SIR ਦਾ ਮਕਸਦ ਭਾਜਪਾ ਨੂੰ ਚੋਣਾਂ ਜਿਤਾਉਣ ਵਿੱਚ ਮਦਦ ਕਰਨਾ ਹੈ: ਸਿੱਬਲ

SIR Process: ਰਾਜ ਸਭਾ ਮੈਂਬਰ ਕਪਿਲ ਸਿੱਬਲ ਨੇ ਬੁੱਧਵਾਰ ਨੂੰ ਦੋਸ਼ ਲਾਇਆ ਕਿ ਚੋਣ ਕਮਿਸ਼ਨ ਵੱਲੋਂ ਕੀਤੀ ਜਾ ਰਹੀ ਐਸ.ਆਈ.ਆਰ. (SIR) ਇੱਕ ਅਜਿਹੀ ਕਵਾਇਦ ਹੈ ਜਿਸ ਦਾ ਮਕਸਦ ਭਾਜਪਾ ਨੂੰ ਚੋਣਾਂ ਜਿਤਾਉਣ ਵਿੱਚ ਮਦਦ ਕਰਨਾ ਹੈ ਅਤੇ ਉਨ੍ਹਾਂ ਸੁਪਰੀਮ ਕੋਰਟ ਨੂੰ ਅਪੀਲ ਕੀਤੀ ਕਿ ਉਹ ਇਸ ਤਹਿਤ ਹੋ ਰਹੀਆਂ ‘ਵੱਡੇ ਪੱਧਰ 'ਤੇ ਨਾਂ ਕੱਟਣ ਦੀਆਂ ਕਾਰਵਾਈਆਂ’ ਨੂੰ ਰੋਕੇ।

ਸਾਬਕਾ ਕੇਂਦਰੀ ਮੰਤਰੀ ਨੇ ਇਹ ਵੀ ਦੋਸ਼ ਲਾਇਆ ਕਿ ਵੱਖ-ਵੱਖ ਰਾਜਾਂ ਵਿੱਚ ਚੱਲ ਰਹੀ ਵੋਟਰ ਸੂਚੀਆਂ ਦੀ SIR ਦਾ ਮਕਸਦ ਭਾਜਪਾ ਨੂੰ ਚੋਣਾਂ ਜਿਤਾਉਣ ਵਿੱਚ ਮਦਦ ਕਰਨਾ ਹੈ।

ਸਿੱਬਲ ਦੀਆਂ ਇਹ ਟਿੱਪਣੀਆਂ 'ਦਿ ਇੰਡੀਅਨ ਐਕਸਪ੍ਰੈਸ' ਦੀ ਇੱਕ ਰਿਪੋਰਟ 'ਤੇ ਆਈਆਂ ਹਨ, ਜਿਸ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਝਾਰਖੰਡ ਦੇ ਗੋਡਾ ਜ਼ਿਲ੍ਹੇ ਵਿੱਚ, ਭਾਜਪਾ ਦੇ ਏਜੰਟ ਬੂਥ ਲਵਲ ਅਫ਼ਸਰਾਂ (BLO), ਜੋ ਕਿ ਜੇ.ਐੱਮ.ਐੱਮ.-ਕਾਂਗਰਸ ਦੀ ਅਗਵਾਈ ਵਾਲੀ ਸੂਬਾ ਸਰਕਾਰ ਦੇ ਮੁਲਾਜ਼ਮ ਹਨ, ਨਾਲ ਮਿਲ ਕੇ ਜ਼ਿਆਦਾ ਤਰ ਘੱਟ ਗਿਣਤੀ ਭਾਈਚਾਰੇ ਦੇ ਵੋਟਰਾਂ ਦੇ ਨਾਂ ਕਟਵਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਜਿਸ 'ਤੇ ਬੂਥ ਅਫ਼ਸਰਾਂ ਨੇ ਇਤਰਾਜ਼ ਵੀ ਜਤਾਏ ਹਨ।

'ਐਕਸ' (X) 'ਤੇ ਇੱਕ ਪੋਸਟ ਵਿੱਚ ਸਿੱਬਲ ਨੇ ਕਿਹਾ, "ਬਾਹਰ ਰੱਖਣ ਦੀ ਰਾਜਨੀਤੀ। ਭਾਜਪਾ ਏਜੰਟ: ਮੁਸਲਮਾਨਾਂ ਨੂੰ ਨਿਸ਼ਾਨਾ ਬਣਾਓ, ਵੱਡੇ ਪੱਧਰ 'ਤੇ ਨਾਂ ਕਟਵਾਓ। ਸੁਪਰੀਮ ਕੋਰਟ ਨੂੰ ਇਸ ਨੂੰ ਰੋਕਣ ਦੀ ਲੋੜ ਹੈ!"

ਆਜ਼ਾਦ ਰਾਜ ਸਭਾ ਮੈਂਬਰ ਨੇ ਕਿਹਾ, "ਐਸ.ਆਈ.ਆਰ. ਇੱਕ ਕਵਾਇਦ ਹੈ: ਵੋਟਰ ਸੂਚੀ ਵਿੱਚ ਹੇਰਾਫੇਰੀ ਕਰਨ ਲਈ। ਭਾਜਪਾ ਨੂੰ ਚੋਣਾਂ ਜਿਤਾਉਣ ਵਿੱਚ ਮਦਦ ਕਰਨ ਲਈ!"

ਬਾਅਦ ਵਿੱਚ ਇੱਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਸਿੱਬਲ ਨੇ ਕਿਹਾ ਕਿ ਝਾਰਖੰਡ ਵਿੱਚ ਭਾਜਪਾ ਵਰਕਰਾਂ ਵੱਲੋਂ ਫਾਰਮ 7 ਨਾਂ ਦੇ ਵੱਡੀ ਗਿਣਤੀ ਵਿੱਚ ਫਾਰਮ ਭਰੇ ਜਾ ਰਹੇ ਹਨ।

ਉਨ੍ਹਾਂ ਕਿਹਾ ਕਿ ਇੱਕ ਕੌਮੀ ਅਖ਼ਬਾਰ ਵਿੱਚ ਆਈ ਇਸ ਖ਼ਾਸ ਰਿਪੋਰਟ ਵਿੱਚ ਜਦੋਂ ਜਾਂਚ ਕੀਤੀ ਗਈ, ਤਾਂ ਪਤਾ ਲੱਗਾ ਕਿ ਜਿਨ੍ਹਾਂ ਨਾਵਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਸੀ, ਉਹ ਮੁਸਲਮਾਨ ਭਾਈਚਾਰੇ ਨਾਲ ਸਬੰਧਤ ਸਨ।

ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਲੋਕਾਂ ਦੀ ਇੰਟਰਵਿਊ ਲਈ ਗਈ ਹੈ ਅਤੇ ਉਨ੍ਹਾਂ ਨੇ ਕਿਹਾ ਹੈ ਕਿ ਉਹ ਉੱਥੇ ਸਾਲਾਂ ਤੋਂ ਰਹਿ ਰਹੇ ਹਨ, ਉਨ੍ਹਾਂ ਦੇ ਪਰਿਵਾਰ ਸਾਲਾਂ ਤੋਂ ਉੱਥੇ ਰਹਿ ਰਹੇ ਹਨ। ਤਾਂ ਜੇ ਇਸ ਤਰ੍ਹਾਂ ਕੰਮ ਕੀਤਾ ਜਾਣਾ ਹੈ, ਤਾਂ ਚੋਣ ਕਰਵਾਉਣ ਦਾ ਕੀ ਫ਼ਾਇਦਾ?

ਉਨ੍ਹਾਂ ਕਿਹਾ ਕਿ ਇਹ ਪਾਇਆ ਗਿਆ ਹੈ ਕਿ ਜਿਹੜੇ ਮੁਸਲਮਾਨਾਂ ਦੇ ਨਾਂ ਭਾਜਪਾ ਵਰਕਰਾਂ ਵੱਲੋਂ ਵੱਡੇ ਪੱਧਰ 'ਤੇ ਫਾਰਮ ਭਰ ਕੇ ਕਟਵਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ, ਉਹ ਅਸਲ ਵਿੱਚ ਉੱਥੇ ਸਾਲਾਂ ਤੋਂ ਰਹਿ ਰਹੇ ਹਨ, ਉਨ੍ਹਾਂ ਵਿੱਚੋਂ ਬਹੁਤ ਸਾਰੇ ਆਜ਼ਾਦੀ ਤੋਂ ਬਾਅਦ ਤੋਂ ਹੀ ਉੱਥੇ ਰਹਿ ਰਹੇ ਹਨ।

ਸਿੱਬਲ ਨੇ ਕਿਹਾ, "ਅਤੇ ਇਸ ਲਈ ਇਹ ਇੱਕ ਬਹੁਤ ਹੀ ਗੰਭੀਰ ਮਾਮਲਾ ਹੈ, ਅਤੇ ਜੇ ਅਦਾਲਤਾਂ ਇਸ ਮਾਮਲੇ ਵੱਲ ਧਿਆਨ ਨਹੀਂ ਦਿੰਦੀਆਂ, ਜੇ ਅਦਾਲਤਾਂ ਸਿਰਫ਼ ਇਹ ਮੰਨਦੀਆਂ ਹਨ ਕਿ ਐਸ.ਆਈ.ਆਰ. ਦੀ ਕਵਾਇਦ ਭਾਰਤ ਦੇ ਇੱਕ ਨਿਰਪੱਖ ਚੋਣ ਕਮਿਸ਼ਨ ਵੱਲੋਂ ਕੀਤੀ ਜਾ ਰਹੀ ਹੈ, ਤਾਂ ਮੈਨੂੰ ਲੱਗਦਾ ਹੈ ਕਿ ਅਸੀਂ ਡੂੰਘੀ ਮੁਸੀਬਤ ਵਿੱਚ ਹਾਂ - ਇਹ ਲੋਕਤੰਤਰ ਡੂੰਘੀ ਮੁਸੀਬਤ ਵਿੱਚ ਹੋਵੇਗਾ।"

ਉਨ੍ਹਾਂ ਕਿਹਾ, "ਉਦਾਹਰਣ ਵਜੋਂ ਦਿੱਲੀ ਵਿੱਚ ਹੀ, ਲਗਭਗ 45 ਲੱਖ ਤੋਂ 47 ਲੱਖ ਨਾਂ ਕੱਟ ਦਿੱਤੇ ਗਏ ਹਨ, ਡਿਲੀਟ ਕਰ ਦਿੱਤੇ ਗਏ ਹਨ। ਹੁਣ ਕਿੰਨੇ ਬਹਾਲ ਕੀਤੇ ਜਾਣਗੇ ਮੈਨੂੰ ਨਹੀਂ ਪਤਾ, ਪਰ ਇਹ ਦਿੱਲੀ ਦੇ ਪੂਰੇ ਵੋਟਰ ਵਰਗ, ਜੋ ਕਿ 1.5 ਕਰੋੜ ਹੈ, ਦਾ ਲਗਪਗ 23-24 ਫ਼ੀਸਦੀ ਬਣਦਾ ਹੈ।"

ਸਿੱਬਲ ਨੇ ਕਿਹਾ ਕਿ ਉੱਤਰ ਪ੍ਰਦੇਸ਼ ਵਿੱਚ 2.05 ਕਰੋੜ ਨਾਂ ਕੱਟੇ ਗਏ ਹਨ ਅਤੇ ਕਰੋੜਾਂ ਨਾਂ ਇਸ ਤਰ੍ਹਾਂ ਕੱਟੇ ਜਾ ਰਹੇ ਹਨ।

ਉਨ੍ਹਾਂ ਕਿਹਾ, "ਹੁਣ ਤੱਕ ਲਗਭਗ ਪੰਜ ਤੋਂ ਛੇ ਕਰੋੜ ਨਾਂ ਕੁੱਲ ਮਿਲਾ ਕੇ ਕੱਟੇ ਜਾ ਚੁੱਕੇ ਹਨ ਜਦੋਂ ਤੋਂ ਐਸ.ਆਈ.ਆਰ. ਦੀ ਇਹ ਪ੍ਰਕਿਰਿਆ ਸ਼ੁਰੂ ਹੋਈ ਹੈ। ਅਤੇ ਜਾਂਚ ਤੋਂ ਪਤਾ ਲੱਗਦਾ ਹੈ ਕਿ ਇਹ ਸਾਰੇ ਪ੍ਰੇਰਿਤ ਅਤੇ ਵੱਡੇ ਪੱਧਰ 'ਤੇ ਫਾਰਮ ਹਨ ਜੋ ਭਾਜਪਾ ਵਰਕਰਾਂ ਦੁਆਰਾਂ ਭਰੇ ਜਾ ਰਹੇ ਹਨ - ਜੋ ਕਿ ਸੋਸ਼ਲ ਮੀਡੀਆ ਰਾਹੀਂ ਸਬੂਤਾਂ ਅਤੇ ਰਾਸ਼ਟਰੀ ਅਖ਼ਬਾਰਾਂ ਦੋਵਾਂ ਦੁਆਰਾ ਸਾਬਤ ਹੋ ਚੁੱਕਾ ਹੈ। ਤਾਂ ਅਸੀਂ ਇੱਥੋਂ ਕਿੱਥੇ ਜਾਈਏ?" ਪੀ.ਟੀ.ਆਈ.