ਟੀ ਐੱਮ ਸੀ ਤੇ ਚੋਣ ਕਮਿਸ਼ਨ ਦੀ ਮੀਟਿੰਗ ਦੌਰਾਨ ਤਲਖ਼ੀ

ਤ੍ਰਿਣਮੂਲ ਕਾਂਗਰਸ (ਟੀ ਐੱਮ ਸੀ) ਦੇ ਵਫ਼ਦ ਤੇ ਭਾਰਤੀ ਚੋਣ ਕਮਿਸ਼ਨ ਦੇ ਪੂਰਨ ਬੈਂਚ ਦਰਮਿਆਨ ਅੱਜ ਹੋਈ ਮੀਟਿੰਗ ਤਣਾਅ ਭਰੇ ਮਾਹੌਲ ’ਚ ਖ਼ਤਮ ਹੋਈ। ਟੀ ਐੱਮ ਸੀ ਆਗੂਆਂ ਨੇ ਦੋਸ਼ ਲਾਇਆ ਕਿ ਮੁੱਖ ਚੋਣ ਕਮਿਸ਼ਨ ਨੇ ਉਨ੍ਹਾਂ ਨੂੰ ‘ਦਫ਼ਾ ਹੋਣ’ ਲਈ ਕਿਹਾ ਜਦਕਿ ਕਮਿਸ਼ਨ ਨੇ ਟੀ ਐੱਮ ਸੀ ਆਗੂਆਂ ’ਤੇ ‘ਚਿਕਣ’ ਦਾ ਦੋਸ਼ ਲਾਇਆ ਹੈ।

ਰਾਜ ਸਭਾ ’ਚ ਟੀ ਐੱਮ ਸੀ ਦੇ ਨੇਤਾ ਡੈਰੇਕ ਓ’ਬ੍ਰਾਇਨ, ਉਪ ਆਗੂ ਸਾਗਰਿਕਾ ਘੋਸ਼, ਸੰਸਦ ਮੈਂਬਰ ਸਾਕੇਤ ਗੋਖਲੇ ਅਤੇ ਮੇਨਕਾ ਗੁਰੂਸਵਾਮੀ ਦੇ ਵਫ਼ਦ ਨੇ ਪੱਛਮੀ ਬੰਗਾਲ ਵਿਧਾਨ ਸਭਾ ਚੋਣਾਂ ਤੋਂ ਕੁਝ ਦਿਨ ਪਹਿਲਾਂ ਚੋਣ ਕਮਿਸ਼ਨ ਨਾਲ ਮੁਲਾਕਾਤ ਕੀਤੀ। ਮੀਟਿੰਗ ਮਗਰੋਂ ਓ’ਬ੍ਰਾਇਨ ਨੇ ਮੀਡੀਆ ਨੂੰ ਦੱਸਿਆ ਕਿ ਉਨ੍ਹਾਂ ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦੇ ਨੌਂ ਪੱਤਰ ਮੁੱਖ ਚੋਣ ਕਮਿਸ਼ਨਰ ਗਿਆਨੇਸ਼ ਕੁਮਾਰ ਨੂੰ ਸੌਂਪੇ, ਜਿਨ੍ਹਾਂ ’ਤੇ ਧਿਆਨ ਨਹੀਂ ਦਿੱਤਾ ਗਿਆ। ਟੀ ਐੱਮ ਸੀ ਆਗੂਆਂ ਨੇ ਚੋਣ ਕਮਿਸ਼ਨ ਨੂੰ ਉਨ੍ਹਾਂ ਕੁਝ ਮਾਮਲਿਆਂ ਬਾਰੇ ਵੀ ਦੱਸਿਆ ਜਿਨ੍ਹਾਂ ’ਚ ਚੋਣ ਅਧਿਕਾਰੀਆਂ ਦੇ ਭਾਜਪਾ ਨਾਲ ਤਾਰ ਜੁੜੇ ਹੋਣ ਦਾ ਦੋਸ਼ ਲਾਇਆ ਗਿਆ ਹੈ ਅਤੇ ਉਨ੍ਹਾਂ ਦੇ ਤਬਾਦਲੇ ਦੀ ਮੰਗ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ, ‘‘ਅਸੀਂ ਮੁੱਖ ਚੋਣ ਕਮਿਸ਼ਨਰ ਨੂੰ ਪੁੱਛਿਆ ਕਿ ਜਦੋਂ ਬੰਗਾਲ ’ਚ ਅਜਿਹੇ ਦਾਗ਼ੀ ਅਧਿਕਾਰੀ ਨਿਯੁਕਤ ਕੀਤੇ ਗਏ ਹੋਣ ਤਾਂ ਉਹ ਨਿਰਪੱਖ ਅਤੇ ਸੁਤੰਤਰ ਚੋਣਾਂ ਕਿਵੇਂ ਕਰਵਾ ਸਕਦੇ ਹਨ। ਇਸ ’ਤੇ ਉਨ੍ਹਾਂ ਦਾ ਜਵਾਬ ਸੀ ‘ਦਫ਼ਾ ਹੋ ਜਾਓ’।’’

ਇਸੇ ਦੌਰਾਨ ਕਮਿਸ਼ਨ ਨੇ ਤ੍ਰਿਣਮੂਲ ਨੇਤਾਵਾਂ ’ਤੇ ‘ਚਿਕਣ ਦੇ ਦੋਸ਼ ਲਾਏ ਅਤੇ ਇਹ ਵੀ ਕਿਹਾ ਕਿ ਕਮਿਸ਼ਨ ਸੂਬੇ ਵਿੱਚ ਨਿਰਪੱਖ ਤੇ ਆਜ਼ਾਦ ਚੋਣਾਂ ਕਰਵਾਏਗਾ।