ਗਲਵਾਨ ਵਾਦੀ ’ਚੋਂ ਚੀਨੀ ਫ਼ੌਜ ਪਿੱਛੇ ਹਟੀ

* ਆਪਸੀ ਸਮਝ ਦੇ ਆਧਾਰ ’ਤੇ ਭਾਰਤ ਵੀ ਫੌਜੀ ਨਫ਼ਰੀ ਕਰੇਗਾ ਘੱਟ * ਚੀਨੀ ਦਸਤਿਆਂ ਨੇ ਘਾਟੀ ’ਚ ਲੱਗੇ ਤੰਬੂ ਪੁੱਟੇ ਤੇ ਆਰਜ਼ੀ ਢਾਂਚੇ ਢਾਏ * ਗੋਗਰਾ ਹੌਟ ਸਪਰਿੰਗਜ਼ ਤੇ ਪੈਂਗੌਂਗ ਝੀਲ ਖੇਤਰ ’ਚ ਵੀ ਚੀਨੀ ਵਾਹਨਾਂ ਤੇ ਫੌਜਾਂ ਦੇ ਪਿੱਛੇ ਹਟਣ ਦੀਆਂ ਰਿਪੋਰਟਾਂ

ਗਲਵਾਨ ਵਾਦੀ ’ਚੋਂ ਚੀਨੀ ਫ਼ੌਜ ਪਿੱਛੇ ਹਟੀ

ਜ਼ਿਲ੍ਹਾ ਕੁੱਲੂ ਵਿੱਚ ਸੋਮਵਾਰ ਨੂੰ ਮਨਾਲੀ-ਲੇਹ ਹਾੲੀਵੇਅ ’ਤੇ ਲੱਦਾਖ ਵੱਲ ਜਾਂਦੇ ਹੋਏ ਭਾਰਤੀ ਫੌਜ ਦੇ ਟਰੱਕ। -ਫੋਟੋ: ਪੀਟੀਆੲੀ

ਨਵੀਂ ਦਿੱਲੀ, 6 ਜੁਲਾਈ

ਪਿਛਲੇ ਦੋ ਮਹੀਨਿਆਂ ਤੋਂ ਪੂਰਬੀ ਲੱਦਾਖ ਵਿੱਚ ਅਸਲ ਕੰਟਰੋਲ ਰੇਖਾ ਦੇ ਨਾਲ ਭਾਰਤ ਤੇ ਚੀਨ ਦੀਆਂ ਫੌਜਾਂ ਦਰਮਿਆਨ ਬਣੀ ਤਲਖੀ ਨੂੰ ਘਟਾਉਣ ਦੇ ਪਹਿਲੇ ਸੰਕੇਤ ਵਜੋਂ ਚੀਨੀ ਫੌਜ ਨੇ ਅੱਜ ਗਲਵਾਨ ਘਾਟੀ ’ਚ ਲੱਗੇ ਆਪਣੇ ਤੰਬੂ ਪੁੱਟ ਲਏ ਤੇ ਆਰਜ਼ੀ ਢਾਂਚੇ ਢਾਹ ਦਿੱਤੇ। ਚੀਨ ਨੇ ਘਾਟੀ ’ਚ ਤਾਇਨਾਤ ਆਪਣੀਆਂ ਫੌਜਾਂ ਨੂੰ ਪਿੱਛੇ ਹਟਾਉਣ ਦਾ ਅਮਲ ਸ਼ੁਰੂ ਕਰ ਦਿੱਤਾ ਹੈ। ਸੂਤਰਾਂ ਮੁਤਾਬਕ ਚੀਨੀ ਫੌਜਾਂ ਗਲਵਾਨ ਘਾਟੀ ਵਿੱਚ ਗਸ਼ਤੀ ਪੁਆਇੰਟ ਤੋਂ ਡੇਢ ਕਿਲੋਮੀਟਰ ਤਕ ਪਿਛਾਂਹ ਹਟ ਗਈਆਂ ਹਨ। ਦੋਵੇਂ ਫੌਜਾਂ ਗਲਵਾਨ ਨਦੀ ਨੇੜਲੇ ਖੇਤਰ ਵਿੱਚ ਘੱਟੋ-ਘੱਟ ਤਿੰਨ ਕਿਲੋਮੀਟਰ ਦਾ ਬਫ਼ਰ ਜ਼ੋਨ ਬਣਾਉਣਗੀਆਂ। ਉਧਰ ਭਾਰਤ ਵੀ ਦੋਵਾਂ ਧਿਰਾਂ ’ਚ ਬਣੀ ‘ਆਪਸੀ ਸਮਝ’ ਮਗਰੋਂ ਟਕਰਾਅ ਵਾਲੇ ਖੇਤਰਾਂ ’ਚੋਂ ਫੌਜਾਂ ਦੀ ਨਫ਼ਰੀ ਘਟਾਏਗਾ। ਅਧਿਕਾਰਤ ਸੂਤਰਾਂ ਨੇ ਕਿਹਾ ਕਿ ਚੀਨੀ ਫੌਜਾਂ ਨੇ ਗਲਵਾਨ ਵਾਦੀ ’ਚ ਸੋਮਵਾਰ ਸਵੇਰੇ ਆਪਣੇ ਤੰਬੂ ਤੇ ਬੰਬੂ ਪੁੱਟਣੇ ਸ਼ੁਰੂ ਕਰ ਦਿੱਤੇ ਹਨ। ਚੀਨੀ ਫੌਜਾਂ ਵਾਦੀ ’ਚੋਂ ਪਿੱਛੇ ਹਟਣ ਲੱਗੀਆਂ ਹਨ। ਸੂਤਰਾਂ ਨੇ ਕਿਹਾ ਕਿ ਗੋਗਰਾ ਹੌਟ ਸਪਰਿੰਗਜ਼ ਵਿੱਚ ਵੀ ਵਾਹਨਾਂ ਤੇ ਸੁਰੱਖਿਆ ਬਲਾਂ ਦੇ ਪੁੱਠੇ ਪੈਰੀਂ ਹੋਣ ਦੀਆਂ ਰਿਪੋਰਟਾਂ ਹਨ। ਪੈਂਗੌਂਗ ਝੀਲ ਖੇਤਰ ਵਿੱਚ ਫਿੰਗਰ 4 ਦੇ ਨੇੜੇ ਵੀ ਚੀਨੀ ਫੌਜਾਂ ਨੇ ਆਪਣੇ ਤੰਬੂ-ਬੰਬੂ ਚੁੱਕ ਲਏ ਹਨ। ਚੇਤੇ ਰਹੇ ਕਿ ਤਲਖੀ ਵਧਣ ਮਗਰੋਂ ਚੀਨ ਨੇ ਫਿੰਗਰ 4 ਤੇ ਫਿੰਗਰ 8 ਦਰਮਿਆਨ ਪੈਂਦੇ ਖੇਤਰਾਂ ’ਚ ਆਪਣੀ ਮੌਜੂਦਗੀ ਵਧਾ ਦਿੱਤੀ ਸੀ। ਸੂਤਰਾਂ ਨੇ ਕਿਹਾ ਕਿ ਗਲਵਾਨ ਘਾਟੀ ਵਿੱਚ ਚੀਨੀ ਸਲਾਮਤੀ ਦਸਤੇ ਗਸ਼ਤੀ ਪੁਆਇੰਟ 14, 15 ਤੇ 17 ਤੋਂ ਕਰੀਬ ਇਕ ਕਿਲੋਮੀਟਰ ਤਕ ਪਿੱਛੇ ਹਟ ਗਏ ਹਨ। ਸੂਤਰਾਂ ਨੇ ਕਿਹਾ ਕਿ ਹਾਲ ਦੀ ਘੜੀ ਫੌਰੀ ਇਹ ਪਤਾ ਲਾਉਣਾ ਔਖਾ ਹੈ ਕਿ ਚੀਨੀ ਫੌਜਾਂ ਗਲਵਾਨ ਘਾਟੀ ’ਚੋਂ ਕਿੰਨਾ ਕੁ ਪਿੱਛੇ ਮੁੜੀਆਂ ਹਨ ਤੇ ਅਸਲ ਤਸਵੀਰ ਢੁੱਕਵੇਂ ਤਸਦੀਕੀ ਅਮਲ ਦੇ ਪੂਰਾ ਹੋਣ ਮਗਰੋਂ ਹੀ ਸਪਸ਼ਟ ਹੋਵੇਗੀ। ਸੂਤਰਾਂ ਨੇ ਕਿਹਾ ਕਿ 30 ਜੂਨ ਨੂੰ ਫੌਜੀ ਪੱਧਰ ਦੀ ਗੱਲਬਾਤ ਦੌਰਾਨ ਬਣੀ ਸਹਿਮਤੀ ਮੁਤਾਬਕ ਹੀ ਫੌਜਾਂ ਨੇ ਪਿੱਛੇ ਹਟਣ ਦਾ ਅਮਲ ਸ਼ੁਰੂ ਕੀਤਾ ਹੈ। ਦੋਵੇਂ ਫੌਜਾਂ ਗਲਵਾਨ ਨਦੀ ਨੇੜਲੇ ਖੇਤਰ ਵਿੱਚ ਘੱਟੋ-ਘੱਟ ਤਿੰਨ ਕਿਲੋਮੀਟਰ ਦਾ ਬਫ਼ਰ ਜ਼ੋਨ ਬਣਾਉਣਗੀਆਂ। ਭਾਰਤੀ ਫੌਜੀ ਵੀ ਇਸੇ ਸਹਿਮਤੀ ਮੁਤਾਬਕ ਪੇਸ਼ਕਦਮੀ ਕਰਨਗੇ। ਸੂਤਰਾਂ ਨੇ ਕਿਹਾ ਕਿ ਭਾਰਤ ਟਕਰਾਅ ਵਾਲੇ ਖੇਤਰਾਂ ’ਚੋਂ ਚੀਨੀ ਫੌਜਾਂ ਦੀ ਵਾਪਸੀ ਨੂੰ ਸਖ਼ਤੀ ਨਾਲ ਵਾਚ ਰਿਹਾ ਹੈ। ਭਾਰਤ ਤੇ ਚੀਨ ਨੇ 30 ਜੂਨ ਨੂੰ ਲੈਫਟੀਨੈਂਟ ਜਨਰਲ ਪੱਧਰ ਦੀ ਤੀਜੇ ਗੇੜ ਦੀ ਗੱਲਬਾਤ ਦੌਰਾਨ ਤਲਖੀ ਨੂੰ ਘਟਾਉਣ ਤੇ ਫੌਜਾਂ ਨੂੰ ਸਰਹੱਦ ਤੋਂ ‘ਤੇਜ਼ੀ ਨਾਲ, ਪੜਾਅਵਾਰ ਤੇ ਕਦਮ ਦਰ ਕਦਮ’ ਹਟਾਉਣ ਦੀ ਸਹਿਮਤੀ ਦਿੱਤੀ ਸੀ।

-ਪੀਟੀਆਈ

ਮੂਹਰਲੀ ਕਤਾਰ ਦੇ ਫ਼ੌਜੀ ਚੁੱਕ ਰਹੇ ਨੇ ਅਸਰਦਾਰ ਕਦਮ: ਚੀਨ

ਪੇਈਚਿੰਗ: ਚੀਨ ਨੇ ਅੱਜ ਕਿਹਾ ਕਿ ਮੂਹਰਲੀ ਕਤਾਰ ਦੇ ਫੌਜੀ ਗਲਵਾਨ ਘਾਟੀ ਵਿੱਚ ਅਸਲ ਕੰਟਰੋਲ ਰੇਖਾ ’ਤੇ ਭਾਰਤ ਨਾਲ ਤਲਖੀ ਘਟਾਉਣ ਲਈ ‘ਅਸਰਦਾਰ ਉਪਰਾਲਿਆਂ’ ਨੂੰ ਅਮਲ ਵਿੱਚ ਲਿਆ ਰਹੇ ਹਨ। ਵਿਦੇਸ਼ ਮੰਤਰਾਲੇ ਦੇ ਤਰਜਮਾਨ ਜ਼ਾਓ ਲਿਜੀਆਨ ਨੇ ਕਿਹਾ, ‘ਮੂਹਰਲੀ ਕਤਾਰ ਦੇ ਸਲਾਮਤੀ ਦਸਤੇ ਤਲਖੀ ਨੂੰ ਘਟਾਉਣ ਤੇ ਫੌਜਾਂ ਦੇ ਪਿੱਛੇ ਹਟਣ ਲਈ ਅਸਰਦਾਰ ਉਪਰਾਲਿਆਂ ਨੂੰ ਅਮਲ ਵਿੱਚ ਲਿਆ ਰਹੇ ਹਨ। ਅਸੀਂ ਆਸ ਕਰਦੇ ਹਾਂ ਕਿ ਦੋਵੇਂ ਮੁਲਕ ਫ਼ੌਜੀ ਤੇ ਕੂਟਨੀਤਕ ਚੈਨਲਾਂ ਰਾਹੀਂ ਬਣੀ ਸਹਿਮਤੀ ਨੂੰ ਲਾਗੂ ਕਰਕੇ ਸਰਹੱਦੀ ਖੇਤਰ ’ਚ ਤਲਖੀ ਘਟਾਉਣਗੇ।’

-ਪੀਟੀਆਈ

ਚੀਨ ਨਾਲ ਰਾਬਤਾ ਨਾ ਬਣਾਇਆ ਹੁੰਦਾ ਤਾਂ ਹਾਲਾਤ ਬਦਤਰ ਹੋ ਸਕਦੇ ਸੀ: ਸ਼ਿ੍ਰੰਗਲਾ

ਨਵੀਂ ਦਿੱਲੀ: ਵਿਦੇਸ਼ ਸਕੱਤਰ ਹਰਸ਼ ਵਰਧਨ ਸ਼੍ਰਿੰਗਲਾ ਨੇ ਅੱਜ ਕਿਹਾ ਕਿ ਭਾਰਤ ਨੇ ਕੂਟਨੀਤਕ ਤੇ ਫੌਜੀ ਚੈਨਲਾਂ ਜ਼ਰੀਏ ਲਗਾਤਾਰ ਚੀਨ ਨਾਲ ਰਾਬਤਾ ਬਣਾਇਆ ਹੋਇਆ ਸੀ ਅਤੇ ਜੇਕਰ ਅਜਿਹਾ ਨਾ ਹੁੰਦਾ ਤਾਂ ਭਾਰਤ-ਚੀਨ ਸਰਹੱਦੀ ਹਾਲਾਤ ਹੋਰ ਬਦਤਰ ਹੋ ਸਕਦੇ ਸੀ। ਸ਼੍ਰਿੰਗਲਾ ਭਾਰਤ ਦੇ ਚਾਰਟਰਡ ਅਕਾਊਂਟੈਂਟਾਂ ਦੇ ਸੰਸਥਾਨ ਵੱਲੋਂ ਕੋਵਿਡ-19 ਮਹਾਮਾਰੀ ਬਾਰੇ ਰੱਖੇ ਵੈਬਿਨਾਰ ਨੂੰ ਸੰਬੋਧਨ ਕਰ ਰਹੇ ਸਨ।
-ਪੀਟੀਆਈ

30 ਹਜ਼ਾਰ ਭਾਰਤੀ ਫੌਜੀ ਲੋਹਾ ਲੈਣ ਲਈ ਸੀ ਤਿਆਰ

ਲੇਹ: ਪਿਛਲੇ ਮਹੀਨੇ ਅਸਲ ਕੰਟਰੋਲ ਰੇਖਾ ’ਤੇ ਗਲਵਾਨ ਘਾਟੀ ’ਚ ਚੀਨੀ ਫੌਜ ਨਾਲ ਹੋਏ ਹਿੰਸਕ ਟਕਰਾਅ ਮਗਰੋਂ ਭਾਰਤ ਨੇ ਸਰਹੱਦ ’ਤੇ ਤਿੰਨ ਵਧੀਕ ਫੌਜੀ ਬ੍ਰਿਗੇਡਾਂ ਦੀ ਤਾਇਨਾਤੀ ਕੀਤੀ ਹੈ। ਤੀਹ ਹਜ਼ਾਰ ਦੇ ਕਰੀਬ ਭਾਰਤੀ ਫੌਜੀ ਕਿਸੇ ਵੀ ਹਾਲਾਤ ਨਾਲ ਨਜਿੱਠਣ ਤੇ ਚੀਨ ਨਾਲ ਲੋਹਾ ਲੈਣ ਲਈ ਤਿਆਰ ਹਨ। ਉੱਚ ਮਿਆਰੀ ਸੂਤਰਾਂ ਨੇ ਦੱਸਿਆ ਕਿ ਆਮ ਹਾਲਾਤ ਵਿੱਚ ਲੱਦਾਖ ’ਚ ਐੱਲਏਸੀ ਦੇ ਨਾਲ ਦੋ ਡਿਵੀਜ਼ਨਾਂ ਤਾਇਨਾਤ ਰਹਿੰਦੀਆਂ ਹਨ। ਸਲਾਮਤੀ ਦਸਤਿਆਂ ਨੂੰ ਰੋਟੇਸ਼ਨ ਦੇ ਆਧਾਰ ’ਤੇ ਤਾਇਨਾਤ ਕੀਤਾ ਜਾਂਦਾ ਹੈ। 15 ਜੂਨ ਦੇ ਹਿੰਸਕ ਟਕਰਾਅ ਮਗਰੋਂ ਥਲ ਸੈਨਾ ਨੇ ਤਿੰਨ ਵਧੀਕ ਬ੍ਰਿਗੇਡਾਂ (ਹਰ ਬ੍ਰਿਗੇਡ ’ਚ ਤਿੰਨ ਹਜ਼ਾਰ ਦੇ ਕਰੀਬ ਜਵਾਨ) ਮੰਗੀਆਂ ਸਨ। ਤਿੰਨ ਵਧੀਕ ਬ੍ਰਿਗੇਡਾਂ ਦੇ ਦਸ ਹਜ਼ਾਰ ਦੇ ਕਰੀਬ ਫੌਜੀ ਪੰਜਾਬ, ਹਿਮਾਚਲ ਪ੍ਰਦੇਸ਼ ਤੇ ਉੱਤਰ ਪ੍ਰਦੇਸ਼ ਤੋਂ ਲਿਆਂਦੇ ਗਏ ਹਨ।
-ਆਈਏਐੱਨਐੱਸ

ਸਭ ਤੋਂ ਵੱਧ ਪੜ੍ਹੀਆਂ ਖ਼ਬਰਾਂ

ਜ਼ਰੂਰ ਪੜ੍ਹੋ

ਮੁੱਖ ਖ਼ਬਰਾਂ

ਸ੍ਰੀਨਗਰ ਜ਼ਿਲ੍ਹੇ ’ਚੋਂ ਕਰਫਿਊ ਹਟਾਇਆ

ਸ੍ਰੀਨਗਰ ਜ਼ਿਲ੍ਹੇ ’ਚੋਂ ਕਰਫਿਊ ਹਟਾਇਆ

ਕੋਵਿਡ-19 ਮਹਾਮਾਰੀ ਕਰਕੇ ਲਾਈਆਂ ਪਾਬੰਦੀਆਂ ਪਹਿਲਾਂ ਵਾਂਗ ਰਹਿਣਗੀਆਂ ਜਾ...

ਇਮਰਾਨ ਖ਼ਾਨ ਸਰਕਾਰ ਵੱਲੋਂ ਪਾਕਿਸਤਾਨ ਦਾ ਨਵਾਂ ਸਿਆਸੀ ਨਕਸ਼ਾ ਜਾਰੀ

ਇਮਰਾਨ ਖ਼ਾਨ ਸਰਕਾਰ ਵੱਲੋਂ ਪਾਕਿਸਤਾਨ ਦਾ ਨਵਾਂ ਸਿਆਸੀ ਨਕਸ਼ਾ ਜਾਰੀ

ਜੰਮੂ ਤੇ ਕਸ਼ਮੀਰ ਦੇ ਕੁਝ ਇਲਾਕਿਆਂ ਤੇ ਲੱਦਾਖ ਦੇ ਇਕ ਹਿੱਸੇ, ਜੂਨਾਗੜ੍ਹ ...

ਮੋਦੀ ਵੱਲੋਂ ਅਯੁੱਧਿਆ ਵਿਚ ‘ਭੂਮੀ ਪੂਜਨ’ ਅੱਜ

ਮੋਦੀ ਵੱਲੋਂ ਅਯੁੱਧਿਆ ਵਿਚ ‘ਭੂਮੀ ਪੂਜਨ’ ਅੱਜ

ਰਾਮ ਮੰਦਰ ਦੀ ਉਸਾਰੀ ਦਾ ਨੀਂਹ ਪੱਥਰ ਰੱਖਣਗੇ ਪ੍ਰਧਾਨ ਮੰਤਰੀ; ਸੰਤਾਂ ਤੇ...

ਸ਼ਹਿਰ

View All