Rajasthan Hospital Deaths: ਸਰਕਾਰੀ ਹਸਪਤਾਲਾਂ ’ਚ ਅੱਠ ਔਰਤਾਂ ਅਤੇ ਨਾਬਾਲਗ ਦੀ ਮੌਤ
ਹਸਪਤਾਲ ਦੇ ਪ੍ਰਬੰਧਾਂ ’ਤੇ ਸਵਾਲ ਉੱਠੇ
ਇੱਥੇ ਭੀਲਵਾੜਾ ਅਤੇ ਬੰਸਵਾੜਾ ਜ਼ਿਲ੍ਹਿਆਂ ਦੇ ਦੋ ਸਰਕਾਰੀ ਹਸਪਤਾਲਾਂ ਦੇ ਜ਼ੱਚਾ ਬੱਚਾ ਅਤੇ ਗਾਇਨੀ ਵਿਭਾਗਾਂ ’ਚ ਪਿਛਲੇ ਹਫ਼ਤੇ ਦੌਰਾਨ ਹੋਏ ਅਪਰੇਸ਼ਨਾਂ ਦੌਰਾਨ ਅੱਠ ਔਰਤਾਂ ਤੇ ਇੱਕ ਨਾਬਾਲਗ ਦੀ ਮੌਤ ਹੋ ਗਈ ਹੈ।
ਇਨ੍ਹਾਂ ਘਟਨਾਵਾਂ ਤੋਂ ਜਿੱਥੇ ਇਨ੍ਹਾਂ ਹਸਪਤਾਲਾਂ ’ਚ ਮਾਵਾਂ ਦੀ ਸਿਹਤ ਸੰਭਾਲ ਅਤੇ ਹਸਪਤਾਲ ਦੇ ਪ੍ਰਬੰਧਾਂ ’ਤੇ ਸਵਾਲ ਉੱਠੇ ਹਨ, ਉੱਥੇ ਹੀ ਸੂਬਾ ਸਰਕਾਰ ਨੇ ਮਾਹਿਰ ਟੀਮਾਂ ਨੂੰ ਇਨ੍ਹਾਂ ਮਾਮਲਿਆਂ ਦੀ ਜਾਂਚ ਸੌਂਪੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਇਨ੍ਹਾਂ ਘਟਨਾਵਾਂ ਦੇ ਕਾਰਨਾਂ ਦਾ ਪਤਾ ਲਾਉਣ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਭੀਲਵਾੜਾ ਦੇ ਮਹਾਤਮਾ ਗਾਂਧੀ ਹਸਪਤਾਲ ਵਿੱਚ ਪੰਜ ਮੌਤਾਂ ਹੋਈਆਂ ਹਨ।
ਇਸ ਦੇ ਸੁਪਰਡੈਂਟ ਅਰੁਣ ਗੌੜ ਨੇ ਕਿਹਾ ਕਿ ਇੰਫੈਕਸ਼ਨ ਕੰਟਰੋਲ ਲਈ ਉਪਾਵਾਂ ਦੀ ਪਾਲਣਾ ਕੀਤੀ ਜਾ ਰਹੀ ਹੈ ਅਤੇ ਜਾਂਚ ਜਾਰੀ ਹੈ। ਓ ਟੀ ਤਿੰਨ ਦਿਨਾਂ ਤੋਂ ਬੰਦ ਹੈ। ਬੰਸਵਾੜਾ ਵਿੱਚ 7 ਤੋਂ 10 ਜੁਲਾਈ ਵਿਚਕਾਰ ਤਿੰਨ ਔਰਤਾਂ ਅਤੇ ਇੱਕ ਨਾਬਾਲਗ ਦੀ ਮੌਤ ਹੋ ਗਈ ਹੈ, ਜਿੱਥੇ ਮਾਹਿਰਾਂ ਦੀ ਟੀਮ ਕਾਰਨਾਂ ਦੀ ਜਾਂਚ ’ਚ ਜੁਟ ਗਈ ਹੈ।
ਰਾਜਸਥਾਨ ਦੇ ਮੈਡੀਕਲ ਅਤੇ ਸਿਹਤ ਮੰਤਰੀ ਗਜੇਂਦਰ ਸਿੰਘ ਖੀਮਸਰ ਨੇ ਕਿਹਾ ਕਿ ਸਰਕਾਰ ਵੱਲੋਂ ਕਾਫ਼ੀ ਗੰਭੀਰਤਾ ਨਾਲ ਘਟਨਾਵਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਮਾਹਿਰਾਂ ਦੀ ਟੀਮ ਵੱਲੋਂ ਜਾਂਚ ਜਾਰੀ ਹੈ। ਉਨ੍ਹਾਂ ਕਿਹਾ ਕਿ ਭੀਲਵਾੜਾ ਹਸਪਤਾਲ ਸਬੰਧੀ ਮੁੱਢਲੀ ਰਿਪੋਰਟ ਮੁਤਾਬਕ ਇਹ ਮੌਤਾਂ ਵੱਖ-ਵੱਖ ਮੈਡੀਕਲ ਦਿੱਕਤਾਂ ਕਾਰਨ ਹੋਈਆਂ ਹਨ।
