ਸੁਰੱਖਿਆ ਬਲਾਂ ਨੂੰ 5 ਸਾਲਾਂ ਦੀ ਤਲਾਸ਼ ਬਾਅਦ ਵੱਡੀ ਸਫ਼ਲਤਾ; ਕਸ਼ਮੀਰ ਵਿੱਚ LeT ਦਾ ਮੁੱਖ ਕਮਾਂਡੋ ਢੇਰ
ਯੂਸਮਰਗ ਦੇ ਕੋਰਾਗ ਦੇ ਉੱਚੇ ਇਲਾਕੇ ਵਿੱਚ ਫ਼ੌਜ ਅਤੇ ਹੋਰ ਸੁਰੱਖਿਆ ਬਲਾਂ ਦੇ ਸਾਂਝੇ ਅਪਰੇਸ਼ਨ ਵਿੱਚ ਪਾਕਿਸਤਾਨੀ ਅਤਿਵਾਦੀ ਮੁਹੰਮਦ ਆਸਿਫ਼, ਉਰਫ਼ ਹਾਸ਼ਮ ਮੂਸਾ, ਜੋ ਕਿ ਉੱਚ-ਪੱਧਰੀ ਹਮਲਿਆਂ ਵਿੱਚ ਸ਼ਾਮਲ ਸੀ ਨੂੰ ਮਾਰ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਦੱਸਿਆ...
ਯੂਸਮਰਗ ਦੇ ਕੋਰਾਗ ਦੇ ਉੱਚੇ ਇਲਾਕੇ ਵਿੱਚ ਫ਼ੌਜ ਅਤੇ ਹੋਰ ਸੁਰੱਖਿਆ ਬਲਾਂ ਦੇ ਸਾਂਝੇ ਅਪਰੇਸ਼ਨ ਵਿੱਚ ਪਾਕਿਸਤਾਨੀ ਅਤਿਵਾਦੀ ਮੁਹੰਮਦ ਆਸਿਫ਼, ਉਰਫ਼ ਹਾਸ਼ਮ ਮੂਸਾ, ਜੋ ਕਿ ਉੱਚ-ਪੱਧਰੀ ਹਮਲਿਆਂ ਵਿੱਚ ਸ਼ਾਮਲ ਸੀ ਨੂੰ ਮਾਰ ਦਿੱਤਾ ਗਿਆ ਹੈ।
ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਕੇਂਦਰੀ ਕਸ਼ਮੀਰ ਦੇ ਬਡਗਾਮ ਜ਼ਿਲ੍ਹੇ ਦੇ ਉੱਚੇ ਪਹਾੜੀ ਇਲਾਕੇ ਵਿੱਚ ਮੰਗਲਵਾਰ ਨੂੰ ਇੱਕ ਮੁਕਾਬਲੇ ਵਿੱਚ ਮਾਰੇ ਗਏ ਪਾਬੰਦੀਸ਼ੁਦਾ ਲਸ਼ਕਰ-ਏ-ਤੋਇਬਾ ਦਾ ਇੱਕ ਚੋਟੀ ਦਾ ਅਤਿਵਾਦੀ ਪਾਕਿਸਤਾਨੀ ਫ਼ੌਜ ਦੇ ਕੁਲੀਨ ਸਪੈਸ਼ਲ ਸਰਵਿਸਿਜ਼ ਗਰੁੱਪ (SSG) ਦਾ ਸੇਵਾ-ਮੁਕਤ ਹਵਲਦਾਰ ਸੀ, ਜੋ ਕਦੇ ਪਾਕਿਸਤਾਨ ਦੇ ਸਾਬਕਾ ਰਾਸ਼ਟਰਪਤੀ ਪਰਵੇਜ਼ ਮੁਸ਼ਰਫ਼ ਦੀ ਸੁਰੱਖਿਆ ਕਾਫ਼ਲੇ ਵਿੱਚ ਵੀ ਰਿਹਾ ਸੀ।
ਇਹ ਸਿਲਸਿਲਾ 2023 ਦੇ ਸ਼ੁਰੂ ਵਿੱਚ ਪੀਰ ਪੰਜਾਲ ਰੇਂਜ ਵਿੱਚ ਸ਼ੁਰੂ ਹੋਇਆ ਸੀ ਅਤੇ ਅਪਰੈਲ 2025 ਦੀ ਪਹਿਲਗਾਮ ਘਟਨਾ ਨਾਲ ਸਮਾਪਤ ਹੋਇਆ, ਜਿਸ ਵਿੱਚ ਦੋਸ਼ੀ ਨੇ ਉਸ ਅਤਿਵਾਦੀ ਹਮਲੇ ਦੀ ਯੋਜਨਾ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ ਜਿਸ ਵਿੱਚ 26 ਲੋਕ ਮਾਰੇ ਗਏ ਸਨ।
ਆਸਿਫ਼, ਜੋ ਕਿ ਫੌਜੀ ਅਤੇ ਸੁਲੇਮਾਨ ਸ਼ਾਹ ਵਰਗੇ ਨਾਵਾਂ ਨਾਲ ਵੀ ਕੰਮ ਕਰਦਾ ਸੀ, 2021 ਵਿੱਚ ਜੰਮੂ-ਕਸ਼ਮੀਰ ਵਿੱਚ ਘੁਸਪੈਠ ਕਰਕੇ ਆਇਆ ਸੀ ਅਤੇ ਇਸ ਖੇਤਰ ਵਿੱਚ ਲਸ਼ਕਰ (LeT) ਦੇ ਮੁੱਖ ਅਪਰੇਸ਼ਨ ਕਮਾਂਡਰ ਵਜੋਂ ਸੇਵਾ ਨਿਭਾ ਰਿਹਾ ਸੀ। ਸੁਰੱਖਿਆ ਅਧਿਕਾਰੀਆਂ ਨੇ ਕਿਹਾ ਕਿ ਉਸਦੀ ਮੌਤ ਨੇ ਨਾ ਸਿਰਫ਼ ਪੰਜ ਸਾਲਾਂ ਦੀ ਡੂੰਘੀ ਭਾਲ ਨੂੰ ਖਤਮ ਕੀਤਾ ਹੈ ਬਲਕਿ ਇਸ ਖੇਤਰ ਵਿੱਚ ਪਾਕਿਸਤਾਨ ਆਧਾਰਿਤ ਅਤਿਵਾਦੀ ਸਮੂਹ ਨੂੰ ਲੀਡਰਹੀਣ ਵੀ ਕਰ ਦਿੱਤਾ ਹੈ।
ਪਾਕਿਸਤਾਨੀ ਫ਼ੌਜ ਵਿੱਚ ਆਪਣੇ 23 ਸਾਲਾਂ ਦੇ ਕਾਰਜਕਾਲ ਦੌਰਾਨ, ਆਸਿਫ਼ ਨੇ 18 ਸਾਲ ਐਸ.ਐਸ.ਜੀ. (SSG) ਵਿੱਚ ਬਿਤਾਏ। 2006 ਅਤੇ 2008 ਦੇ ਵਿਚਕਾਰ, ਉਸ ਨੂੰ ਪਾਕਿਸਤਾਨ ਦੇ ਤਤਕਾਲੀ ਰਾਸ਼ਟਰਪਤੀ ਪਰਵੇਜ਼ ਮੁਸ਼ਰਫ਼ ਦੀ ਸੁਰੱਖਿਆ ਟੁਕੜੀ ਵਿੱਚ ਤਾਇਨਾਤ ਕੀਤਾ ਗਿਆ ਸੀ। ਆਪਣੀ ਸੇਵਾ ਦੌਰਾਨ, ਉਸ ਨੇ ਸੰਯੁਕਤ ਰਾਜ ਅਮਰੀਕਾ ਵਿੱਚ ਵਿਸ਼ੇਸ਼ ਵੀ.ਵੀ.ਆਈ.ਪੀ. ਸੁਰੱਖਿਆ ਸਿਖਲਾਈ ਪ੍ਰਾਪਤ ਕੀਤੀ ਅਤੇ ਅਮਰੀਕੀ ਸਪੈਸ਼ਲ ਫੋਰਸਿਜ਼ ਨਾਲ ਮੈਡੀਕਲ ਕੋਰਸ ਪੂਰੇ ਕੀਤੇ।
ਫੌਜ ਤੋਂ ਸੇਵਾਮੁਕਤ ਹੋਣ ਤੋਂ ਬਾਅਦ, ਆਸਿਫ਼ (ਜਿਸ ਦਾ ਸਰਵਿਸ ਨੰਬਰ PA-3106947 ਸੀ) ਨੂੰ ਅਤਿਵਾਦੀ ਨੈੱਟਵਰਕਾਂ ਵੱਲੋਂ ਵਿਸ਼ੇਸ਼ ਤੌਰ 'ਤੇ ਚੁਣਿਆ ਗਿਆ ਸੀ; ਉਸਨੂੰ ਸ਼ੁਰੂ ਵਿੱਚ ਕਾਡਰਾਂ ਨੂੰ ਸਿਖਲਾਈ ਦੇਣ ਦਾ ਕੰਮ ਸੌਂਪਿਆ ਗਿਆ ਅਤੇ ਬਾਅਦ ਵਿੱਚ 'ਲਸ਼ਕਰ-ਏ-ਤੋਇਬਾ' (LeT) ਦੀਆਂ ਕਾਰਵਾਈਆਂ ਦੀ ਅਗਵਾਈ ਕਰਨ ਲਈ ਜੰਮੂ-ਕਸ਼ਮੀਰ ਵਿੱਚ ਭੇਜਿਆ ਗਿਆ।
ਮੰਗਲਵਾਰ ਦੇ ਅਪਰੇਸ਼ਨ ਬਾਰੇ ਫ਼ੌਜ ਦੀ ਚਿਨਾਰ ਕੋਰ ਨੇ ਕਿਹਾ ਕਿ ਚੌਕਸ ਜਵਾਨਾਂ ਨੇ ਇਲਾਕੇ ਵਿੱਚ ਸ਼ੱਕੀ ਗਤੀਵਿਧੀ ਦੇਖੀ ਅਤੇ ਚੁਣੌਤੀ ਦੇਣ 'ਤੇ ਅਤਿਵਾਦੀਆਂ ਨੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ, ਜਿਸ ਨਾਲ ਇੱਕ ਭਿਆਨਕ ਮੁਕਾਬਲਾ ਸ਼ੁਰੂ ਹੋ ਗਿਆ ਜਿਸ ਵਿੱਚ ਆਸਿਫ਼ ਮਾਰਿਆ ਗਿਆ।
ਫ਼ੌਜ ਨੇ ਅੱਜ ਸਵੇਰੇ 'ਐਕਸ' (X) 'ਤੇ ਪੋਸਟ ਕਰਦਿਆਂ ਕਿਹਾ, "ਜਾਰੀ ਆਪਰੇਸ਼ਨ ਦੇ ਤਹਿਤ, ਪਲਮੈਦਾਨ ਦੇ ਜਨਰਲ ਏਰੀਆ ਵਿੱਚ ਸਵੇਰੇ ਤਲਾਸ਼ੀ ਦੌਰਾਨ, ਜੰਗੀ ਸਮੱਗਰੀ ਸਮੇਤ ਪਾਕਿਸਤਾਨੀ ਅਧਾਰਤ ਲਸ਼ਕਰ ਅਤਿਵਾਦੀ, ਜਿਸ ਦੀ ਪਛਾਣ ਮੁਹੰਮਦ ਆਸਿਫ਼ ਉਰਫ਼ ਹਾਸ਼ਮ ਮੂਸਾ ਵਜੋਂ ਹੋਈ ਹੈ, ਦੀ ਲਾਸ਼ ਬਰਾਮਦ ਕਰ ਲਈ ਗਈ ਹੈ। ਅਪਰੇਸ਼ਨ ਜਾਰੀ ਹੈ।"
