Pulwama Attack ਦਾ ਮੁੱਖ ਸਾਜ਼ਿਸ਼ਘਾੜਾ Arjumand Gulzar Alias Burhan Hamza ਹਲਾਕ

ਇਸ ਹਮਲੇ ਵਿੱਚ ਉਹ ਗੰਭੀਰ ਜ਼ਖਮੀ ਹੋ ਗਿਆ ਸੀ, ਜਿਸ ਮਗਰੋਂ ਉਸ ਨੂੰ ਹੈਲੀਕਾਪਟਰ ਰਾਹੀਂ ਰਾਵਲਪਿੰਡੀ ਦੇ ਕੰਬਾਈਂਡ ਮਿਲਟਰੀ ਹਸਪਤਾਲ (ਸੀ ਐੱਮ ਐੱਚ) ਲਿਜਾਇਆ ਗਿਆ, ਜਿੱਥੇ ਉਸ ਨੇ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਿਆਂ ਦਮ ਤੋੜ ਦਿੱਤਾ। ਉਨ੍ਹਾਂ ਅੱਗੇ ਦੱਸਿਆ ਕਿ ਸਥਾਨਕ ਸੁਰੱਖਿਆ ਬਲਾਂ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਹਮਲਾਵਰ ਮੌਕੇ ਤੋਂ ਫ਼ਰਾਰ ਹੋਣ ਵਿੱਚ ਕਾਮਯਾਬ ਹੋ ਗਏ।

ਮੂਲ ਰੂਪ ਤੋਂ ਜੰਮੂ ਕਸ਼ਮੀਰ ਦੇ ਪੁਲਵਾਮਾ ਜ਼ਿਲ੍ਹੇ ਦੇ ਖਾਰ ਦਾ ਰਹਿਣ ਵਾਲਾ ਹਮਜ਼ਾ ਕਿਸੇ ਸਮੇਂ ‘ਅਲ ਬਦਰ’ ਅਤਿਵਾਦੀ ਜਥੇਬੰਦੀ ਨਾਲ ਜੁੜਿਆ ਹੋਇਆ ਸੀ। ਬਾਅਦ ਵਿੱਚ ਉਹ ‘ਅਲ ਬਰਾਕ’ ਚਲਾ ਗਿਆ ਅਤੇ ਉਸ ਜਥੇਬੰਦੀ ਵਿੱਚੋਂ ਵਿਵਾਦਤ ਤਰੀਕੇ ਨਾਲ ਬਾਹਰ ਨਿਕਲਣ ਤੋਂ ਬਾਅਦ ਉਸ ਨੇ ਪਾਕਿਸਤਾਨ ਦੀ ਖੁਫ਼ੀਆ ਏਜੰਸੀ ਆਈ ਐੱਸ ਆਈ ਨਾਲ ਨਜ਼ਦੀਕੀ ਸਬੰਧ ਬਣਾਏ ਹੋਏ ਸਨ।

ਹਮਜ਼ਾ ਨੂੰ 14 ਫਰਵਰੀ 2019 ਨੂੰ ਪੁਲਵਾਮਾ ਵਿੱਚ ਸੀ ਆਰ ਪੀ ਐੱਫ ਦੇ ਕਾਫ਼ਲੇ ’ਤੇ ਹੋਏ ਫ਼ਿਦਾਈਨ ਹਮਲੇ ਦੀ ਸਾਜ਼ਿਸ਼ ਵਿੱਚ ਸ਼ਾਮਲ ਹੋਣ ਕਾਰਨ ਗ਼ੈਰ-ਕਾਨੂੰਨੀ ਗਤੀਵਿਧੀਆਂ (ਰੋਕੂ) ਐਕਟ ਤਹਿਤ ਅਤਿਵਾਦੀ ਐਲਾਨਿਆ ਗਿਆ ਸੀ। ਪਾਕਿਸਤਾਨ ਸਥਿਤ ਅਤਿਵਾਦੀ ਜਥੇਬੰਦੀ ਜੈਸ਼-ਏ-ਮੁਹੰਮਦ ਵੱਲੋਂ ਕੀਤੇ ਗਏ ਉਸ ਹਮਲੇ ਵਿੱਚ ਭਾਰਤ ਦੇ 40 ਜਵਾਨ ਸ਼ਹੀਦ ਹੋ ਗਏ ਸਨ। ਉਹ ਫਾਰੂਕ ਕੁਰੈਸ਼ੀ ਦੇ ਬਹੁਤ ਨਜ਼ਦੀਕ ਹੋ ਕੇ ਕੰਮ ਕਰਦਾ ਸੀ, ਜੋ ਕਿ ‘ਅਲ ਬਰਾਕ’ ਦਾ ਸਾਬਕਾ ਕਮਾਂਡਰ ਹੈ। ਕੁਰੈਸ਼ੀ ਦਾ ਨਾਮ ਕਸ਼ਮੀਰ ਵਾਦੀ ਵਿੱਚ ਨਸ਼ਾ ਤਸਕਰੀ, ਜਾਅਲੀ ਕਰੰਸੀ ਦੇ ਰੈਕੇਟ, ਹਥਿਆਰਾਂ ਦੀ ਤਸਕਰੀ ਅਤੇ ਸਰਹੱਦ ਪਾਰ ਤੋਂ ਚੱਲਣ ਵਾਲੀਆਂ ਅਤਿਵਾਦੀ ਗਤੀਵਿਧੀਆਂ ਨਾਲ ਸਬੰਧਤ ਦਸਤਾਵੇਜ਼ਾਂ ਵਿੱਚ ਵਾਰ-ਵਾਰ ਸਾਹਮਣੇ ਆਉਂਦਾ ਰਿਹਾ ਹੈ।

ਮੁਜ਼ੱਫ਼ਰਾਬਾਦ ਦੇ ਬਾਹਰਵਾਰ ਚੀਲਾ ਬਾਂਦੀ ’ਚ ਰਹਿੰਦਾ ਸੀ ਹਮਜ਼ਾ

ਸੂਤਰਾਂ ਅਨੁਸਾਰ ਹਮਜ਼ਾ ਉਰਫ਼ ਡਾਕਟਰ ਮੌਜੂਦਾ ਸਮੇਂ ਮਕਬੂਜ਼ਾ ਕਸ਼ਮੀਰ ਦੀ ਰਾਜਧਾਨੀ ਮੁਜ਼ੱਫ਼ਰਾਬਾਦ ਦੇ ਬਾਹਰਵਾਰ ਇੱਕ ਸੰਘਣੀ ਆਬਾਦੀ ਵਾਲੇ ਇਲਾਕੇ ਚੀਲਾ ਬਾਂਦੀ ਵਿੱਚ ਰਹਿ ਰਿਹਾ ਸੀ। ਉਸ ਕੋਲ ਅੱਠ ਕਮਾਂਡੋਜ਼ ਦੀ ਸੁਰੱਖਿਆ, ਬੁਲੇਟ ਪਰੂਫ਼ ਗੱਡੀ ਅਤੇ ਪਾਇਲਟ ਗੱਡੀ ਸੀ, ਜੋ ਉਸ ਨੂੰ ਮਿਲੀ ਸਰਕਾਰੀ ਪੱਧਰ ਦੀ ਸੁਰੱਖਿਆ ਅਤੇ ਉਸ ਦੀ ਜਥੇਬੰਦਕ ਅਹਿਮੀਅਤ ਨੂੰ ਦਰਸਾਉਂਦੀ ਹੈ। ਇਹ ਸੁਰੱਖਿਆ ਘੇਰਾ ਉਸ ਨੂੰ ਉਦੋਂ ਦਿੱਤਾ ਗਿਆ ਸੀ ਜਦੋਂ ਉਸ ਨੇ ਕਥਿਤ ਤੌਰ ’ਤੇ ਜਨਵਰੀ ਅਤੇ ਫਰਵਰੀ 2025 ਵਿਚਕਾਰ ਕਿਸੇ ਸਮੇਂ ਖ਼ੁਦ ’ਤੇ ਫ਼ਰਜ਼ੀ ਹਮਲਾ ਕਰਵਾਇਆ ਸੀ।