ਗ਼ੈਰ-ਸਮਾਜੀ ਅਨਸਰਾਂ ਦਾ ਅੱਡਾ ਬਣੀ ਪੁਰਾਣੀ ਕਚਹਿਰੀ ਦੀ ਇਮਾਰਤ

ਇੱਥੋਂ ਦੀ ਪੁਰਾਣੀ ਕਚਹਿਰੀ ਦੀ ਇਮਾਰਤ ਨਸ਼ਿਆਂ, ਦੇਹ ਵਪਾਰ ਤੇ ਹੋਰ ਗ਼ੈਰਸਮਾਜੀ ਗਤੀਵਿਧੀਆਂ ਦਾ ਮੁੱਖ ਕੇਂਦਰ ਬਣ ਚੁੱਕੀ ਹੈ। ਇਸ ਤੋਂ ਹੁਣ ਆਲੇ-ਦੁਆਲੇ ਰਹਿੰਦੇ ਦੁਕਾਨਦਾਰ ਤੇ ਆਮ ਲੋਕ ਪ੍ਰੇਸ਼ਾਨ ਹਨ। ਸ਼ਹਿਰ ਵਾਸੀਆਂ ਰਵੀ ਧੂਰੀ, ਅਸ਼ਵਨੀ ਕੁਮਾਰ, ਰਾਜਿੰਦਰ ਲੱਧੜ ਨੇ ਕਿਹਾ ਕਿ ਇਸ ਇਮਾਰਤ ਦੇ ਕੋਲ ਰੇਲਵੇ ਸਟੇਸ਼ਨ, ਲੜਕੀਆਂ ਦਾ ਸਰਕਾਰੀ ਸਕੂਲ ਪੈਦਾ ਹੈ ਜਿੱਥੋਂ ਯਾਤਰੀ ਤੇ ਕੁੜੀਆਂ , ਔਰਤਾਂ ਸਕੂਲ ਤੇ ਰੇਲਵੇ ਸਟੇਸ਼ਨ ’ਤੇ ਆਉਦੇ ਜਾਂਦੇ ਰਹਿੰਦੇ ਹਨ। ਇਸ ਇਮਾਰਤ ਕੋਲ ਸਵੇਰੇ ਸ਼ਾਮ ਗ਼ੈਰਸਮਾਜੀ ਅਨਸਰ ਹਮੇਸ਼ਾ ਖੜ੍ਹੇ ਰਹਿੰਦੇ ਹਨ ਜਿਸ ਕਾਰਨ ਉਨ੍ਹਾਂ ਨੂੰ ਕਾਫੀ ਮੁਸ਼ਕਲ ਆਉਦੀ ਹੈ। ਉਨ੍ਹਾਂ ਕਿਹਾ ਇਸ ਇਮਾਰਤ ਵਿੱਚ ਦੇਰ ਰਾਤ ਦੇਹ ਵਪਾਰ ਦਾ ਧੰਦਾ ਵੀ ਹੋਣ ਲੱਗਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਨਗਰ ਕੌਂਸਲ ਤੇ ਪੁਲੀਸ ਪ੍ਰਸ਼ਾਸਨ ਨੂੰ ਵੀ ਦੱਸਿਆ ਗਿਆ ਪਰ ਪਰਨਾਲਾ ਉਥੇ ਦਾ ਉਥ ਹੀ ਹੈ।

ਉਨ੍ਹਾਂ ਕਿਹਾ ਕਿ ਨਸ਼ੇੜੀ ਇਸ ਇਮਾਰਤ ਨੂੰ ਅਪਣਾ ਨਿੱਜੀ ਘਰ ਸਮਝ ਕੇ ਵਰਤੋਂ ਵੀ ਲਿਆਉਣ ਲੱਗੇ ਹਨ ਤੇ ਲੋਹੇ ਦੇ ਲੱਗੇ ਦਰਵਾਜ਼ਿਆਂ ਨੂੰ ਪੁੱਟ ਦਿੱਤਾ ਹੈ ਜਿੱਥੋਂ ਇਹ ਲੋਕ ਇਮਾਰਤ ਵਿੱਚ ਆਸਾਨੀ ਨਾਲ ਦਾਖਲ ਹੋਣ ਲੱਗੇ ਹਨ। ਉਨ੍ਹਾਂ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਇਮਾਰਤ ਦੀ ਚਾਰ ਦੀਵਾਰੀ ਸੀਮਿੰਟ ਨਾਲ ਕੀਤੀ ਜਾਵੇ ਤੇ ਪੁਲੀਸ ਇਸ ਸਬੰਧੀ ਸਖ਼ਤ ਕਦਮ ਚੁੱਕੇ।

ਡੀ ਐੱਸ ਪੀ ਗੁਰਪ੍ਰੀਤ ਸਿੰਘ ਨੇ ਕਿਹਾ ਕਿ ਉਹ ਹੇਠਲੇ ਅਧਿਕਾਰੀਆਂ ਨੂੰ ਫੋਰਨ ਇਸ ਸਬੰਧੀ ਜਾਣੂ ਕਰਵਾ ਕੇ ਸਖਤ ਕਦਮ ਚੁੱਕਣਗੇ। ਇਸ ਸਬੰਧੀ ਕਾਰਜ ਸਾਧਕ ਅਫਸਰ ਗੁਰਿੰਦਰ ਸਿੰਘ ਨੇ ਕਿਹਾ ਉਹ ਜਲਦੀ ਇਸ ਇਮਾਰਤ ਦੀ ਚਾਰਦੀਵਾਰੀ ਸੀਮਿੰਟ ਨਾਲ ਬਣਾਉਣਗੇ ਅਤੇ ਹੋਰ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।