'Return the Kohinoor': ਕਿੰਗ ਚਾਰਲਸ ਨੂੰ ਕੋਹਿਨੂਰ ਹੀਰਾ ਭਾਰਤ ਨੂੰ ਵਾਪਸ ਕਰਨ ਲਈ ਉਤਸ਼ਾਹਿਤ ਕਰਾਂਗਾ: ਮਮਦਾਨੀ

ਨਿਊਯਾਰਕ ਸਿਟੀ ਦੇ ਮੇਅਰ ਜ਼ੋਹਰਾਨ ਮਮਦਾਨੀ ਨੇ ਕਿਹਾ ਹੈ ਕਿ ਉਹ ਕਿੰਗ ਚਾਰਲਸ III ਨੂੰ ਕੋਹਿਨੂਰ ਹੀਰਾ ਵਾਪਸ ਕਰਨ ਲਈ ਉਤਸ਼ਾਹਿਤ ਕਰਨਗੇ। ਮਮਦਾਨੀ ਨੇ ਬੁੱਧਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਬ੍ਰਿਟਿਸ਼ ਮਹਾਰਾਜੇ ਨੂੰ ਮਿਲਣ ਤੋਂ ਪਹਿਲਾਂ ਕਿਹਾ, "ਜੇ ਮੈਂ...

PTI

ਨਿਊਯਾਰਕ, 10:47 AM Apr 30, 2026 IST

Photo: Reuters

ਨਿਊਯਾਰਕ ਸਿਟੀ ਦੇ ਮੇਅਰ ਜ਼ੋਹਰਾਨ ਮਮਦਾਨੀ ਨੇ ਕਿਹਾ ਹੈ ਕਿ ਉਹ ਕਿੰਗ ਚਾਰਲਸ III ਨੂੰ ਕੋਹਿਨੂਰ ਹੀਰਾ ਵਾਪਸ ਕਰਨ ਲਈ ਉਤਸ਼ਾਹਿਤ ਕਰਨਗੇ। ਮਮਦਾਨੀ ਨੇ ਬੁੱਧਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਬ੍ਰਿਟਿਸ਼ ਮਹਾਰਾਜੇ ਨੂੰ ਮਿਲਣ ਤੋਂ ਪਹਿਲਾਂ ਕਿਹਾ, "ਜੇ ਮੈਂ ਇਸ ਤੋਂ ਇਲਾਵਾ ਕਿੰਗ ਨਾਲ ਵੱਖਰੇ ਤੌਰ 'ਤੇ ਗੱਲ ਕਰਾਂਗਾ, ਤਾਂ ਮੈਂ ਸ਼ਾਇਦ ਉਨ੍ਹਾਂ ਨੂੰ ਕੋਹਿਨੂਰ ਹੀਰਾ ਵਾਪਸ ਕਰਨ ਲਈ ਉਤਸ਼ਾਹਿਤ ਕਰਾਂਗਾ।"

ਮਮਦਾਨੀ ਨੂੰ ਪੁੱਛਿਆ ਗਿਆ ਸੀ ਕਿ ਉਹ ਕਿੰਗ ਨੂੰ ਕੀ ਕਹਿਣਗੇ, ਜੋ ਆਪਣੇ ਅਮਰੀਕਾ ਦੇ ਸਰਕਾਰੀ ਦੌਰੇ ਦੇ ਦੂਜੇ ਦਿਨ ਨਿਊਯਾਰਕ ਸਿਟੀ ਪਹੁੰਚੇ ਸਨ। ਕਿੰਗ ਚਾਰਲਸ ਨੇ ਮੰਗਲਵਾਰ ਨੂੰ ਅਮਰੀਕੀ ਕਾਂਗਰਸ ਦੀ ਸਾਂਝੀ ਮੀਟਿੰਗ ਨੂੰ ਸੰਬੋਧਨ ਕੀਤਾ, ਜਦੋਂ ਕਿ ਉਨ੍ਹਾਂ ਅਤੇ ਰਾਣੀ ਕੈਮਿਲਾ ਨੂੰ ਵ੍ਹਾਈਟ ਹਾਊਸ ਵਿੱਚ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਫਸਟ ਲੇਡੀ ਮੇਲਾਨੀਆ ਟਰੰਪ ਵੱਲੋਂ ਆਯੋਜਿਤ ਇੱਕ ਸਰਕਾਰੀ ਰਾਤ ਦੇ ਭੋਜਨ ਵਿੱਚ ਸਨਮਾਨਿਤ ਕੀਤਾ ਗਿਆ ਸੀ।

ਕਿੰਗ ਚਾਰਲਸ ਅਤੇ ਰਾਣੀ ਕੈਮਿਲਾ ਨੇ ਸ਼ਹਿਰ ਵਿੱਚ 9/11 ਮੈਮੋਰੀਅਲ ਦਾ ਦੌਰਾ ਕੀਤਾ ਅਤੇ ਅਤਿਵਾਦੀ ਹਮਲੇ ਦੇ ਪੀੜਤਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਉਨ੍ਹਾਂ ਨੇ 'ਹਾਰਲੇਮ ਗ੍ਰੋਨ' (Harlem Grown) ਦਾ ਵੀ ਦੌਰਾ ਕੀਤਾ, ਜੋ ਉੱਪਰੀ ਮੈਨਹਟਨ ਵਿੱਚ ਬੱਚਿਆਂ ਅਤੇ ਪਰਿਵਾਰਾਂ ਦੀ ਸਹਾਇਤਾ ਕਰਨ ਵਾਲੇ ਸ਼ਹਿਰੀ ਫਾਰਮਾਂ ਦਾ ਇੱਕ ਨੈੱਟਵਰਕ ਹੈ। ਮਾਮਦਾਨੀ ਨੇ 9/11 ਮੈਮੋਰੀਅਲ ਵਿਖੇ ਕਿੰਗ ਚਾਰਲਸ ਨਾਲ ਮੁਲਾਕਾਤ ਕੀਤੀ।

ਜ਼ਿਕਰਯੋਗ ਹੈ ਕਿ 105.6 ਕੈਰੇਟ ਦਾ ਕੋਹਿਨੂਰ ਹੀਰਾ 1849 ਵਿੱਚ ਮਹਾਰਾਜਾ ਦਲੀਪ ਸਿੰਘ ਵੱਲੋਂ ਰਾਣੀ ਵਿਕਟੋਰੀਆ ਨੂੰ ਦਿੱਤਾ ਗਿਆ ਸੀ। ਇਸ ਨੂੰ 1937 ਵਿੱਚ ਰਾਜਮਾਤਾ (ਕੁਈਨ ਮਦਰ) ਨੇ ਆਪਣੇ ਤਾਜ 'ਤੇ ਪਹਿਨਿਆ ਸੀ। ਭਾਰਤ ਨੇ ਸੰਕੇਤ ਦਿੱਤਾ ਹੈ ਕਿ ਉਹ ਯੂਨਾਈਟਿਡ ਕਿੰਗਡਮ ਤੋਂ ਕੋਹਿਨੂਰ ਨੂੰ ਵਾਪਸ ਲਿਆਉਣ ਦੇ ਤਰੀਕਿਆਂ ਦੀ ਤਲਾਸ਼ ਜਾਰੀ ਰੱਖੇਗਾ।

ਦੇਸ਼ ਸਮੇਂ-ਸਮੇਂ 'ਤੇ ਬ੍ਰਿਟੇਨ ਸਰਕਾਰ ਕੋਲ ਇਹ ਮੁੱਦਾ ਉਠਾਉਂਦਾ ਰਿਹਾ ਹੈ ਅਤੇ ਕਿਹਾ ਹੈ ਕਿ ਉਹ ਇਸ ਮਾਮਲੇ ਦੇ "ਤਸੱਲੀਬਖਸ਼ ਹੱਲ" ਲਈ ਰਾਹ ਅਤੇ ਸਾਧਨ ਲੱਭਣਾ ਜਾਰੀ ਰੱਖੇਗਾ। ਕੋਹਿਨੂਰ ਹੀਰਾ ਇਸ ਸਮੇਂ ਟਾਵਰ ਆਫ ਲੰਡਨ ਵਿੱਚ ਪ੍ਰਦਰਸ਼ਿਤ ਹੈ। 'ਹਿਸਟੋਰਿਕ ਰਾਇਲ ਪੈਲੇਸ' ਚੈਰਿਟੀ ਦੇ ਅਨੁਸਾਰ ਰਾਣੀ ਐਲਿਜ਼ਾਬੈਥ (ਰਾਜਮਾਤਾ) ਦੇ ਤਾਜ ਵਿੱਚ ਜੜੇ ਇਸ ਹੀਰੇ ਦੇ "ਮੁਗਲ ਸਮਰਾਟ, ਇਰਾਨ ਦੇ ਸ਼ਾਹ, ਅਫਗਾਨਿਸਤਾਨ ਦੇ ਅਮੀਰਾਂ ਅਤੇ ਸਿੱਖ ਮਹਾਰਾਜਿਆਂ ਸਮੇਤ ਕਈ ਪੁਰਾਣੇ ਮਾਲਕ" ਰਹੇ ਹਨ।

Tags :