CRPF ਜਵਾਨਾਂ ਦੇ ਸਾਜ਼ੋ-ਸਾਮਾਨ ਲਈ ਵਿਸ਼ੇਸ਼ ਫੰਡ

ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਵਿੱਚੋਂ ਜ਼ਿਆਦਾਤਰ ਵਸਤਾਂ ਪਿਛਲੇ ਸਾਲ ਤੋਂ ਹੀ ਬੇਸ ਦੇ ਜਵਾਨਾਂ ਨੂੰ ਮੁਹੱਈਆ ਕਰਵਾਈਆਂ ਜਾ ਰਹੀਆਂ ਸਨ, ਪਰ ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਜੁਲਾਈ ਵਿੱਚ ਸੀ ਆਰ ਪੀ ਐੱਫ ਦੀ ਇੱਕ ਤਜਵੀਜ਼ ਨੂੰ ਇਨ੍ਹਾਂ ਵਸਤਾਂ ਦੀ ਖ਼ਰੀਦ ਲਈ ਪੂਰੀ ਮਨਜ਼ੂਰੀ ਦੇ ਦਿੱਤੀ ਹੈ, ਤਾਂ ਕਿ ਜਵਾਨ ਉੱਚੇ ਇਲਾਕਿਆਂ ਵਿੱਚ ਲੰਮੇ ਸਮੇਂ ਦੀ ਨਿਗਰਾਨੀ ਗਸ਼ਤ, ਬਚਾਅ ਅਤੇ ਅਤਿਵਾਦੀਆਂ ਵਿਰੁੱਧ ਲੜਾਈ ਲਈ ਬਿਹਤਰ ਢੰਗ ਨਾਲ ਲੈਸ ਹੋ ਸਕਣ। ਸਰੋਤਾਂ ਨੇ ਹੋਰ ਦੱਸਿਆ ਕਿ ਇਨ੍ਹਾਂ ਵਸਤਾਂ ਦੀ ਮਿਆਦ ਲਗਪਗ ਦੋ ਸਾਲ ਹੈ ਅਤੇ ਨਵੀਂ ਖ਼ਰੀਦ ਲਈ ਫੰਡਾਂ ਨੂੰ ਵਧਾਇਆ ਵੀ ਜਾ ਸਕਦਾ ਹੈ। 6,000 ਫੁੱਟ ਤੋਂ ਵੱਧ ਦੀ ਉਚਾਈ ’ਤੇ ਬਣਾਏ ਇਹ ਬੇਸ ਕੇਂਦਰੀ ਰਿਜ਼ਰਵ ਪੁਲੀਸ ਬਲ ਦੇ ਕਮਾਂਡੋਜ਼ ਲਈ ਤਲਾਸ਼ੀ ਅਤੇ ਹਮਲੇ ਦੀਆਂ ਕਾਰਵਾਈਆਂ ਚਲਾਉਣ ਲਈ ਅੱਡੇ ਹਨ, ਜਿੱਥੇ ਅਤਿਵਾਦੀ ‘ਢੋਕਾਂ’ (ਮਿੱਟੀ ਅਤੇ ਪੱਥਰਾਂ ਦੀਆਂ ਝੁੱਗੀਆਂ) ਵਿੱਚ ਲੁਕੇ ਹੁੰਦੇ ਹਨ। ਦੇਖਿਆ ਗਿਆ ਹੈ ਕਿ ਅਤਿਵਾਦੀ ਮੈਦਾਨੀ ਇਲਾਕਿਆਂ ਵਿੱਚ ਹਿੰਸਾ ਕਰਨ ਤੋਂ ਪਹਿਲਾਂ ਜਾਂ ਬਾਅਦ ਵਿੱਚ ਲੁਕਣ ਲਈ ਜੰਮੂ ਕਸ਼ਮੀਰ ਦੇ ਬਰਫ਼ ਨਾਲ ਢੱਕੇ ਅਤੇ ਪਹਾੜੀ ਖੇਤਰਾਂ ਦੀ ਵਰਤੋਂ ਕਰਦੇ ਸਨ ਅਤੇ ਇਸ ਲਈ ਹੁਣ ਸੀ ਆਰ ਪੀ ਐੱਫ ਤੇ ਫ਼ੌਜ ਦੇ ਜਵਾਨ ਇੱਥੇ ਤਾਇਨਾਤ ਹਨ।