ਨਵੀਂ ਦਿੱਲੀ, 22 ਜੂਨ
ਤ੍ਰਿਣਮੂਲ ਕਾਂਗਰਸ, ਸਮਾਜਵਾਦੀ ਪਾਰਟੀ, ਆਮ ਆਦਮੀ ਪਾਰਟੀ ਤੇ ਰਾਸ਼ਟਰੀ ਲੋਕ ਦਲ ਸਣੇ ਹੋਰਨਾਂ ਵਿਰੋਧੀ ਦਲਾਂ ਤੇ ਖੱਬੇ ਪੱਖੀ ਆਗੂਆਂ ਨੇ ਅੱਜ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਐੱਨਸੀਪੀ) ਦੇ ਮੁਖੀ ਸ਼ਰਦ ਪਵਾਰ ਦੀ ਰਿਹਾਇਸ਼ ’ਤੇ ਸੱਤਾਧਾਰੀ ਭਾਜਪਾ ਖ਼ਿਲਾਫ਼ ਤੀਜਾ ਫਰੰਟ ਬਣਾਉਣ ਸਬੰਧੀ ਮੀਟਿੰਗ ਕੀਤੀ। ਇਸ ਮੀਟਿੰਗ ’ਚ ਟੀਐੱਮਸੀ ਆਗੂ ਯਸ਼ਵੰਤ ਸਿਨਹਾ, ਐੱਸਪੀ ਦੇ ਘਣਸ਼ਿਆਮ ਤਿਵਾੜੀ, ਆਰਜੇਡੀ ਦੇ ਪ੍ਰਧਾਨ ਜਯੰਤ ਚੌਧਰੀ, ‘ਆਪ’ ਦੇ ਸੁਸ਼ੀਲ ਗੁਪਤਾ, ਸੀਪੀਆਈ ਦੇ ਬਿਨੋਏ ਤੇ ਸੀਪੀਆਈਐੱਮ ਦੇ ਨੀਲੋਤਪਾਲ ਬਾਸੂ ਤੋਂ ਇਲਾਵਾ ਨੈਸ਼ਨਲ ਕਾਨਫਰੰਸ ਦੇ ਆਗੂ ਫਾਰੁਕ ਅਬਦੁੱਲਾ ਆਦਿ ਨੇ ਸ਼ਿਰਕਤ ਕੀਤੀ।
ਐਨਸੀਪੀ ਕੌਮੀ ਕਾਰਜਕਾਰਨੀ ਦੀ ਵੀ ਹੋਈ ਮੀਟਿੰਗ
ਇਸ ਤੋਂ ਪਹਿਲਾਂ ਅੱਜ ਸਵੇਰੇ ਐੱਨਸੀਪੀ ਦੀ ਕੌਮੀ ਕਾਰਜਕਾਰਨੀ ਦੀ ਮੀਟਿੰਗ ਵੀ ਹੋਈ, ਜਿਸ ਵਿੱਚ ਕੌਮੀ ਮੁੱਦਿਆਂ, ਪਾਰਟੀ ਦੀਆਂ ਭਵਿੱਖੀ ਯੋਜਨਾਵਾਂ ਤੇ 2024 ਵਿੱਚ ਹੋਣ ਵਾਲੀਆਂ ਲੋਕ ਸਭਾ ਚੋਣਾਂ ਵਿੱਚ ਪਾਰਟੀ ਦੀ ਭੂਮਿਕਾ ਬਾਰੇ ਚਰਚਾ ਕੀਤੀ ਗਈ। ਮੀਟਿੰਗ ਦੀ ਪ੍ਰਧਾਨਗੀ ਪਾਰਟੀ ਦੇ ਮੁਖੀ ਸ਼ਰਦ ਪਵਾਰ ਨੇ ਕੀਤੀ। ਇਸ ਮੀਟਿੰਗ ਵਿੱਚ ਸੁਪ੍ਰਿਆ ਸੁੂਲੇ, ਪ੍ਰਫੁੱਲ ਪਟੇਲ ਤੇ ਸੁਨੀਲ ਤਤਕਰੇ ਤੇ ਹੋਰ ਸ਼ਾਮਲ ਹੋਏ। ਸ਼ਰਦ ਪਵਾਰ ਦੇ ਘਰ ਵਿੱਚ ਹੋਈ ਇਹ ਮੀਟਿੰਗ ਲਗਪਗ ਦੋ ਘੰਟੇ ਚੱਲੀ।-ਏਜੰਸੀ