Tamil Nadu: ਤਾਮਿਲਾਂ ਦੀ ਹੱਤਿਆ ਦਾ ਮਾਮਲਾ ਵਿਧਾਨ ਸਭਾ ਵਿੱਚ ਗੂੰਜਿਆ
ਮੁੱਖ ਮੰਤਰੀ ਜੋਸਫ ਵਿਜੈ ਨੇ ਘਟਨਾ ਦੀ ਉੱਚ ਪੱਧਰੀ ਜਾਂਚ ਮੰਗੀ
ਕਰਨਾਟਕ ਦੇ ਚਾਮਰਾਜਨਗਰ ਜ਼ਿਲ੍ਹੇ ਵਿੱਚ ਜੰਗਲਾਤ ਵਿਭਾਗ ਦੀ ਗੋਲੀਬਾਰੀ ਵਿੱਚ ਤਿੰਨ ਤਾਮਿਲ ਵਿਅਕਤੀਆਂ ਦੀ ਮੌਤ ਦਾ ਮਾਮਲਾ ਮੰਗਲਵਾਰ ਨੂੰ ਤਾਮਿਲ ਨਾਡੂ ਵਿਧਾਨ ਸਭਾ ਵਿੱਚ ਗੂੰਜਿਆ। ਮੈਂਬਰਾਂ ਨੇ ਧਿਆਨ ਦਿਵਾਊ ਮਤੇ ਰਾਹੀਂ ਘਟਨਾ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ। ਐਂਥਨੀ ਸਾਮੀ, ਜੌਨ ਰੋਜ਼ ਪੀਟਰ ਅਤੇ ਕੁਮਾਰ ਦੀ 15 ਅਗਸਤ ਨੂੰ ਕਾਵੇਰੀ ਵਣ ਜੀਵ ਰੱਖ ਖੇਤਰ ਵਿੱਚ ਗੋਲੀ ਲੱਗਣ ਕਾਰਨ ਮੌਤ ਹੋ ਗਈ ਸੀ। ਤਾਮਿਲ ਨਾਡੂ ਦੇ ਮੁੱਖ ਮੰਤਰੀ ਸੀ ਜੋਸਫ ਵਿਜੈ ਨੇ ਘਟਨਾ ਦੀ ਸਖ਼ਤ ਸ਼ਬਦਾਂ ਵਿੱਚ ਨਿਖੇਧੀ ਕਰਦਿਆਂ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ।
ਵਿਰੋਧੀ ਧਿਰ ਦੇ ਆਗੂ ਐਡਾਪੱਡੀ ਕੇ ਪਲਾਨੀਸਵਾਮੀ ਨੇ ਮਾਮਲੇ ਦੀ ਸੀ ਬੀ ਆਈ ਜਾਂਚ ਦੀ ਮੰਗ ਕਰਦਿਆਂ ਕਿਹਾ ਕਿ ਪਰਿਵਾਰਾਂ ਮੁਤਾਬਕ ਮ੍ਰਿਤਕ ਬੇਕਸੂਰ ਸਨ। ਡੀ ਐੱਮ ਕੇ ਵਿਧਾਇਕ ਮਨੋਜ ਪਾਂਡੀਅਨ ਨੇ ਇਸ ਨੂੰ ‘ਫ਼ਰਜ਼ੀ ਮੁਕਾਬਲਾ’ ਅਤੇ ਮਨੁੱਖੀ ਅਧਿਕਾਰਾਂ ਦੀ ਗੰਭੀਰ ਉਲੰਘਣਾ ਦੱਸਦਿਆਂ ਨਿਆਂਇਕ ਜਾਂਚ ਦੀ ਮੰਗ ਕੀਤੀ। ਕਾਂਗਰਸ ਅਤੇ ਭਾਜਪਾ ਮੈਂਬਰਾਂ ਨੇ ਵੀ ਨਿਰਪੱਖ ਜਾਂਚ ਦੀ ਮੰਗ ਕੀਤੀ।
ਵਿਧਾਇਕਾ ਨਵਜੰਮੇ ਬੱਚੇ ਨੂੰ ਲੈ ਕੇ ਵਿਧਾਨ ਸਭਾ ਪੁੱਜੀ
ਤਾਮਿਲ ਨਾਡੂ ਦੀ ਪਹਿਲੀ ਵਾਰ ਵਿਧਾਇਕਾ ਬਣੀ ਟੀ ਵੀ ਕੇ ਆਗੂ ਆਰ ਪੱਲਵੀ ਆਪਣੇ ਨਵਜੰਮੇ ਬੱਚੇ ਨੂੰ ਲੈ ਕੇ ਵਿਧਾਨ ਸਭਾ ਪੁੱਜੀ। ਅਧਿਕਾਰੀਆਂ ਮੁਤਾਬਕ ਪੱਲਵੀ ਬੱਚੇ ਨੂੰ ਵਿਧਾਨ ਸਭਾ ਕੰਪਲੈਕਸ ਵਿੱਚ ਲੈ ਕੇ ਆਉਂਦੀ ਹੈ ਅਤੇ ਸਦਨ ਦੀ ਕਾਰਵਾਈ ਵਿੱਚ ਸ਼ਾਮਲ ਹੋਣ ਸਮੇਂ ਬੱਚੇ ਨੂੰ ਸਹਾਇਕ ਦੀ ਦੇਖਭਾਲ ਵਿੱਚ ਛੱਡ ਦਿੰਦੀ ਹੈ। ਸਹਾਇਕ ਸਦਨ ਨੇੜੇ ਕਮਰੇ ਵਿੱਚ ਬੱਚੇ ਦੀ ਦੇਖਭਾਲ ਕਰਦਾ ਹੈ। ਪੱਲਵੀ ਆਪਣੇ ਬੱਚੇ ਨੂੰ ਮੁੱਖ ਮੰਤਰੀ ਅਤੇ ਟੀ ਵੀ ਕੇ ਮੁਖੀ ਸੀ ਜੋਸਫ ਵਿਜੈ ਕੋਲ ਵੀ ਲੈ ਕੇ ਗਈ, ਜਿਨ੍ਹਾਂ ਨੇ ਬੱਚੇ ਨੂੰ ਆਸ਼ੀਰਵਾਦ ਦਿੱਤਾ।
