ਗੁਰਨਾਮ ਸਿੰਘ ਅਕੀਦਾ
ਪਟਿਆਲਾ, 7 ਮਈ
ਆਮ ਆਦਮੀ ਪਾਰਟੀ ਦੀ ਲੀਡਰਸ਼ਿਪ ਨੇ ਅੱਜ ਜਿੱਥੇ ਜ਼ਿਲ੍ਹਾ ਪ੍ਰਸ਼ਾਸਨ ਤੇ ਰਾਜਿੰਦਰਾ ਹਸਪਤਾਲ ਦੇ ਪ੍ਰਸ਼ਾਸਨ ਦਾ ਕਰੋਨਾ ਵਾਰਡ ਵਿਚ ਲਗਾਏ ਕੈਮਰਿਆਂ ਲਈ ਧੰਨਵਾਦ ਕੀਤਾ ਹੈ ਉੱਥੇ ਹੀ ਉਨ੍ਹਾਂ ਕਰੋਨਾ ਵਾਰਡ ਵਿਚ ਔਰਤ ਮਰੀਜ਼ਾਂ ਨਾਲ ‘ਵਾਰਡ ਅਟੈਂਡੈਂਟ’ ਵੱਲੋਂ ਕੀਤੇ ਜਾ ਰਹੀ ਗੈਰ ਮਨੁੱਖੀ ਕੰਮਾਂ ਬਾਰੇ ਵੀ ਚੇਤੇ ਕਰਾਇਆ ਹੈ। ਜ਼ਿਕਰਯੋਗ ਹੈ ਕਿ ਕੱਲ੍ਹ ਹੀ ਆਮ ਆਦਮੀ ਪਾਰਟੀ ਨੇ ਕਰੋਨਾ ਵਾਰਡ ਦੀ ਇੰਚਾਰਜ ਆਈਏਐੱਸ ਸੁਰਭੀ ਨੂੰ ਮੰਗ ਪੱਤਰ ਦੇ ਕੇ ਮੰਗ ਕੀਤੀ ਸੀ ਕਿ ਕਰੋਨਾ ਵਾਰਡਾਂ ਵਿੱਚ ਸੀਸੀਟੀਵੀ ਕੈਮਰੇ ਲਗਾ ਕੇ ਐੱਲਈਡੀ ਬਾਹਰ ਹਾਲ ਵਿਚ ਲਾਈਆਂ ਜਾਣ ਤਾਂ ਕਿ ਮਰੀਜ਼ਾਂ ਦੇ ਵਾਰਸ ਆਪਣੇ ਮਰੀਜ਼ਾਂ ਦਾ ਹਾਲ ਦੇਖ ਸਕਣ। ਇਸੇ ਤਹਿਤ ਕੁੰਦਨ ਗੋਗੀਆ, ਸ਼ਹਿਰੀ ਪ੍ਰਧਾਨ ਤੇਜਿੰਦਰ ਮਹਿਤਾ, ਪ੍ਰੋ. ਸੁਮੇਰ ਆਦਿ ਹੋਰ ਕਈ ਨੇਤਾਵਾਂ ਨੇ ਕਿਹਾ ਹੈ ਕਿ ਕਰੋਨਾ ਵਾਰਡ ’ਚ ਲੜਕੀ ਨਾਲ ਇਕ ਵਾਰਡ ਅਟੈਂਡੈਂਟ ਨੇ ਗ਼ਲਤ ਹਰਕਤ ਕੀਤੀ ਹੈ, ਜਿਸ ਦੀ ਸ਼ਿਕਾਇਤ ਵੀ ਹੋਈ ਹੈ।
ਗਲਤ ਅਨਸਰਾਂ ਦੀ ਪੜਤਾਲ ਕਰ ਰਹੇ ਹਾਂ: ਰੇਖੀ
ਰਾਜਿੰਦਰ ਹਸਪਤਾਲ ਦੇ ਮੈਡੀਕਲ ਸੁਪਰਡੈਂਟ ਡਾ. ਐੱਚ ਐੱਸ ਰੇਖੀ ਨੇ ਕਿਹਾ ਹੈ ਕਿ ਉਹ ਗਲਤ ਅਨਸਰਾਂ ਦੀ ਪੜਤਾਲ ਕਰ ਰਹੇ ਹਾਂ, ਹੁਣ ਤਾਂ 30 ਮਿਲਟਰੀ ਦੇ ਜਵਾਨ ਤਾਇਨਾਤ ਕਰ ਦਿੱਤੇ ਗਏ ਹਨ। ਉਨ੍ਹਾਂ ਦੇ ਧਿਆਨ ਵਿਚ ਅਜਿਹਾ ਮਾਮਲਾ ਆਇਆ ਸੀ ਪਰ ਬੰਦਾ ਨਹੀਂ ਫੜਿਆ ਗਿਆ, ਹੁਣ ਪੂਰੀ ਚੌਕਸੀ ਹੈ ਅਤੇ ਸ਼ੱਕੀ ਅਨਸਰਾਂ ’ਤੇ ਨਜ਼ਰ ਰੱਖੀ ਜਾ ਰਹੀ ਹੈ।