ਨਵੀਂ ਦਿੱਲੀ, 18 ਅਕਤੂਬਰ
ਪੂਰਬੀ ਲੱਦਾਖ ਵਿਚ ਚੀਨ ਨਾਲ ਬਣੇ ਟਕਰਾਅ ਬਾਰੇ ਫ਼ੌਜ ਦੇ ਚੋਟੀ ਦੇ ਕਮਾਂਡਰ ਵਿਸਥਾਰ ਵਿਚ ਵਿਚਾਰ-ਚਰਚਾ ਕਰਨਗੇ। ਇਸ ਤੋਂ ਇਲਾਵਾ ਲੰਮੇ ਸਮੇਂ ਤੋਂ ਲਟਕੇ ਕਈ ਸੁਧਾਰਾਂ ਬਾਰੇ ਵੀ ਵਿਚਾਰ-ਵਟਾਂਦਰਾ ਕੀਤਾ ਜਾਵੇਗਾ। ਚਾਰ ਦਿਨਾਂ ਦੀ ਕਾਨਫ਼ਰੰਸ 26 ਅਕਤੂਬਰ ਤੋਂ ਸ਼ੁਰੂ ਹੋ ਰਹੀ ਹੈ। ਮੁਲਕ ਅੱਗੇ ਬਣੀਆਂ ਰੱਖਿਆ ਚੁਣੌਤੀਆਂ ਚਰਚਾ ਦਾ ਕੇਂਦਰ ਹੋਣਗੀਆਂ। ਅੰਦਰੂਨੀ ਕਮੇਟੀਆਂ ਨੇ ਵੱਖ-ਵੱਖ ਸੁਧਾਰਾਂ ਦੀ ਸਿਫ਼ਾਰਿਸ਼ ਕੀਤੀ ਹੈ। ਸਰੋਤਾਂ ਦੀ ਮੰਗ ਮੁਤਾਬਕ ਵਰਤੋਂ ਬਾਰੇ ਸਿਫ਼ਾਰਿਸ਼ਾਂ ਨੂੰ ਅੰਤਿਮ ਛੋਹ ਦੇਣ ਦਾ ਯਤਨ ਵੀ ਇਸ ਮੌਕੇ ਕੀਤਾ ਜਾਵੇਗਾ। ਕਮਾਂਡਰ 13 ਲੱਖ ਬਲਾਂ ਦੀ ਸਮਰੱਥਾ ਵਧਾਉਣ ਬਾਰੇ ਵੀ ਵਿਚਾਰ ਕਰਨਗੇ। ਕਾਨਫ਼ਰੰਸ ਦੀ ਅਗਵਾਈ ਫ਼ੌਜ ਮੁਖੀ ਜਨਰਲ ਐਮ.ਐਮ. ਨਰਵਾਣੇ ਕਰਨਗੇ। ਇਸ ਮੌਕੇ ਆਰਮੀ ਡੇਅ ਤੇ ਟੈਰੀਟੋਰੀਅਲ ਆਰਮੀ ਡੇਅ ਪਰੇਡ ਦਾ ਪੱਧਰ ਘਟਾਉਣ ਜਾਂ ਇਨ੍ਹਾਂ ਨੂੰ ਬੰਦ ਕਰਨ ਬਾਰੇ ਵਿਚਾਰ ਦੀ ਤਜਵੀਜ਼ ਵੀ ਹੈ। ਇਸ ਤਰ੍ਹਾਂ ਦੇ ਕਈ ਹੋਰ ਅਭਿਆਸ ਵੀ ਘਟਾਏ ਜਾ ਸਕਦੇ ਹਨ। ਅਫ਼ਸਰ ਮੈੱਸ ਘਟਾਉਣ ਦੀ ਤਜਵੀਜ਼ ਵੀ ਹੈ। ਚੋਟੀ ਦੇ ਕਮਾਂਡਰ ਸੀਨੀਅਰ ਅਧਿਕਾਰੀਆਂ ਦੀਆਂ ਰਿਹਾਇਸ਼ਾਂ ’ਤੇ ਗਾਰਡਜ਼ ਨੂੰ ਘਟਾਉਣ ਤੇ ਸੀਐੱਸਡੀ ਕੰਟੀਨਾਂ ਨੂੰ ਘਟਾਉਣ ਦੀ ਤਜਵੀਜ਼ ਉਤੇ ਵੀ ਵਿਚਾਰ-ਚਰਚਾ ਕਰਨਗੇ। -ਪੀਟੀਆਈ