Fee Hike Protest: ਵੀ ਸੀ ਦਫ਼ਤਰ ਅੱਗੇ ਪਾੜ੍ਹਿਆਂ ਦਾ ਧਰਨਾ ਜਾਰੀ

ਪੰਜਾਬੀ ਯੂਨੀਵਰਸਿਟੀ ਵਿੱਚ ਹੋਸਟਲ ਅਤੇ ਕੋਰਸ ਫੀਸਾਂ ਵਿਚਲੇ ਵਾਧੇ ਦੀ ਮੁਕੰਮਲੀ ਵਾਪਸੀ ’ਤੇ ਅੜੀਆਂ ਖੱਬੇ ਪੱਖੀ ਵਿਦਿਆਰਥੀ ਜਥੇਬੰਦੀਆਂ ਵੱਲੋਂ ‘ਫੀਸ ਵਾਧੇ ਵਿਰੋਧੀ ਫਰੰਟ’ ਦੀ ਅਗਵਾਈ ਹੇਠ ਵੀ ਸੀ ਦਫਤਰ ਅੱਗੇ ਪੱਕਾ ਮੋਰਚਾ ਅੱਜ14ਵੇਂ ਦਿਨ ਵੀ ਜਾਰੀ ਰੱਖਿਆ ਗਿਆ। ਇਸ ਦੌਰਾਨ ਅੱਜ ਦੇਰ ਸ਼ਾਮ ਕੈਂਪਸ ’ਚ ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ਵੱਲੋਂ ਸੱਭਿਆਚਰਕ ਪ੍ਰੋਗਰਾਮ ਦੇ ਬੈਨਰ ਹੇਠ ਬੋਲੀਆਂ ਤੇ ਇਨਕਲਾਬੀ ਕਵਿਤਾਵਾਂ ਪੇਸ਼ ਕੀਤੀਆਂ ਗਈਆਂ। ਬੁਲਾਰਿਆਂ ਨੇ ਇਹ ਵੀ ਕਿਹਾ ਕਿ ਯੂਨੀਵਰਸਿਟੀ ਦਾ ਵਿੱਤੀ ਸੰਕਟ ਗਰੀਬ ਵਿਦਿਆਰਥੀਆਂ ’ਤੇ ਬੋਝ ਪਾ ਕੇ ਨਾ ਉਤਾਰਿਆ ਜਾਵੇ ਸਗੋਂ ਇਸ ਲਈ ਸਰਕਾਰ ਨੂੰ ਹਲੂਣਾ ਦੇਣ ਦੀ ਲੋੜ ਹੈ। ਉਧਰ, 26 ਅਗਸਤ ਨੂੰ ‘ਵੀ.ਸੀ ਲੱਭੋ’ ਮਾਰਚ ਕਰਨ ਦੇ ਉਲੀਕੇ ਗਏ ਪ੍ਰੋਗਰਾਮ ਤਹਿਤ ਇਸ ਫਰੰਟ ’ਚ ਸਾਮਲ ਆਗੂਆਂ ਨੇ ਤਿਆਰੀ ਮੀਟਿੰਗ ਕਰਕੇ ਇਸ ਨੂੰ ਅੰਤਿਮ ਛੋਹਾਂ ਵੀ ਦਿੱਤੀਆਂ। ਇਸ ਦੌਰਾਨ ਪੀ ਐੱਸ ਯੂ ਤੋਂ ਗੁਰਦਾਸ ਸਿੰਘ, ਜਸਪ੍ਰੀਤ ਸਿੰਘ, ਪੀ ਐੱਸ ਯੂ (ਲਲਕਾਰ) ਤੋਂ ਹਰਪ੍ਰੀਤ ਸਿੰਘ ਤੇ ਦਿਲਪ੍ਰੀਤ ਕੌਰ ਅਤੇ ਹਰਪ੍ਰੀਤ ਸਿੰਘ ਆਦਿ ਹਾਜ਼ਰ ਸਨ। ਗੁਰਦਾਸ ਨੇ ਦੱਸਿਆ ਕਿ ਇਸ ਦੌਰਾਨ ਹੀ ਪ੍ਰਸ਼ਾਸਨ ਖਿਲਾਫ਼ ਅਰਥੀ ਫੂਕ ਮੁਜ਼ਾਹਰਾ ਵੀ ਕੀਤਾ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਵਾਧਾ ਵਿੱਤੀ ਸੰਕਟ ਕਾਰਨ ਕਰਨਾ ਪਿਆ ਸੀ ਤੇ ਉਹ ਵੀ ਪੰਜ ਸਾਲਾਂ ਬਾਅਦ ਤੇ ਫੇਰ ਵੀ ਦੋ ਹੋਰ ਪ੍ਰਮੁੱਖ ਰਾਜ ਯੂਨੀਵਰਸਿਟੀਆਂ ਨਾਲੋਂ ਵੀ ਫੀਸ ਘੱਟ ਹੀ ਵਧਾਈ ਗਈ ਹੈ। ਇਸ ਨੂੰ ਵੀ ਹੁਣ ਘਟਾ ਕੇ 7.5 ਫੀਸਦੀ ’ਤੇ ਲੈ ਆਂਦਾ ਗਿਆ ਹੈ।