ਹੋਲੀ ਦੇ ਰੰਗ ’ਚ ਰੰਗਿਆ ਮਥੁਰਾ 

ਮੰਦਰਾਂ ਦੇ ਸ਼ਹਿਰ ਮਥੁਰਾ ਵਿੱਚ ਬੁੱਧਵਾਰ ਨੂੰ ਸ਼ਰਧਾਲੂਆਂ ਅਤੇ ਸਥਾਨਕ ਲੋਕਾਂ ਨੇ ਰੰਗਾਂ ਨਾਲ ਪਰੰਪਰਾਗਤ ਉਤਸ਼ਾਹ ਨਾਲ ਹੋਲੀ ਮਨਾਈ। ਸ੍ਰੀ ਬਾਂਕੇ ਬਿਹਾਰੀ ਮੰਦਰ ਦੇ ਸੇਵਾਦਾਰ ਗਿਆਨਇੰਦਰ ਕਿਸ਼ੋਰ ਗੋਸਵਾਮੀ ਨੇ ਦੱਸਿਆ ਕਿ ਹੋਲੀ ਮੰਦਰਾਂ ਦੇ ਬਾਹਰ ਖੇਡੀ ਜਾ ਰਹੀ ਹੈ, ਪਰ ਗਰਭ ਗ੍ਰਹਿ ਦੇ ਅੰਦਰ ਨਹੀਂ ਮਨਾਈ ਜਾਂਦੀ; ਮੰਦਰ ਦੇ ਹੋਲੀ ਜਸ਼ਨ ਹੋਲਿਕਾ ਦਹਿਨ ਵਾਲੇ ਦਿਨ ਸਮਾਪਤ ਹੁੰਦੇ ਹਨ।

ਪੁਰਾਣੇ ਕੇਸ਼ਵਦੇਵ ਮੰਦਰ ਦੇ ਸੇਵਾਦਾਰ ਬਿਹਾਰੀਲਾਲ ਗੋਸਵਾਮੀ ਨੇ ਦੱਸਿਆ ਕਿ ਸ਼ਾਮ ਨੂੰ ਉੱਥੇ 'ਭਜਨ ਸੰਧਿਆ' ਅਤੇ ਫੁੱਲਾਂ ਦੀ ਹੋਲੀ ਦਾ ਪ੍ਰੋਗਰਾਮ ਹੈ, ਪਰ ਮੰਦਰ ਦੇ ਅੰਦਰ ਹੋਲੀ ਨਹੀਂ ਮਨਾਈ ਜਾਂਦੀ। ਸ੍ਰੀ ਗਰੁੜ ਗੋਵਿੰਦ ਮੰਦਰ ਵਿਖੇ ਹੋਲੀ ਦੇ ਜਸ਼ਨ ਰੰਗਭਰੀ ਇਕਾਦਸ਼ੀ ਤੋਂ ਇੱਕ ਦਿਨ ਪਹਿਲਾਂ ਰਵਾਇਤੀ 'ਹੁਰੰਗਾ' ਨਾਲ ਸਮਾਪਤ ਹੁੰਦੇ ਹਨ।

ਸਥਾਨਕ ਕਾਰੋਬਾਰੀ ਹਰਸ਼ ਚਤੁਰਵੇਦੀ ਨੇ ਕਿਹਾ ਕਿ ਮਥੁਰਾ ਦੀ ਹੋਲੀ ਵੱਖਰੀ ਹੈ ਪਿਛਲੇ 30 ਦਿਨਾਂ ਤੋਂ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਜਸ਼ਨ ਮਨਾਏ ਜਾ ਰਹੇ ਹਨ। ਸਵੇਰ ਤੋਂ ਹੀ ਲੋਕ ਉੱਚੀ ਆਵਾਜ਼ ਵਿੱਚ ਸੰਗੀਤ 'ਤੇ ਨੱਚਦੇ ਅਤੇ ਇੱਕ ਦੂਜੇ ਨੂੰ ਰੰਗ ਲਗਾਉਂਦੇ ਦੇਖੇ ਗਏ। ਇਸ ਮੌਕੇ ਸ਼ਹਿਰ ਵਿੱਚ ਸੁਰੱਖਿਆ ਦੇ ਸਖ਼ਤ ਪ੍ਰਬੰਧ ਕੀਤੇ ਗਏ ਹਨ; ਪੂਰੇ ਜ਼ਿਲ੍ਹੇ ਨੂੰ ਨੌਂ ਜ਼ੋਨਾਂ ਅਤੇ 40 ਸੈਕਟਰਾਂ ਵਿੱਚ ਵੰਡਿਆ ਗਿਆ ਹੈ ਅਤੇ ਕਾਨੂੰਨ ਵਿਵਸਥਾ ਬਣਾਈ ਰੱਖਣ ਲਈ ਪੁਲਿਸ ਦੀਆਂ ਸੱਤ ਸਟ੍ਰਾਈਕ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਵਧੀਕ ਪੁਲਿਸ ਸੁਪਰਡੈਂਟ ਸੁਰੇਸ਼ ਚੰਦਰ ਰਾਵਤ ਨੇ ਦੱਸਿਆ ਕਿ ਕਿਸੇ ਵੀ ਐਮਰਜੈਂਸੀ ਨਾਲ ਨਜਿੱਠਣ ਲਈ ਇੱਕ ਇੰਟੀਗ੍ਰੇਟਿਡ ਕੰਟਰੋਲ ਰੂਮ ਚੌਵੀ ਘੰਟੇ ਕੰਮ ਕਰ ਰਿਹਾ ਹੈ।