ਸ਼ੱਟਡਾਊਨ: ਟਰੰਪ ਵੱਲੋਂ ਜਲਦੀ ਵੋਟ ਪਾਉਣ ਦੀ ਅਪੀਲ

ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਸੋਮਵਾਰ ਨੂੰ ਪ੍ਰਤੀਨਿਧ ਸਭਾ ਨੂੰ ਅੰਸ਼ਕ ਸਰਕਾਰੀ ਸ਼ੱਟਡਾਊਨ ਖ਼ਤਮ ਕਰਨ ਦੀ ਬੇਨਤੀ ਕੀਤੀ ਹੈ; ਹਾਲਾਂਕਿ ਅਜਿਹਾ ਲੱਗਦਾ ਹੈ ਕਿ ਨਾ ਤਾਂ ਰਿਪਬਲਿਕਨ ਅਤੇ ਨਾ ਹੀ ਡੈਮੋਕਰੈਟ ਉਸ ਫੈਡਰਲ ਫੰਡਿੰਗ ਪੈਕੇਜ ਨੂੰ ਤੁਰੰਤ ਮਨਜ਼ੂਰੀ ਦੇਣ ਲਈ ਤਿਆਰ ਹਨ ਜੋ ਉਨ੍ਹਾਂ ਨੇ ਸੈਨੇਟ ਨਾਲ ਮਿਲ ਕੇ ਤਿਆਰ ਕੀਤਾ ਸੀ। ਦੋਵੇਂ ਪੱਖ ਪਹਿਲਾਂ ਇਮੀਗ੍ਰੇਸ਼ਨ ਨੀਤੀਆਂ ਲਾਗੂ ਕਰਨ ਦੀਆਂ ਕਾਰਵਾਈਆਂ ’ਤੇ ਆਪਣੀਆਂ ਮੰਗਾਂ ਬਾਰੇ ਬਹਿਸ ਕਰਨਾ ਚਾਹੁੰਦੇ ਹਨ।

ਡੈਮੋਕਰੈਟ ਸਦਨ ਦੇ ਸਪੀਕਰ ਮਾਈਕ ਜੌਹਨਸਨ ਨੂੰ ਪੈਕੇਜ ਅੱਗੇ ਵਧਾਉਣ ਲਈ ਲੋੜੀਂਦੀਆਂ ਵੋਟਾਂ ਦੇਣ ਤੋਂ ਇਨਕਾਰ ਕਰ ਰਹੇ ਹਨ। ਉਹ ਮਿਨੀਪੋਲਿਸ ਵਿੱਚ ਦੋ ਅਮਰੀਕੀਆਂ ਦੀ ਗੋਲੀਬਾਰੀ ਵਿੱਚ ਹੋਈ ਮੌਤ ਤੋਂ ਬਾਅਦ ਟਰੰਪ ਪ੍ਰਸ਼ਾਸਨ ਦੀਆਂ ਦੇਸ਼ ’ਚੋਂ ਕੱਢਣ ਦੀਆਂ ਮੁਹਿੰਮਾਂ ’ਤੇ ਰੋਕ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਕਰ ਕੇ ਜੌਹਨਸਨ ਨੂੰ ਆਪਣੇ ਮਾਮੂਲੀ ਰਿਪਬਲਿਕਨ ਬਹੁਮਤ ’ਤੇ ਨਿਰਭਰ ਹੋਣਾ ਪੈ ਰਿਹਾ ਹੈ ਜਿਨ੍ਹਾਂ ਦੀਆਂ ਇਸ ਪੈਕੇਜ ਬਾਰੇ ਆਪਣੀਆਂ ਸ਼ਿਕਾਇਤਾਂ ਹਨ। ਵੋਟਿੰਗ ਅੱਜ ਤੋਂ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ ਜੋ ਅੰਸ਼ਕ ਸ਼ੱਟਡਾਊਨ ਦਾ ਚੌਥਾ ਦਿਨ ਹੋਵੇਗਾ।