PDP ਮੁਖੀ Mehbooba Mufti ਨੇ ਜੰਤਰ ਮੰਤਰ ਵਾਲੇ ਵਿਵਾਦਤ ਬਿਆਨ ’ਤੇ ਮੰਗੀ ਮੁਆਫ਼ੀ
ਪੀ ਡੀ ਪੀ ਆਗੂ ਨੇ ਪੈਲੇਟ ਗੰਨਾਂ ਸਬੰਧੀ ਬਿਆਨ ਲਈ ਮੁਆਫ਼ੀ ਮੰਗੀ
ਪੀਪਲਜ਼ ਡੈਮੋਕਰੈਟਿਕ ਪਾਰਟੀ (ਪੀ ਡੀ ਪੀ) ਮੁਖੀ ਮਹਿਬੂਬਾ ਮੁਫ਼ਤੀ ਨੇ ਜੰਤਰ ਮੰਤਰ ’ਤੇ ਦਿੱਤੇ ਆਪਣੇ ਉਸ ਬਿਆਨ ਲਈ ਮੁਆਫ਼ੀ ਮੰਗੀ ਹੈ ਜੋ ਕਸ਼ਮੀਰੀਆਂ ਵਿਰੁੱਧ ਤਾਕਤ ਦੀ ਵਰਤੋਂ ਨੂੰ ਜਾਇਜ਼ ਠਹਿਰਾਉਂਦਾ ਪ੍ਰਤੀਤ ਹੁੰਦਾ ਸੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦਾ ਮਤਲਬ ਸੀ ਕਿ ਵਾਦੀ ਵਿੱਚ ਅਤਿਵਾਦ ਕਰ ਕੇ ਸੁਰੱਖਿਆ ਬਲਾਂ ਕੋਲ ‘ਬਹਾਨਾ’ ਹੁੰਦਾ ਹੈ।
ਮੁਫ਼ਤੀ ਨੇ ਪਾਰਟੀ ਦੇ 27ਵੇਂ ਸਥਾਪਨਾ ਦਿਹਾੜੇ ਮੌਕੇ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਿਹਾ, ‘‘ਜੇ ਟਿੱਪਣੀਆਂ ਨਾਲ ਕਿਸੇ ਨੂੰ ਸੱਟ ਪੁੱਜੀ ਹੋਵੇ, ਤਾਂ ਮੈਂ ਮੁਆਫ਼ੀ ਮੰਗਦੀ ਹਾਂ।’’ ਕਾਬਿਲੇਗੌਰ ਹੈ ਕਿ ਮਹਿਬੂਬਾ ਕਥਿਤ ਪ੍ਰੀਖਿਆ ਬੇਨਿਯਮੀਆਂ ਖਿਲਾਫ਼ ਕੌਕਰੋਚ ਜਨਤਾ ਪਾਰਟੀ ਦੀ ਅਗਵਾਈ ਵਿੱਚ ਚੱਲ ਰਹੇ ਪ੍ਰਦਰਸ਼ਨਾਂ ਦੀ ਹਮਾਇਤ ਲਈ 23 ਜੁਲਾਈ ਨੂੰ ਜੰਤਰ ਮੰਤਰ ਗਈ ਸੀ। ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ਖਿਲਾਫ਼ ਪੁਲੀਸ ਕਾਰਵਾਈ ਦਾ ਵਿਰੋਧ ਕਰਦਿਆਂ ਪੀ ਡੀ ਪੀ ਮੁਖੀ ਪਿਛਲੇ ਸਮੇਂ ਵਿੱਚ ਘਾਟੀ ਵਿੱਚ ਪੈਲੇਟ ਗੰਨ ਦੀ ਵਰਤੋਂ ਦਾ ਬਚਾਅ ਕਰਦੀ ਦਿਖਾਈ ਦਿੱਤੀ, ਜਿਸ ਕਰ ਕੇ ਉਸ ਨੂੰ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ।
ਜੰਮੂ ਕਸ਼ਮੀਰ ਦੀ ਸਾਬਕਾ ਮੁੱਖ ਮੰਤਰੀ ਨੇ ਸਪਸ਼ਟ ਕੀਤਾ ਕਿ ਉਹ ਕਹਿਣਾ ਚਾਹੁੰਦੀ ਸੀ ਕਿ ‘ਬਹਾਨਾ ਬਨਤਾ ਹੈ’... ਭਾਵ ਘਾਟੀ ਵਿੱਚ ਅਤਿਵਾਦ ਹੋਣ ਕਰ ਕੇ ਸੁਰੱਖਿਆ ਬਲਾਂ ਨੂੰ ਕਸ਼ਮੀਰੀਆਂ ਖਿਲਾਫ਼ ਤਾਕਤ ਦੀ ਵਰਤੋਂ ਕਰਨ ਦਾ ਬਹਾਨਾ ਮਿਲ ਜਾਂਦਾ ਹੈ, ਪਰ ‘ਬਹੁਤ ਸਾਰੇ ਲੋਕਾਂ ਨਾਲ ਗੱਲ ਕਰਨ’ ਦੌਰਾਨ ਉਨ੍ਹਾਂ ਦੇ ਮੂੰਹ ’ਚੋਂ ਕੁਝ ਹੋਰ ਨਿਕਲ ਗਿਆ। ਮਹਿਬੂਬਾ ਨੇ ਕਿਹਾ ਕਿ ਉਨ੍ਹਾਂ ਦੀਆਂ ਟਿੱਪਣੀਆਂ ਵਾਲਾ ਵੀਡੀਓ ਫ਼ਰਜ਼ੀ ਜਾਂ ਏ ਆਈ ਦਾ ਬਣਿਆ ਨਹੀਂ ਬਲਕਿ ਅਸਲੀ ਸੀ। ਉਨ੍ਹਾਂ ਕਿਹਾ ਕਿ ਉਸ ਦੀਆਂ ਟਿੱਪਣੀਆਂ ਨੂੰ ਬਿਲਕੁਲ ਵੱਖਰਾ ਮਤਲਬ ਦਿੱਤਾ ਗਿਆ ਤੇ ਉਨ੍ਹਾਂ ਲੋਕਾਂ ਤੋਂ ਇਸ ਲਈ ਮੁਆਫ਼ੀ ਮੰਗੀ।
ਇਸ ਦੌਰਾਨ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਕਿਹਾ ਕਿ ਅਫ਼ਸੋਸ ਜਤਾਉਣ ਤੇ ਮੁਆਫ਼ੀ ਮੰਗਣ ਵਿੱਚ ਫ਼ਰਕ ਹੈ। ਉਨ੍ਹਾਂ ਕਿਹਾ, ‘‘ਕੀ ਉਸ ਨੇ ਮੁਆਫ਼ੀ ਮੰਗੀ? ਕੀ ਉਸ ਨੇ ਮੁਆਫ਼ੀ ਸ਼ਬਦ ਵਰਤਿਆ? ਅਫਸੋਸ ਤੇ ਮੁਆਫ਼ੀ ਵਿੱਚ ਫ਼ਰਕ ਹੁੰਦਾ ਹੈ।’’
