Nepal Floods: ਹੜ੍ਹਾਂ ਕਾਰਨ ਕਾਠਮੰਡੂ ਵਿੱਚ ਫਸੇ ਨਾਗਪੁਰ ਦੇ 102 ਤੀਰਥ ਯਾਤਰੀ ਸੁਰੱਖਿਅਤ ਵਾਪਸ ਪਰਤੇ
ਨੇਪਾਲ ਵਿੱਚ ਆਏ ਇਨ੍ਹਾਂ ਹੜ੍ਹਾਂ ਕਰਕੇ ਹੁਣ ਤੱਕ ਘੱਟੋ-ਘੱਟ 675 ਲੋਕਾਂ ਦੀ ਹੋ ਚੁੱਕੀ ਹੈ ਮੌਤ
ਨੇਪਾਲ ਵਿੱਚ ਆਏ ਭਿਆਨਕ ਹੜ੍ਹਾਂ ਤੋਂ ਬਾਅਦ ਕਾਠਮੰਡੂ ਵਿੱਚ ਫਸੇ ਨਾਗਪੁਰ ਦੇ 102 ਤੀਰਥ ਯਾਤਰੀ ਐਤਵਾਰ ਸਵੇਰੇ ਸੁਰੱਖਿਅਤ ਮਹਾਰਾਸ਼ਟਰ ਪਰਤ ਆਏ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ।
ਇਨ੍ਹਾਂ 102 ਤੀਰਥ ਯਾਤਰੀਆਂ ਦੇ ਨਾਲ ਵਿਦਰਭ ਖੇਤਰ ਦੇ ਹੋਰ ਹਿੱਸਿਆਂ ਦੇ ਚਾਰ ਯਾਤਰੀ ਵੀ 19 ਅਗਸਤ ਨੂੰ ਪਸ਼ੁਪਤਿਨਾਥ ਮੰਤਰ ਅਤੇ ਹੋਰ ਧਾਰਮਿਕ ਸਥਾਨਾਂ ਦੇ ਦਰਸ਼ਨਾਂ ਲਈ ਨੇਪਾਲ ਗਏ ਸਨ। ਹੜ੍ਹ ਆਉਣ ਦੇ ਇੱਕ ਦਿਨ ਬਾਅਦ ਯਾਨੀ 27 ਅਗਸਤ ਤੱਕ ਉਹ ਕਾਠਮੰਡੂ ਵਿੱਚ ਹੀ ਰੁਕੇ ਰਹੇ। ਵਿਦਰਭ ਦੇ ਚਾਰ ਤੀਰਥ ਯਾਤਰੀ ਸ਼ਨਿੱਚਰਵਾਰ ਨੂੰ ਜਹਾਜ਼ ਰਾਹੀਂ ਇੱਥੇ ਪਹੁੰਚੇ, ਜਦੋਂ ਕਿ ਬਾਕੀ 102 ਯਾਤਰੀ ਐਤਵਾਰ ਤੜਕੇ ਕਰੀਬ 4:30 ਵਜੇ ਰੇਲਗੱਡੀ ਰਾਹੀਂ ਨਾਗਪੁਰ ਰੇਲਵੇ ਸਟੇਸ਼ਨ ਪਹੁੰਚੇ।
ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਨਾਗਪੁਰ ਇਕਾਈ ਦੇ ਪ੍ਰਧਾਨ ਦਯਾਸ਼ੰਕਰ ਤਿਵਾੜੀ ਯਾਤਰੀਆਂ ਦੇ ਸਵਾਗਤ ਲਈ ਰੇਲਵੇ ਸਟੇਸ਼ਨ ਪਹੁੰਚੇ।
ਨੇਪਾਲ ਵਿੱਚ ਆਏ ਇਨ੍ਹਾਂ ਹੜ੍ਹਾਂ ਕਰਕੇ ਹੁਣ ਤੱਕ ਘੱਟੋ-ਘੱਟ 675 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦੋਂ ਕਿ ਕਰੀਬ 2,400 ਲੋਕ ਲਾਪਤਾ ਦੱਸੇ ਜਾ ਰਹੇ ਹਨ।
ਇੱਕ ਤੀਰਥ ਯਾਤਰੀ ਨੇ ਉਨ੍ਹਾਂ ਨੂੰ ਸੁਰੱਖਿਅਤ ਨਾਗਪੁਰ ਪਹੁੰਚਾਉਣ ਦਾ ਪ੍ਰਬੰਧ ਕਰਨ ਲਈ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਦਾ ਧੰਨਵਾਦ ਕੀਤਾ।
ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਦਫ਼ਤਰ ਅਨੁਸਾਰ, ਫੜਨਵੀਸ ਨੇਪਾਲ ਦੇ ਸੰਸਦ ਮੈਂਬਰ ਸੰਦੀਪ ਰਾਣਾ ਦੇ ਲਗਾਤਾਰ ਸੰਪਰਕ ਵਿੱਚ ਸਨ ਅਤੇ ਤੀਰਥ ਯਾਤਰੀਆਂ ਦੀ ਸੁਰੱਖਿਅਤ ਵਾਪਸੀ ਲਈ ਜ਼ਰੂਰੀ ਪ੍ਰਬੰਧਾਂ 'ਤੇ ਨਜ਼ਰ ਰੱਖ ਰਹੇ ਸਨ।
ਇੱਕ ਤੀਰਥ ਯਾਤਰੀ ਨੇ ਦੱਸਿਆ ਕਿ ਵਾਪਸੀ ਦੌਰਾਨ ਉਹ 28 ਅਗਸਤ ਨੂੰ ਬੱਸ ਰਾਹੀਂ ਕਾਠਮੰਡੂ ਤੋਂ ਬਿਹਾਰ ਦੇ ਜਨਕਪੁਰ ਪਹੁੰਚੇ ਅਤੇ ਅਗਲੇ ਦਿਨ ਦਾਨਾਪੁਰ ਪਹੁੰਚੇ। ਇਸ ਤੋਂ ਬਾਅਦ ਉਹ ਪਟਨਾ ਗਏ, ਜਿੱਥੋਂ ਉਨ੍ਹਾਂ ਨੇ ਨਾਗਪੁਰ ਲਈ ਰੇਲਗੱਡੀ ਫੜੀ।
ਤੀਰਥ ਯਾਤਰੀ ਦਲ ਦੀ ਅਗਵਾਈ ਕਰ ਰਹੇ ਪੰਡਿਤ ਸ਼੍ਰੀਧਰ ਤਿਵਾੜੀ ਨੇ ਦੱਸਿਆ ਕਿ ਦਲ ਦੀ ਇੱਕ ਮੈਂਬਰ 72 ਸਾਲਾ ਨਿਰਮਲਾ ਪਾਂਡੇ ਨੂੰ ਦਿਲ ਦਾ ਦੌਰਾ ਪੈਣ ਤੋਂ ਬਾਅਦ ਕਾਠਮੰਡੂ ਦੇ ਇੱਕ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦਾ ਪੁੱਤਰ ਨਾਗਪੁਰ ਤੋਂ ਕਾਠਮੰਡੂ ਪਹੁੰਚ ਗਿਆ ਹੈ।
