Congress Protest: ਕਾਂਗਰਸੀਆਂ ਨੇ ਧਰਨਾ ਲਾ ਕੇ ਸੜਕ ਜਾਮ ਕੀਤੀ

ਬੱਸ ਡਰਾਈਵਰ ਨੇ ਤੇਲ ਮੁੱਕਣ ਦਾ ਬਹਾਨਾ ਲਾ ਕੇ ਸੰਘਰਸ਼ਕਾਰੀ ਕਾਂਗਰਸੀ ਆਗੂਆਂ ਨੂੰ ਭਾਦਸੋਂ ਰੋਡ ਦੀ ਸੁੰਨੀ ਥਾਂ ’ਤੇ ਉਤਾਰਿਆ ਤਾਂ ਕਾਂਗਰਸੀ ਆਗੂਆਂ ਨੇ ਉੱਥੇ ਹੀ ਬੱਸ ਦੇ ਅੱਗੇ ਧਰਨਾ ਲਾ ਕੇ ਸੜਕ ਜਾਮ ਕਰ ਦਿੱਤੀ। ਇਸ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਈ। ਪਟਿਆਲਾ ਦੇ ਮਾਲ ਰੋਡ ’ਤੇ ਕਾਂਗਰਸ ਦੇ ਲੱਗੇ ਧਰਨੇ ਤੋਂ ਬਾਅਦ ਮਾਰਚ ਕਰਦੇ ਕਾਂਗਰਸੀ ਆਗੂਆਂ ’ਤੇ ਪਾਣੀ ਦੀਆਂ ਬੁਛਾੜਾਂ ਮਾਰ ਕੇ ਪੁਲੀਸ ਨੇ ਆਗੂਆਂ ਤੇ ਵਰਕਰਾਂ ਨੂੰ ਬੱਸਾਂ ਵਿਚ ਭਰ ਲਿਆ, ਤਿੰਨ ਬੱਸਾਂ ਵਿਚ ਭਰੇ ਕਾਂਗਰਸੀਆਂ ਨੂੰ ਬੱਸਾਂ ਵਿਚ ਬਿਠਾ ਕੇ ਪਹਿਲਾਂ ਸੰਗਰੂਰ ਰੋਡ ’ਤੇ ਲੈ ਜਾਇਆ ਗਿਆ। ਇਸ ਬਾਰੇ ਜ਼ਿਲ੍ਹਾ ਦਿਹਾਤੀ ਪ੍ਰਧਾਨ ਗੁਰਸ਼ਰਨ ਕੌਰ ਰੰਧਾਵਾ ਨੇ ਕਿਹਾ ਕਿ ਸੰਗਰੂਰ ਰੋਡ ਤੋਂ ਬਾਅਦ ਸਮਾਣਾ ਰੋਡ ਤੇ ਫੇਰ ਉਨ੍ਹਾਂ ਨੂੰ ਅਫ਼ਸਰ ਕਲੋਨੀ ਦੀ ਪੁਲੀਸ ਚੌਕੀ ਵਿਚ ਛੱਡਿਆ ਗਿਆ, ਉਸ ਤੋਂ ਬਾਅਦ ਉੱਥੋਂ ਵੀ ਬੱਸਾਂ ਵਿੱਚ ਭਰਿਆ ਗਿਆ ਤੇ ਤਿੰਨੇ ਬੱਸਾਂ ਵੱਖ-ਵੱਖ ਰੂਟਾਂ ’ਤੇ ਲੈ ਗਏ। ਭਾਦਸੋਂ ਰੋਡ ’ਤੇ ਥਾਣਾ ਬਖਸ਼ੀਵਾਲਾ ਤੋਂ ਅੱਗੇ ਸਿੰਭੜੋ ਪਿੰਡ ਕੋਲ ਡਰਾਈਵਰ ਨੇ ਕਿਹਾ ਕਿ ਬੱਸ ਵਿੱਚੋਂ ਤੇਲ ਮੁੱਕ ਗਿਆ ਹੈ। ਇਸ ਲਈ ਬੱਸ ਅੱਗੇ ਨਹੀਂ ਜਾ ਸਕਦੀ। ਇਸ ਦੇ ਰੋਸ ਵਜੋਂ ਕਾਂਗਰਸੀ ਵਰਕਰਾਂ ਨੇ ਬੱਸ ਅੱਗੇ ਧਰਨਾ ਲਾ ਕੇ ਸੜਕ ਜਾਮ ਕਰ ਦਿੱਤੀ। ਉਸ ਤੋਂ ਬਾਅਦ ਉਨ੍ਹਾਂ ਨੂੰ ਪਟਿਆਲਾ ਛੱਡਿਆ ਗਿਆ। ਇਸ ਦੌਰਾਨ ਕਾਂਗਰਸੀ ਵਰਕਰਾਂ ਅਤੇ ਆਗੂਆਂ ਨੇ ਪੰਜਾਬ ਸਰਕਾਰ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ।