Repo Rate ਬਰਕਰਾਰ ਰਹਿਣ ਦੇ ਸੰਕੇਤ
ਕੇਂਦਰੀ ਬੈਂਕ ਨੇ ਰੁਪਏ ਦੀ ਗਿਰਾਵਟ ਨੂੰ ਚੰਗੀ ਤਰ੍ਹਾਂ ਸੰਭਾਲਿਆ: ਗੀਤਾ ਗੋਪੀਨਾਥ
ਆਈ ਐੱਮ ਐੱਫ ਦੀ ਸਾਬਕਾ ਡਿਪਟੀ ਮੈਨੇਜਿੰਗ ਡਾਇਰੈਕਟਰ ਗੀਤਾ ਗੋਪੀਨਾਥ ਨੇ ਕਿਹਾ ਹੈ ਕਿ ਰਿਜ਼ਰਵ ਬੈਂਕ ਦੇ ਵਿਆਜ਼ ਦਰਾਂ ਵਿੱਚ ਹਾਲ ਦੀ ਘੜੀ ਤਬਦੀਲ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਭਵਿੱਖ ਵਿੱਚ ਕੋਈ ਵੀ ਫੈਸਲਾ ਕਰਨ ਲਈ ਉਹ ਅੰਕੜਿਆਂ ’ਤੇ ਆਧਾਰਿਤ ਤਰੀਕਾ ਅਪਣਾ ਸਕਦਾ ਹੈ।
ਇਸ ਖ਼ਬਰ ਏਜੰਸੀ ਨਾਲ ਗੱਲਬਾਤ ਦੌਰਾਨ ਉਨ੍ਹਾਂ ਕਿਹਾ ਕਿ ਕੇਂਦਰੀ ਬੈਂਕ ਹਾਲ ਦੀ ਘੜੀ ਤੇਲ ਦੀਆਂ ਵਧ ਰਹੀਆਂ ਕੀਮਤਾਂ ਅਤੇ ਰੁਪਏ ਵਿੱਚ ਗਿਰਾਵਟ ਕਾਰਨ ਮਹਿੰਗਾਈ ਵਧਣ ਦੇ ਖਤਰਿਆਂ ਅਤੇ ਆਰਥਿਕ ਗਤੀਵਿਧੀਆਂ ਵਿੱਚ ਨਰਮੀ ਦੇ ਸੰਕੇਤਾਂ ਵਿਚਾਲੇ ਤਾਲਮੇਲ ਬਣਾ ਰਿਹਾ ਹੈ। ਉਨ੍ਹਾਂ ਨੂੰ ਉਮੀਦ ਹੈ ਕਿ ਰਿਜ਼ਰਵ ਬੈਂਕ ਹਾਲ ਦੀ ਘੜੀ ਕੋਈ ਤਬਦੀਲ ਨਹੀਂ ਕਰੇਗਾ ਪਰ ਭਵਿੱਖ ਦੇ ਹਾਲਾਤ ਅਤੇ ਮਹਿੰਗਾਈ ਅਨੁਸਾਰ ਉਹ ਕੋਈ ਕਦਮ ਚੁੱਕੇਗਾ। ਰੁਪਏ ਵਿੱਚ ਗਿਰਾਵਟ ਬਾਰੇ ਉਨ੍ਹਾਂ ਕਿਹਾ ਕਿ ਰਿਜ਼ਰਵ ਬੈਂਕ ਨੇ ਪੱਛਮੀ ਏਸ਼ੀਆ ਸੰਕਟ ਅਤੇ ਹਰਮੁਜ਼ ਜਲ ਮਾਰਗ ਬੰਦ ਹੋਣ ਕਾਰਨ ਰੁਪਏ ਨੂੰ ਚੰਗੀ ਤਰ੍ਹਾਂ ਸੰਭਾਲਿਆ ਹੈ। ਕੌਮਾਂਤਰੀ ਆਰਥਿਕ ਮਾਹੌਲ ਵਿੱਚ ਜਦੋਂ ਵੱਡੀ ਤਬਦੀਲੀ ਹੁੰਦੀ ਹੈ, ਉਦੋਂ ਕਰੰਸੀ ਦਾ ਅਨੁਕੂਲ ਹੋਣਾ ਕੁਦਰਤੀ ਹੈ।
ਮੁਦਰਾ ਨੀਤੀ ਸਮਿਤੀ ਦੀ ਮੀਟਿੰਗ ਸ਼ੁਰੂ
ਰਿਜ਼ਰਵ ਬੈਂਕ ਦੇ ਗਵਰਨਰ ਸੰਜੈ ਮਲਹੋਤਰਾ ਦੀ ਅਗਵਾਈ ਵਾਲੀ ਉੱਚ ਤਾਕਤੀ ਮੁਦਰਾ ਨੀਤੀ ਸਮਿਤੀ ਦੀ ਤਿੰਨ ਦਿਨਾਂ ਮੀਟਿੰਗ ਅੱਜ ਸ਼ੁਰੂ ਹੋਈ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਕੇਂਦਰੀ ਬੈਂਕ ਪੱਛਮੀ ਏਸ਼ੀਆ ਸੰਕਟ ਕਾਰਨ ਮਹਿੰਗਾਈ ਦੇ ਨਾਲ-ਨਾਲ ਆਰਥਿਕ ਵਿਕਾਸ ਸਬੰਧੀ ਚੁਣੌਤੀਆਂ ਕਾਰਨ ਰੈਪੋ ਰੇਟ 5.25 ਫ਼ੀਸਦੀ ’ਤੇ ਕਾਇਮ ਰੱਖ ਸਕਦਾ ਹੈ। ਤਿੰਨ ਦਿਨਾਂ ਦੇ ਵਿਚਾਰ ਵਟਾਂਦਰੇ ਮਗਰੋਂ ਛੇ ਮੈਂਬਰੀ ਕਮੇਟੀ ਵੱਲੋਂ 5 ਜੂਨ ਨੂੰ ਮੁਦਰਾ ਨੀਤੀ ਦਾ ਐਲਾਨ ਕੀਤਾ ਜਾਵੇਗਾ।
