈ ਪ੍ਰੇਸ਼ਾਨੀ ਬਣ ਗਏ ਹਨ। ਲੋਕਾਂ ਦੀ ਮੰਗ ਹੈ ਕਿ ਫਲਾਈਓਵਰ ਤੋਂ ਮਿੱਟੀ ਦੇ ਢੇਰ ਤੁਰੰਤ ਚੁੱਕੇ ਜਾਣ। ਇਸ ਸਬੰਧੀ ਲੋਕ ਨਿਰਮਾਣ ਵਿਭਾਗ ਦੇ ਐੱਸ.ਡੀ.ਓ ਅਮਰਜੀਤ ਸਿੰਘ ਦਾ ਕਹਿਣਾ ਹੈ ਕਿ ਸਾਧਨਾਂ ਦਾ ਘਾਟ ਕਾਰਨ ਮਿੱਟੀ ਦੀ ਚੁਕਾਈ ਨਹੀਂ ਹੋ ਸਕੀ। ਹੁਣ ਉਨ੍ਹਾਂ ਮਿੱਟੀ ਚੁੱਕਣ ਦਾ ਪ੍ਰਬੰਧ ਕਰ ਲਿਆ ਹੈ। ਜਲਦੀ ਹੀ ਮਿੱਟੀ ਚੁੱਕ ਦਿੱਤੀ ਜਾਵੇਗੀ।