Jharkhand ’ਚ ਵਿਦਿਆਰਥੀਆਂ ਦਾ ਵਿਧਾਨ ਸਭਾ ਵੱਲ ਮਾਰਚ

ਆਲ ਇੰਡੀਆ ਸਟੂਡੈਂਟਸ ਐਸੋਸੀਏਸ਼ਨ (ਆਈਸਾ) ਅਤੇ ਆਲ ਇੰਡੀਆ ਸਟੂਡੈਂਟਸ ਫੈਡਰੇਸ਼ਨ (ਏ ਆਈ ਐੱਸ ਐੱਫ) ਨੇ ਮੰਗਾਂ ਨੂੰ ਲੈ ਕੇ ਵਿਧਾਨ ਸਭਾ ਵੱਲ ਮਾਰਚ ਕੀਤਾ। ਆਈਸਾ ਦੀ ਕੇਂਦਰੀ ਪ੍ਰਧਾਨ ਨੇਹਾ ਬੋਰਾ ਨੇ ਜੈਪਾਲ ਸਿੰਘ ਮੁੰਡਾ ਸਟੇਡੀਅਮ ਵਿਖੇ ਭੁੱਖ ਹੜਤਾਲ ’ਤੇ ਬੈਠੇ ਵਿਦਿਆਰਥੀਆਂ ਨਾਲ ਮੁਲਾਕਾਤ ਕਰ ਕੇ ਆਪਣੀ ਹਮਾਇਤ ਦਿੱਤੀ। ਉਨ੍ਹਾਂ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਹ ਹੜਤਾਲੀ ਵਿਦਿਆਰਥੀਆਂ ਦੀ ਸਿਹਤ ਨੂੰ ਦੇਖਦਿਆਂ ਜਲਦੀ ਤੋਂ ਜਲਦੀ ਮੰਗਾਂ ਬਾਰੇ ਵਿਚਾਰ ਕਰੇ। ਦੂਜੇ ਪਾਸੇ ਪ੍ਰਦਰਸ਼ਨ ਦੀ ਅਗਵਾਈ ਕਰ ਰਹੇ ਜੇ ਪੀ ਐੱਸ ਸੀ-ਜੇ ਐੱਸ ਐੱਸ ਸੀ ਰਿਫਾਰਮਜ਼ ਮੰਚ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਖੱਬੇ ਪੱਖੀ ਵਿਦਿਆਰਥੀ ਸੰਗਠਨਾਂ ਦੇ ਮਾਰਚ ’ਚ ਹਿੱਸਾ ਨਹੀਂ ਲਿਆ। ਉਂਝ ਉਨ੍ਹਾਂ 10 ਅਗਸਤ ਨੂੰ ਵਿਧਾਨ ਸਭਾ ਘੇਰਨ ਦਾ ਪ੍ਰੋਗਰਾਮ ਉਲੀਕਿਆ ਹੈ। ਭੁੱਖ ਹੜਤਾਲ ’ਤੇ ਬੈਠੇ ਪ੍ਰਦਰਸ਼ਨਕਾਰੀ ਰਾਹੁਲ ਕ੍ਰਾਂਤੀ ਦੀ ਸਿਹਤ ਵਿਗੜਨ ਕਾਰਨ ਉਸ ਨੂੰ ਸ਼ੁੱਕਰਵਾਰ ਸਵੇਰੇ ਐਂਬੂਲੈਂਸ ਰਾਹੀਂ ਰਾਂਚੀ ਦੇ ਸਦਰ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ। -ਪੀਟੀਆਈ

ਪ੍ਰਦਰਸ਼ਨ ਦੌਰਾਨ ਆਈਸਾ ਪ੍ਰਧਾਨ ’ਤੇ ਸਿਆਹੀ ਸੁੱਟੀ

ਰਾਂਚੀ: ਪ੍ਰਦਰਸ਼ਨ ਦੌਰਾਨ ਆਈਸਾ ਪ੍ਰਧਾਨ ਨੇਹਾ ਬੋਰਾ ’ਤੇ ਇੱਕ ਵਿਅਕਤੀ ਨੇ ਸਿਆਹੀ ਸੁੱਟ ਦਿੱਤੀ। ਪੁਲੀਸ ਨੇ ਅਮਰਨਾਥ ਪਾਂਡੇ ਨਾਮ ਦੇ ਵਿਅਕਤੀ ਨੂੰ ਹਿਰਾਸਤ ਵਿੱਚ ਲਿਆ ਹੈ। ਨੇਹਾ ਨੇ ਕਿਹਾ ਕਿ ਉਹ ਸਿਆਹੀ ਸੁੱਟਣ ਨਾਲ ਡਰਨ ਵਾਲੀ ਨਹੀਂ ਕਿਉਂਕਿ ਉਹ ਪਹਿਲਾਂ ਵੀ ਦਿੱਲੀ ਪ੍ਰਦਰਸ਼ਨਾਂ ਦੌਰਾਨ ਲਾਠੀਚਾਰਜ ਦਾ ਸਾਹਮਣਾ ਕਰ ਚੁੱਕੀ ਹੈ। ਆਈਸਾ ਆਗੂ ਸ਼ਿਵਾਨੀ ਨੇ ਦੋਸ਼ ਲਾਇਆ ਕਿ ਨੇਹਾ ’ਤੇ ਸਿਆਹੀ ਸੁੱਟਣ ਵਾਲਾ ਵਿਅਕਤੀ ਭਾਜਪਾ ਸਮਰਥਕ ਗੁੰਡਾ ਹੈ। ਪਾਂਡੇ ਨੇ ਦੋਸ਼ ਲਾਇਆ ਕਿ ਨੇਹਾ ਬੋਰਾ, ਉਮਰ ਖਾਲਿਦ ਦੀ ਸਮਰਥਕ ਹੈ ਅਤੇ ਉਹ ‘ਦੇਸ਼ ਵਿਰੋਧੀ’ ਹੈ।