ਖੇਤਰੀ ਪ੍ਰਤੀਨਿਧ
ਸਨੌਰ, 12 ਅਪਰੈਲ
ਸਨੌਰ ਤੋਂ ਕਾਂਗਰਸ ਦੇ ਹਲਕਾ ਇੰਚਾਰਜ ਅਤੇ ਸ਼ਾਹੀ ਘਰਾਣੇ ਦੇ ਭਰੋਸੇਯੋਗ ਹਰਿੰਦਰਪਾਲ ਸਿੰਘ ਹੈਰੀਮਾਨ ਨੇ ਸਨੌਰ ਮੰਡੀ ਵਿਚ ਕਣਕ ਦੀ ਰਸਮੀ ਤੌਰ ’ਤੇ ਖਰੀਦ ਸ਼ੁਰੂ ਕਰਵਾਈ। ਇਸ ਦੌਰਾਨ ਮਾਰਕੀਟ ਕਮੇਟੀ ਪਟਿਆਲਾ ਦੇ ਵਾਈਸ ਚੇਅਰਮੈਨ ਠੇਕੇਦਾਰ, ਗੁਰਮੁਖ ਸਿੰਘ ਜੌੜੇਮਾਜਰਾ, ਆੜ੍ਹਤੀ ਆਗੂ ਹਰਜਿੰਦਰ ਹਰੀਕਾ, ਮਾਰਕੀਟ ਕਮੇਟੀ ਦੇ ਨੁਮਾਇੰਦੇ ਵਿਜੈਪਾਲ ਸਿੰਘ, ਹੈਰੀਮਾਨ ਦੇ ਪੀਏ ਹਰਜਿੰਦਰ ਬਚੀ ਸਮੇਤ ਹੋਰ ਵੀ ਮੌਜੂਦ ਸਨ। ਹੈਰੀਮਾਨ ਦਾ ਕਹਿਣਾ ਸੀ ਕਿ ਸਮੁੱਚੇ ਸੀਜ਼ਨ ਦੌਰਾਨ ਕਿਸਾਨਾਂ ਅਤੇ ਹੋਰਾਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਕੋਈ ਮੁਸ਼ਕਲ ਪੇਸ਼ ਨਹੀਂ ਆਉਣ ਦਿੱਤੀ ਜਾਵੇਗੀ। ਇਸ ਮੌਕੇ ਹੈਰੀਮਾਨ ਨੇ ਕਿਹਾ ਕਿ ਚੰਦੂਮਾਜਰਾ ਖੇਮਾ ਫੋਟੋ ਸ਼ੈਸ਼ਨ ਦਾ ਸ਼ੌਕੀਨ ਹੈ। ਇਸ ਦੀਆਂ ਅਨੇਕਾਂ ਉਦਾਹਰਨਾਂ ਹਨ। ਉਨ੍ਹਾਂ ਕਿਹਾ ਕਿ ਆੜ੍ਹਤੀਆਂ ਨੇ ਹੜਤਾਲ ਖੋਲ੍ਹਣ ਦੇ ਬਾਵਜੂਦ 11 ਤੋਂ ਹੀ ਕੰਮ ’ਤੇ ਪਰਤਣ ਦਾ ਫ਼ੈਸਲਾ ਲਿਆ ਸੀ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੂੰ ਕਿਸਾਨਾਂ ਦੀ ਵਧੇਰੇ ਫਿਕਰ ਹੈ ਪਰ ਚੰਦੂਮਾਜਰਾ ਖੇਮਾ ਕਿਰਸਾਨੀ ਨਾਲ਼ ਜੁੜੇ ਮਸਲੇ ’ਤੇ ਵੀ ਰਾਜਨੀਤੀ ਕਰ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਦਸ ਅਪਰੈਲ ਨੂੰ ਸਨੌਰ ਮੰਡੀ ਵਿਚ ਕਿਸੇ ਵੀ ਢੇਰੀ ਦੀ ਬੋਲੀ ਨਾ ਲੱਗਣ ਦੇ ਬਾਵਜੂਦ ਚੰਦੂਮਾਜਰਾ ਖੇਮੇ ਨੇ ਕੁਝ ਢੇਰੀਆਂ ਦੀ ਬੋਲੀ ਲਵਾਏ ਹੋਣ ਦੇ ਦਾਅਵੇ ਵਾਲ਼ਾ ਪ੍ਰੈਸ ਨੋਟ ਜਾਰੀ ਕਰਕੇ ਨਾ ਸਿਰਫ਼ ਕਿਸਾਨਾਂ, ਬਲਕਿ ਮੀਡੀਆ ਨੂੰ ਵੀ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।