ਗੁਰਨਾਮ ਸਿੰਘ ਚੌਹਾਨ
ਪਾਤੜਾਂ, 28 ਨਵੰਬਰ
ਕਣਕ ਦੀ ਬਿਜਾਈ ਵੇਲੇ ਲੋੜੀਂਦੀ ਡੀਏਪੀ ਦੀ ਕਿੱਲਤ ਕਾਰਨ ਕਿਸਾਨਾਂ ਨੂੰ ਯੂਰੀਏ ਲਈ ਖਾਦ ਸਟੋਰਾਂ ਦੇ ਗੇੜੇ ਲਾਉਣੇ ਪੈ ਰਹੇ ਹਨ। ਕਿਸਾਨਾਂ ਨੂੰ ਦਰਪੇਸ਼ ਮੁਸ਼ਕਲਾਂ ਦਾ ਹੱਲ ਕੱਢਣ ਲਈ ਕਿਰਤੀ ਕਿਸਾਨ ਯੂਨੀਅਨ ਨੇ ਪਹਿਲਕਦਮੀ ਕਰਕੇ ਗੁਦਾਮਾਂ ਵਿੱਚ ਸਟੋਰ ਕੀਤਾ ਯੂਰੀਆ ਕਿਸਾਨਾਂ ਨੂੰ ਵਾਜਬ ਰੇਟ ’ਤੇ ਮੁਹੱਈਆ ਕਰਵਾਇਆ ਹੈ।
ਕਿਰਤੀ ਕਿਸਾਨ ਯੂਨੀਅਨ ਦੇ ਜ਼ਿਲ੍ਹਾ ਸਕੱਤਰ ਦਲਜਿੰਦਰ ਸਿੰਘ ਹਰਿਅਊ ਅਤੇ ਇਕਾਈ ਪਾਤੜਾਂ ਦੇ ਪ੍ਰਧਾਨ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਪਾਤੜਾਂ ਵਿੱਚ ਬਹੁਤ ਸਾਰੇ ਗੁਦਾਮਾਂ ਵਿੱਚ ਯੂਰੀਆ ਖਾਦ ਹੋਣ ਦੇ ਬਾਵਜੂਦ ਕਿਸਾਨਾਂ ਨੂੰ ਖਾਦ ਨਹੀਂ ਦਿੱਤੀ ਜਾ ਰਹੀ। ਕਿਸਾਨਾਂ ਦੀ ਲੁੱਟ ਕਰਨ ਲਈ ਉਨ੍ਹਾਂ ਨੂੰ ਖਾਦ ਦੇ ਨਾਲ ਦਵਾਈ ਖਰੀਦਣ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਕਣਕ ਦੀ ਬਿਜਾਈ ਸਮੇਂ ਡੀ.ਏ.ਪੀ. ਖਾਦ ਕਿਸਾਨਾਂ ਨੂੰ ਮਹਿੰਗੇ ਭਾਅ ਖਾਦ ਵੇਚ ਕੇ ਉਨ੍ਹਾਂ ਦੀ ਵੱਡੀ ਆਰਥਿਕ ਲੁੱਟ ਕੀਤੀ ਗਈ ਸੀ। ਉਸ ਵੇਲੇ ਕਿਸਾਨ ਜਥੇਬੰਦੀਆਂ ਵੱਲੋਂ ਸਹਿਕਾਰੀ ਸਭਾਵਾਂ ਵਿੱਚ ਉੱਚਿਤ ਮਾਤਰਾ ਵਿੱਚ ਖਾਦ ਨਾ ਹੋਣ, ਨਕਲੀ ਡੀਏਪੀ ਅਤੇ ਖਾਦ ਦੀ ਜਮ੍ਹਾਂਖੋਰੀ ਸਬੰਧੀ ਮਾਮਲੇ ਪਾਤੜਾਂ ਪ੍ਰਸ਼ਾਸਨ ਦੇ ਧਿਆਨ ਵਿੱਚ ਲਿਆਉਣ ਦੇ ਬਾਵਜੂਦ ਕਿਸਾਨਾਂ ਦੇ ਪੱਲੇ ਨਿਰਾਸ਼ਾ ਹੀ ਪਈ। ਨਤੀਜੇ ਵਜੋਂ ਇਸ ਵਾਰ ਕਿਰਤੀ ਕਿਸਾਨ ਯੂਨੀਅਨ ਨੂੰ ਪ੍ਰਸ਼ਾਸਨ ਦੀ ਕਿਸਾਨਾਂ ਪ੍ਰਤੀ ਬਣਦੀ ਜ਼ਿੰਮੇਵਾਰੀ ਨੂੰ ਨਿਭਾਉਣ ਲਈ ਮਜਬੂਰ ਹੋਣਾ ਪਿਆ। ਯੂਰੀਏ ਦੀ ਘਾਟ ਦਾ ਮਸਲਾ ਜਥੇਬੰਦੀ ਦੀ ਬਲਾਕ ਪਾਤੜਾਂ ਕਮੇਟੀ ਦੇ ਧਿਆਨ ਵਿੱਚ ਆਇਆ ਤਾਂ ਉਨ੍ਹਾਂ ਨੇ ਮੌਕੇ ’ਤੇ ਡੀਲਰਾਂ ਨਾਲ ਗੱਲ ਕਰਕੇ ਬੰਦ ਪਏ ਗੁਦਾਮ
ਖੁਲ੍ਹਵਾਏ ਅਤੇ ਕਿਸਾਨਾਂ ਨੂੰ ਕੰਟਰੋਲ ਰੇਟ ’ਤੇ ਯੂਰੀਆ ਖਾਦ ਜਾਰੀ ਕਰਵਾਈ। ਕਿਸਾਨਾਂ ਨੂੰ ਭਵਿੱਖ ਵਿੱਚ ਕਿਸੇ ਵੀ ਦਰਪੇਸ਼ ਸਮੱਸਿਆ ਦੇ ਹੱਲ ਲਈ ਕਿਰਤੀ ਕਿਸਾਨ ਯੂਨੀਅਨ ਮੋਹਰੀ ਸਫਾਂ ਵਿੱਚ ਸੰਘਰਸ਼ ਅਤੇ ਪਹਿਲਕਦਮੀ ਜਾਰੀ ਰੱਖੇਗੀ।
ਕਿਸਾਨ ਆਗੂ ਲਾਭ ਸਿੰਘ ਅਤੇ ਅਮਰਿੰਦਰ ਵਿਰਕ ਨੇ ਕਿਹਾ ਕਿ ਪੰਜਾਬ ਸਰਕਾਰ ਕਿਸਾਨਾਂ ਨੂੰ ਵਾਜਬ ਮੁੱਲ ’ਤੇ ਪੂਰੀ ਮਾਤਰਾ ਵਿੱਚ ਖਾਦ ਉੱਪਲਬਧ ਕਰਵਾਉਣਾ ਯਕੀਨੀ ਬਣਾਏ। ਇਸ ਮੌਕੇ ਮਨਵੀਰ ਸਿੰਘ, ਮਨਪ੍ਰੀਤ ਹਰਿਅਊ, ਰਣਜੀਤ ਬਕਰਾਹਾ, ਲਾਭ ਸਿੰਘ ਪਾਤੜਾਂ, ਬੂਟਾ ਹਰਿਅਊ, ਸੁਖਵਿੰਦਰ ਪਾਤੜਾਂ, ਹਰਦੀਪ ਖਾਂਗ ਤੇ ਪ੍ਰਵੀਨ ਖਾਂਗ ਹਾਜ਼ਰ ਰਹੇ।