Delhi Heritage: ਕੰਧ ਚਿੱਤਰ ਨੂੰ ਤਬਦੀਲ ਕਰਨ ਦਾ ਕੰਮ ਗੁਜਰਾਲ ਫਾਊਂਡੇਸ਼ਨ ਨੂੰ ਸੌਂਪਿਆ

ਛੇਤੀ ਹੀ ਖ਼ਾਲੀ ਹੋ ਰਹੇ ਸਰਕਾਰੀ ਦਫਤਰ ਕੰਪਲੈਕਸ ਸ਼ਾਸਤਰੀ ਭਵਨ ਦੀ ਮੂਹਰਲੀ ਕੰਧ ਨੂੰ ਸ਼ਿੰਗਾਰਨ ਵਾਲੇ ਸਤੀਸ਼ ਗੁਜਰਾਲ ਦੇ ਕੰਧ ਚਿੱਤਰਾਂ ਦੀ ਵਿਰਾਸਤੀ ਮਹੱਤਤਾ ਨੂੰ ਸੰਭਾਲਣ ਦੇ ਉਦੇਸ਼ ਨਾਲ ਸਰਕਾਰ ਨੇ ਗੁਜਰਾਲ ਫਾਊਂਡੇਸ਼ਨ ਨੂੰ ਇਸ ਕੰਮ ਵਿੱਚ ਸ਼ਾਮਲ ਕੀਤਾ ਹੈ। ਗੁਜਰਾਲ ਫਾਊਂਡੇਸ਼ਨ ਕਲਾਕਾਰ ਦੀ ਵਿਰਾਸਤ ਅਤੇ ਯਾਦ ਨੂੰ ਅਮਰ ਰੱਖਣ ਲਈ ਕੰਮ ਕਰਦੀ ਹੈ।

ਟ੍ਰਿਬਿਊਨ ਪ੍ਰਕਾਸ਼ਨ ਸਮੂਹ ਨੂੰ ਪਤਾ ਲੱਗਾ ਹੈ ਕਿ ਲੁਟੀਅਨਜ਼ ਦਿੱਲੀ ਦੇ ਸ਼ਾਸਤਰੀ ਭਵਨ ਵਿੱਚ ਸਥਿਤ ਗੁਜਰਾਲ ਦੇ ਕੰਧ ਚਿੱਤਰਾਂ ਨੂੰ ਧਿਆਨ ਨਾਲ ਹਟਾਉਣ, ਲੈ ਕੇ ਜਾਣ ਅਤੇ ਦੂਜੀ ਥਾਂ ਸਥਾਪਤ ਕਰਨ ਦੀ ਜ਼ਿੰਮੇਵਾਰੀ ਸੱਭਿਆਚਾਰਕ ਮੰਤਰਾਲੇ ਵੱਲੋਂ ਨੈਸ਼ਨਲ ਗੈਲਰੀ ਆਫ ਮਾਡਰਨ ਆਰਟ (ਐੱਨ ਜੀ ਐੱਮ ਏ) ਨੂੰ ਸੌਂਪੀ ਗਈ ਹੈ, ਜਿਸ ਨੇ ਸਤੀਸ਼ ਗੁਜਰਾਲ ਫਾਊਂਡੇਸ਼ਨ ਨੂੰ ਆਪਣੇ ‘ਗਿਆਨ ਭਾਗੀਦਾਰ’ ਵਜੋਂ ਨਿਯੁਕਤ ਕੀਤਾ ਹੈ। ਇਨ੍ਹਾਂ ਦੇ ਲਾਏ ਜਾਣ ਤੋਂ ਲਗਪਗ ਛੇ ਦਹਾਕਿਆਂ ਬਾਅਦ, ਸ਼ਾਸਤਰੀ ਭਵਨ ਦੇ ਮੂਹਰਲੇ ਹਿੱਸੇ ’ਤੇ ਸਤੀਸ਼ ਗੁਜਰਾਲ ਵੱਲੋਂ ਬਣਾਏ ਗਏ ਇਹ ਕੰਧ ਚਿੱਤਰ ਹਟਾਏ ਅਤੇ ਦੂਜੀ ਥਾਂ ਤਬਦੀਲ ਕੀਤੇ ਜਾਣਗੇ, ਕਿਉਂਕਿ ਇਹ ਇਤਿਹਾਸਕ ਸਰਕਾਰੀ ਇਮਾਰਤ ਸੈਂਟਰਲ ਵਿਸਟਾ ਪੁਨਰ-ਵਿਕਾਸ ਪ੍ਰਾਜੈਕਟ ਦੇ ਅਗਲੇ ਪੜਾਅ ਲਈ ਰਸਤਾ ਸਾਫ਼ ਕਰ ਰਹੀ ਹੈ।

ਗੁਜਰਾਲ ਫਾਊਂਡੇਸ਼ਨ ਦੇ ਆਗੂਆਂ ਨੇ ਅੱਜ ਟ੍ਰਿਬਿਊਨ ਪ੍ਰਕਾਸ਼ਨ ਸਮੂਹ ਨਾਲ ਵਿਸ਼ੇਸ਼ ਗੱਲਬਾਤ ਦੌਰਾਨ ਦੱਸਿਆ ਕਿ ਇਨ੍ਹਾਂ ਕਲਾਕ੍ਰਿਤੀਆਂ ਲਈ ਨਵੇਂ ਘਰ ਦੀ ਭਾਲ ਜਾਰੀ ਹੈ ਅਤੇ ਹਾਲੇ ਤੱਕ ਇਹ ਪ੍ਰਕਿਰਿਆ ਪੂਰੀ ਨਹੀਂ ਹੋਈ। ਸਤੀਸ਼ ਗੁਜਰਾਲ ਵੱਲੋਂ ਆਮ ਜਨਤਾ ਦੇ ਦੇਖਣ ਲਈ ਆਰਕੀਟੈਕਚਰ ਪੱਧਰ ’ਤੇ ਤਿਆਰ ਕੀਤੇ ਗਏ ਇਨ੍ਹਾਂ ਕੰਧ-ਚਿੱਤਰਾਂ ਨੂੰ ਨਵੀਂ ਥਾਂ ’ਤੇ ਲਿਜਾਣ ਤੋਂ ਪਹਿਲਾਂ ਧਿਆਨ ਨਾਲ ਦਸਤਾਵੇਜ਼ੀ ਰੂਪ ਦਿੱਤਾ ਜਾਵੇਗਾ, ਹਟਾਇਆ ਜਾਵੇਗਾ ਅਤੇ ਸੰਭਾਲਿਆ ਜਾਵੇਗਾ। ਕਲਾਕ੍ਰਿਤੀਆਂ ਨੂੰ ਤਬਦੀਲ ਕਰਨ ਬਾਰੇ ਸਵਾਲਾਂ ਦਾ ਜਵਾਬ ਦਿੰਦਿਆਂ ਗੁਜਰਾਲ ਫਾਊਂਡੇਸ਼ਨ ਦੇ ਤਰਜਮਾਨ ਨੇ ਕਿਹਾ, ‘‘ਪਰ ਇਸ ਦੇ ਭਵਿੱਖ ਦੇ ਨਵੇਂ ਟਿਕਾਣੇ ਬਾਰੇ ਹਾਲੇ ਤੱਕ ਕੋਈ ਫ਼ੈਸਲਾ ਨਹੀਂ ਕੀਤਾ ਗਿਆ।’’

ਫਾਊਂਡੇਸ਼ਨ ਦੇ ਤਰਜਮਾਨ ਨੇ ਦੱਸਿਆ, ‘‘ਐੱਨ ਜੀ ਐੱਮ ਏ ਵੱਲੋਂ ਨਿਯੁਕਤ ਕੀਤੀਆਂ ਗਈਆਂ ਏਜੰਸੀਆਂ ਇਸ ਸਮੇਂ ਕੰਧ ਚਿੱਤਰ ਹਟਾਉਣ ਦੇ ਸਭ ਤੋਂ ਸੁਰੱਖਿਅਤ ਤਰੀਕੇ ਦੀ ਪਛਾਣ ਕਰਨ ਲਈ ਅਧਿਐਨ ਕਰ ਰਹੀਆਂ ਹਨ। ਇਨ੍ਹਾਂ ਨੂੰ ਤਬਦੀਲ ਕਰਨ ਦੀ ਤਕਨੀਕ ਬਾਰੇ ਫ਼ੈਸਲਾ ਕਰਨ ਤੋਂ ਪਹਿਲਾਂ ਇਨ੍ਹਾਂ ਦੀ ਸਥਿਤੀ ਦਾ ਵਿਸਥਾਰ ’ਚ ਮੁਲਾਂਕਣ ਵੀ ਜ਼ਰੂਰੀ ਹੋਵੇਗਾ।’’ ਫਾਊਂਡੇਸ਼ਨ ਨੇ ਇਹ ਵੀ ਕਿਹਾ ਕਿ ਜਦੋਂ ਤੱਕ ਮਾਹਰਾਂ ਦੇ ਅਧਿਐਨ ਪੂਰੇ ਨਹੀਂ ਹੋ ਜਾਂਦੇ, ਉਦੋਂ ਤੱਕ ਕੰਧ-ਚਿੱਤਰਾਂ ਦੀ ਹਾਲਤ ਬਾਰੇ ਕੋਈ ਪੱਕੀ ਟਿੱਪਣੀ ਕਰਨਾ ਸਮੇਂ ਤੋਂ ਪਹਿਲਾਂ ਹੋਵੇਗਾ। ਇਸ ਨੇ ਕਿਹਾ, ‘‘ਕੰਧ-ਚਿੱਤਰਾਂ ਦੇ ਦਸਤਾਵੇਜ਼ੀਕਰਨ, ਹਟਾਉਣ, ਸੰਭਾਲ, ਆਵਾਜਾਈ ਅਤੇ ਮੁੜ ਸਥਾਪਤ ਕਰਨ ਲਈ ਸਾਵਧਾਨੀਪੂਰਵਕ ਯੋਜਨਾਬੰਦੀ ਅਤੇ ਰਿਕਾਰਡਿੰਗ ਦੀ ਲੋੜ ਹੋਵੇਗੀ।’’