ਮਿੱਟੀ ਅਤੇ ਫੰਡਾਂ ’ਚ ਘਪਲੇ ਤਹਿਤ ਪਿੰਡ ਲੰਗ ਦੀ ਸਮੁੱਚੀ ਪੰਚਾਇਤ ਮੁਅੱਤਲ

ਮੁਅੱਤਲੀ ਦੇ ਇਹ ਆਦੇਸ਼ ਪਟਿਆਲਾ ਦੇ ਜ਼ਿਲ੍ਹਾ ਵਿਕਾਸ ਅਤੇ ਪੰਚਾਇਤ ਅਫ਼ਸਰ ਮਹਿੰਦਰਜੀਤ ਸਿੰਘ ਨੇ ਜਾਰੀ ਕੀਤੇ ਹਨ, ਜਿਨ੍ਹਾਂ ਨੇ ਖ਼ੁਦ ਇਸ ਗੱਲ ਦੀ ਪੁਸ਼ਟੀ ਵੀ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਕੁਝ ਪਿੰਡ ਵਾਸੀਆਂ ਨੇ ਪੰਚਾਇਤ ’ਤੇ ਪਿੰਡ ਦੇ ਛੱਪੜਾਂ ਤੋਂ ਬਿਨਾਂ ਮਨਜ਼ੂਰੀ ਤੋਂ 2500 ਦੇ ਕਰੀਬ ਟਰਾਲੀਆਂ ਮਿੱਟੀ ਪੁੱਟਣ ਤੇ ਵੇਚਣ, ਪੰਚਾਇਤੀ ਫੰਡ ਵਿੱਚੋਂ ਚੋਣਵੇਂ ਵਿਅਕਤੀਆਂ ਨੂੰ ਸਿੰਜਾਈ ਲਈ 18 ਇੰਚੀ 50 ਪਾਈਪਾਂ ਵੰਡਣ, ਸਫ਼ਾਈ ਦੇ ਨਾਮ ’ਤੇ ਇੱਕ ਲੱਖ ਰੁਪਏ ਦੀ ਦੁਰਵਰਤੋਂ ਆਦਿ ਤਰ੍ਹਾਂ ਗਬਨ ਦੇ ਦੋਸ਼ ਲਾਏ ਗਏ ਸਨ।

ਇਸ ਤਰ੍ਹਾਂ ਮੁੱਢਲੀ ਜਾਂਚ ਉਪਰੰਤ ਪਿੰਡ ਦੀ ਮਹਿਲਾ ਸਰਪੰਚ ਜਸਵਿੰਦਰ ਕੌਰ ਸਮੇਤ ਪੰਚਾਂ ਨੂੰ ਵੀ ਮੁਅੱਤਲ ਕਰਦਿਆਂ ਡੀ ਡੀ ਪੀ ਓ ਨੇ ਪੰਚਾਇਤ ਦੇ ਸਾਰੇ ਖਾਤੇ ਫਰੀਜ਼ ਕਰਦਿਆਂ ਹੋਰ ਲੈਣ-ਦੇਣ ’ਤੇ ਰੋਕ ਲਾ ਦਿੱਤੀ ਗਈ ਹੈ। ਦੂਜੇ ਪਾਸੇ, ਸਰਪੰਚ ਜਸਵਿੰਦਰ ਕੌਰ ਅਤੇ ਉਨ੍ਹਾਂ ਦੇ ਪੁੱਤਰ ਗੁਰਦੇਵ ਸਿੰਘ ਨੇ ਇਸ ਕਾਰਵਾਈ ਨੂੰ ਰਾਜਸੀ ਹਿੱਤਾਂ ਤੋਂ ਪ੍ਰੇਰਿਤ ਕਰਾਰ ਦਿੱਤਾ ਹੈ।