ਸਰਬਜੀਤ ਸਿੰਘ ਭੰਗੂ
ਸਨੌਰ, 4 ਅਗਸਤ
ਕੁਝ ਮਹੀਨੇ ਪਹਿਲਾਂ ਸ਼ੰਭੂ ਕੋਲ਼ੋਂ ਫੜੀ ਨਕਲੀ ਸ਼ਰਾਬ ਦੀ ਫੈਕਟਰੀ ਦੇ ਮਾਮਲੇ ਵਿੱਚ ਆਮ ਆਦਮੀ ਪਾਰਟੀ ਵਰਕਰਾਂ ਅਤੇ ਆਗੂਆਂ ਵੱਲੋਂ ਅੱਜ ਘਨੌਰ ਦੇ ਵਿਧਾਇਕ ਮਦਨ ਲਾਲ ਜਲਾਲਪੁਰ ਦੇ ਹਲਕਾ ਸਨੌਰ ਦੇ ਪਿੰਡ ਜਲਾਲਪੁਰ ਸਥਿਤ ਰਿਹਾਇਸ਼ ਵੱਲ ਮਾਰਚ ਕੀਤਾ। ਕਸਬਾ ਬਹਾਦਰਗੜ੍ਹ ਵਿਖੇ ਇਕੱਠੇ ਹੋਏ ਵਰਕਰਾਂ ਨੇ ਕੋਠੀ ਦੇ ਘਿਰਾਓ ਲਈ ਜਿਉਂ ਹੀ ਜਲਾਲਪੁਰ ਪਿੰਡ ਵੱਲ ਚਾਲੇ ਪਾਏ ਤਾਂ ਪੁਲੀਸ ਨੇ ਬਹਾਦਰਗੜ੍ਹ ਸਥਿਤ ਕਮਾਂਡੋ ਕੰਪਲੈਕਸ ਦੇ ਕੋਲ਼ੋਂ ਕਈ ਵਰਕਰਾਂ ਨੂੰ ਹਿਰਾਸਤ ਵਿਚ ਲੈ ਲਿਆ। ਹਿਰਾਸਤ ਵਿਚ ਲਏ ਵਰਕਰਾਂ ਨੂੰ ਪੁਲੀਸ ਨੇ ਸ਼ਾਮੀ ਚਾਰ ਵਜੇ ਰਿਹਾਅ ਕਰ ਦਿੱਤਾ। ਇਨ੍ਹਾਂ ਵਿਚ ਹਰਚੰਦ ਸਿੰਘ ਬਰਸਟ, ਕੁੰਦਨ ਗੋਗੀਆ ਅਤੇ ਜਰਨੈਲ ਸਿੰਘ ਮੰਨੂੰ ਸ਼ਾਮਲ ਸਨ। ਵਰਕਰਾਂ ਦਾ ਕਹਿਣਾ ਸੀ ਕਿ ਇਹ ਕਥਿਤ ’ਤੇ ਵਿਧਾਇਕ ਦੀ ਸ਼ਹਿ ਨਾਲ਼ ਚੱਲ ਰਿਹਾ ਸੀ। ਵਿਧਾਇਕ ਦੇ ਅਸਤੀਫੇ ਦੀ ਮੰਗ ਸਮੇਤ ਉਨ੍ਹਾਂ ਨੇ ਇਸ ਮਾਮਲੇ ਦੀ ਸੀਬੀਆਈ ਜਾਂ ਸੁਪਰੀਮ ਕੋਰਟ ਦੇ ਜੱਜ ਤੋਂ ਜਾਂਚ ਕਰਵਾਏ ਜਾਣ ਦੀ ਮੰਗ ਵੀ ਕੀਤੀ।