Khanewal dispensary ਚਲਾਉਣ ਲਈ ਸੰਘਰਸ਼ ਦਾ ਐਲਾਨ

ਨੌਜਵਾਨ ਭਾਰਤ ਸਭਾ ਨੇ ਪਿੰਡ ਦੇ ਨੌਜਵਾਨਾਂ ਨਾਲ ਮੀਟਿੰਗ ਕਰਕੇ ਬੰਦ ਪਈ ਡਿਸਪੈਂਸਰੀ ਦੇ ਬਾਹਰ ਮੰਗਾਂ ਸਬੰਧੀ ਬੈਨਰ ਲਾਇਆ ਹੈ। ਖਾਨੇਵਾਲ ਕਮੇਟੀ ਦੇ ਪ੍ਰਧਾਨ ਧਰਮਪਾਲ ਖਾਨੇਵਾਲ, ਰਵੀ ਖਾਨੇਵਾਲ ਨੇ ਪਿੰਡ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਜਦੋਂ ਤੱਕ ਸਰਕਾਰ ਡਿਸਪੈਂਸਰੀ ਮੁੜ ਚਾਲੂ ਨਹੀਂ ਹੁੰਦੀ, ਉਦੋਂ ਤੱਕ ਬੈਨਰ ਨਾ ਉਤਾਰਿਆ ਜਾਵੇ। ਨੌਜਵਾਨ ਆਗੂ ਖੁਸ਼ਦਿਲ ਖਾਨੇਵਾਲ ਤੇ ਸੁਖਪਾਲ ਨੇ ਕਿਹਾ ਕਿ 10 ਸਤੰਬਰ ਨੂੰ ਖਾਨੇਵਾਲ ਅੱਡੇ ਬੱਸਾਂ ਨਾ ਰੁਕਣ ਅਤੇ ਪਿੰਡ ਤੱਕ ਦੀ ਟਿਕਟ ਕੱਟਣ ਨੂੰ ਲੈ ਕੇ ਐੱਸ ਡੀ ਐੱਮ ਪਾਤੜਾਂ ਕਾਲਾ ਰਾਮ ਕਾਂਸਲ ਨੂੰ ਮੰਗ ਪੱਤਰ ਦਿੱਤਾ ਸੀ, ਪਰ ਹੁਣ ਤੱਕ ਪ੍ਰਸ਼ਾਸਨ ਵੱਲੋਂ ਕੋਈ ਠੋਸ ਕਦਮ ਨਹੀਂ ਚੁੱਕਿਆ ਗਿਆ।

ਨੌਜਵਾਨ ਭਾਰਤ ਸਭਾ ਦੇ ਸੂਬਾ ਕਮੇਟੀ ਮੈਂਬਰ ਦਵਿੰਦਰ ਛਬੀਲਪੁਰ ਨੇ ਕਿਹਾ ਕਿ ਜੇ ਇੱਕ ਹਫ਼ਤੇ ’ਚ ਪਾਤੜਾਂ ਪ੍ਰਸ਼ਾਸਨ ਵੱਲੋਂ ਮੰਗਾਂ ਸਬੰਧੀ ਕੋਈ ਠੋਸ ਕਾਰਵਾਈ ਨਾ ਕੀਤੀ ਗਈ ਤਾਂ ਸਭਾ ਵੱਲੋਂ ਪਾਤੜਾਂ-ਮੂਨਕ ਰੋਡ ਜਾਮ ਕਰਕੇ ਸੰਘਰਸ਼ ਕੀਤਾ ਜਾਵੇਗਾ।

ਐਸ ਡੀ ਐਮ ਪਾਤੜਾਂ ਕਾਲਾ ਰਾਮ ਕਾਂਸਲ ਨੇ ਦੱਸਿਆ ਹੈ ਕਿ ਨੌਜਵਾਨ ਸਭਾ ਦੀਆਂ ਤਿੰਨੇ ਮੰਗਾਂ ਸਬੰਧੀ ਸੰਬੰਧਤ ਮਹਿਕਮਿਆਂ ਨੂੰ ਲਿਖ ਕੇ ਭੇਜ ਦਿੱਤਾ ਗਿਆ ਹੈ। ਕਾਰਵਾਈ ਨਾ ਹੋਣ ਸਬੰਧੀ ਮੁੜ ਤੋਂ ਸਬੰਧਤ ਅਧਿਕਾਰੀਆਂ ਨਾਲ ਸੰਪਰਕ ਲਿਆ ਜਾਵੇਗਾ। ਇਸ ਮੌਕੇ ਨੌਜਵਾਨ ਆਗੂ ਗੁਰਦੀਪ ਅਜਾਦ, ਜਸਪਾਲ, ਸੁਖਚੈਨ, ਰਾਜੂ, ਰਾਜਪਾਲ ਅਤੇ ਹੋਰ ਨੌਜਵਾਨ ਸ਼ਾਮਲ ਹੋਏ।