ਜਾਣੋ ਕਿੱਥੇ ਤੇ ਕਿਵੇਂ ਹੋਇਆ ਪੰਜਾਬੀ ਅਦਾਕਾਰ Ammy Virk ’ਤੇ ਹਮਲਾ

Ammy Virk firing: ਕਾਲੇ ਰੰਗ ਦੀ ਐੱਸ.ਯੂ.ਵੀ. (SUV) ਵਿੱਚ ਆਏ ਹਮਲਾਵਰਾਂ ਨੇ ਗੱਡੀ 'ਤੇ ਲਗਪਗ 7 ਗੋਲੀਆਂ ਚਲਾਈਆਂ

Tribune Web Desk

ਚੰਡੀਗਡ਼੍ਹ, 12:37 PM Sep 09, 2026 IST

ਪੰਜਾਬੀ ਅਦਾਕਾਰ ਐਮੀ ਵਿਰਕ ਦੇ ਕਾਫ਼ਲੇ ’ਤੇ ਗੋਲੀਆਂ ਚੱਲੀਆਂ। Photo Amyy Virk/FB

Ammy Virk firing: ਐਬਸਫੋਰਡ ’ਚ ਪੰਜਾਬ ਦੇ ਨਾਮਵਰ ਫਿਲਮੀ ਕਲਾਕਾਰ ਤੇ ਗਾਇਕ ਐਮੀ ਵਿਰਕ ਦੇ ਕਾਫ਼ਲੇ ’ਤੇ ਹਮਲਾ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਜਾਣਕਾਰੀ ਅਨੁਸਾਰ ਹਮਲਾਵਰਾਂ ਨੇ ਕਾਰ ’ਤੇ ਕਈ ਗੋਲੀਆਂ ਦਾਗੀਆਂ, ਪਰ ਅਦਾਕਾਰ ਸਮੇਤ ਚਾਰ ਹੋਰ ਸਵਾਰ ਵਾਲ ਵਾਲ ਬਚ ਗਏ। ਗੋਲੀਆਂ ਦੇ ਨਿਸ਼ਾਨ ਸ਼ੀਸ਼ੇ ਉੱਤੇ ਦਿਖਾਈ ਦਿੱਤੇ, ਪਰ ਕਾਰ ਇੱਕ ਖਾਸ ਕੰਪਨੀ ਦੀ ਹੋਣ ਕਰਕੇ ਗੋਲੀਆਂ ਅੰਦਰ ਨਹੀਂ ਲੰਘ ਸਕੀਆਂ।

ਹਮਲੇ ਦੀ ਘਟਨਾ ਅਤੇ ਸਮਾਂ

5 ਸਤੰਬਰ ਦੀ ਦੇਰ ਰਾਤ (ਲਗਪਗ ਰਾਤ 11 ਵਜੇ ਤੋਂ ਬਾਅਦ) ਪੰਜਾਬੀ ਗਾਇਕ ਅਤੇ ਅਦਾਕਾਰ ਐਮੀ ਵਿਰਕ ਦੇ ਸ਼ੋਅ ਦੇ ਕਾਫ਼ਲੇ ਦੀ ਗੱਡੀ 'ਤੇ ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸਥਿਤ ਐਬਸਫੋਰਡ ਸ਼ਹਿਰ ਵਿੱਚ ਮਕੱਲਮ ਰੋਡ (2500-ਬਲਾਕ) ਅਤੇ ਸਊਥ ਫ਼ਰੇਜ਼ਰ ਵੇਅ ਨੇੜੇ ਸਨ, ਜਦੋਂ ਗੋਲੀਬਾਰੀ ਕੀਤੀ ਗਈ। ਇਹ ਘਟਨਾ ਐਮੀ ਵਿਰਕ ਦੇ 'ਰੋਜਰਜ਼ ਫੋਰਮ' ਵਿਖੇ ਸ਼ੋਅ ਖ਼ਤਮ ਹੋਣ ਤੋਂ ਕੁਝ ਘੰਟਿਆਂ ਬਾਅਦ ਵਾਪਰੀ। ਪ੍ਰਾਪਤ ਵੇਰਵਿਆਂ ਅਨੁਸਾਰ ਇੱਕ ਕਾਲੇ ਰੰਗ ਦੀ ਐੱਸ.ਯੂ.ਵੀ. (SUV) ਵਿੱਚ ਆਏ ਹਮਲਾਵਰਾਂ ਨੇ ਗੱਡੀ 'ਤੇ ਲਗਪਗ 7 ਗੋਲੀਆਂ ਚਲਾਈਆਂ।

ਐਮੀ ਵਿਰਕ ਸਮੇਤ 4 ਵਿਅਕਤੀ ਸਨ ਸਵਾਰ

ਹਮਲੇ ਦੇ ਸਮੇਂ ਐਮੀ ਵਿਰਕ ਸਮੇਤ ਕੁੱਲ 4 ਵਿਅਕਤੀ 'ਰੌਲਜ਼ ਰੌਇਸ' (Rolls Royce) ਕਾਰ ਵਿੱਚ ਸਵਾਰ ਸਨ, ਜੋ ਕਿ ਬੁਲੇਟ-ਪਰੂਫ਼ ਦੱਸੀ ਜਾ ਰਹੀ ਹੈ। ਗੋਲੀਆਂ ਦੇ ਨਿਸ਼ਾਨ ਗੱਡੀ ਦੇ ਸ਼ੀਸ਼ਿਆਂ ਉੱਤੇ ਸਾਫ਼ ਦਿਖਾਈ ਦਿੱਤੇ, ਪਰ ਕਾਰ ਬੁਲੇਟ-ਪਰੂਫ਼ ਹੋਣ ਕਰਕੇ ਗੋਲੀਆਂ ਅੰਦਰ ਨਹੀਂ ਲੰਘ ਸਕੀਆਂ, ਜਿਸ ਕਰਕੇ ਸਾਰੇ ਸਵਾਰ ਵਾਲ-ਵਾਲ ਬਚ ਗਏ ਅਤੇ ਕਿਸੇ ਦੇ ਜ਼ਖ਼ਮੀ ਹੋਣ ਤੋਂ ਬਚਾਅ ਰਿਹਾ।

ਇਸ ਗੱਡੀ ਵਿੱਚ ਐਮੀ ਵਿਰਕ ਦੇ ਨਾਲ ਸ਼ੋਅ ਦਾ ਪ੍ਰਮੋਟਰ ਵੀ ਸਵਾਰ ਸੀ, ਜੋ ਸਰੀ-ਅਧਾਰਤ ਇੱਕ ਪੰਜਾਬੀ ਰੇਡੀਓ ਸਟੇਸ਼ਨ ਦੇ ਮਾਲਕ ਦਾ ਪੁੱਤਰ ਹੈ। ਜ਼ਿਕਰਯੋਗ ਹੈ ਕਿ ਇਸ ਰੇਡੀਓ ਸਟੇਸ਼ਨ ਨੂੰ ਵੀ ਪਿਛਲੇ ਸਾਲ ਅਜਿਹੇ ਹੀ ਹਮਲੇ ਦਾ ਨਿਸ਼ਾਨਾ ਬਣਾਇਆ ਗਿਆ ਸੀ ਅਤੇ ਐਮੀ ਵਿਰਕ ਦੇ ਇੱਕ ਸਾਥੀ ਉੱਤੇ ਵੀ ਪਹਿਲਾਂ ਗੋਲੀਬਾਰੀ ਹੋ ਚੁੱਕੀ ਹੈ।

ਹਮਲੇ ਤੋਂ ਬਾਅਦ ਹਮਲਾਵਰਾਂ ਨੇ ਆਪਣੀ ਗੱਡੀ ਸਾੜੀ

ਗੋਲੀਬਾਰੀ ਤੋਂ ਤੁਰੰਤ ਬਾਅਦ ਹਮਲਾਵਰਾਂ ਵੱਲੋਂ ਵਰਤੀ ਗਈ ਐਸ.ਯੂ.ਵੀ. ਗੱਡੀ ਘਟਨਾ ਸਥਾਨ ਤੋਂ ਕੁਝ ਹੀ ਦੂਰੀ ਉੱਤੇ 'ਸੰਨੀਸਾਈਡ ਪਲੇਸ' (2400-ਬਲਾਕ) ਵਿਖੇ ਪੂਰੀ ਤਰ੍ਹਾਂ ਅੱਗ ਵਿੱਚ ਸੜਦੀ ਹੋਈ ਮਿਲੀ। ਕੈਨੇਡਾ ਵਿੱਚ ਅਪਰਾਧਿਕ ਗਿਰੋਹਾਂ ਵੱਲੋਂ ਆਪਣੇ ਖ਼ਿਲਾਫ਼ ਸਬੂਤ ਅਤੇ ਪਛਾਣ ਨਸ਼ਟ ਕਰਨ ਲਈ ਵਾਰਦਾਤ ਤੋਂ ਬਾਅਦ ਗੱਡੀ ਨੂੰ ਅੱਗ ਲਗਾਉਣਾ ਇੱਕ ਆਮ ਤਰੀਕਾ ਹੈ। ਐਬਸਫੋਰਡ ਪੁਲੀਸ ਦੀ ਮੇਜਰ ਕ੍ਰਾਈਮ ਯੂਨਿਟ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲੀਸ ਅਨੁਸਾਰ ਸ਼ੁਰੂਆਤੀ ਸੰਕੇਤਾਂ ਤੋਂ ਇਹ ਇੱਕ ਮਿਥ ਕੇ ਕੀਤਾ ਗਿਆ (ਟਾਰਗੇਟਿਡ) ਹਮਲਾ ਪ੍ਰਤੀਤ ਹੁੰਦਾ ਹੈ।

ਪੁਲੀਸ ਵੱਲੋਂ ਲੋਕਾਂ ਨੂੰ ਅਪੀਲ

ਪੁਲੀਸ ਦੀ ਅਪੀਲ ਅਤੇ ਖੇਤਰੀ ਪਿਛੋਕੜ ਐਬਸਫੋਰਡ ਪੁਲਿਸ ਦੇ ਸਾਰਜੈਂਟ ਪਾਲ ਵਾਕਰ ਅਨੁਸਾਰ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਉਨ੍ਹਾਂ ਨੇ 5 ਸਤੰਬਰ ਦੀ ਰਾਤ 10:45 ਤੋਂ ਅੱਧੀ ਰਾਤ ਦੇ ਵਿਚਕਾਰ ਦੀ ਡੈਸ਼ਕੈਮ ਫੁਟੇਜ ਜਾਂ ਕੋਈ ਹੋਰ ਜਾਣਕਾਰੀ ਰੱਖਣ ਵਾਲੇ ਲੋਕਾਂ ਨੂੰ ਅੱਗੇ ਆਉਣ ਦੀ ਅਪੀਲ ਕੀਤੀ ਹੈ। ਫਿਲਹਾਲ ਕਿਸੇ ਵੀ ਗਰੁੱਪ ਨੇ ਇਸ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਇਹ ਘਟਨਾ ਕੈਨੇਡਾ ਵਿੱਚ ਪੰਜਾਬੀ ਕਲਾਕਾਰਾਂ ਨੂੰ ਨਿਸ਼ਾਨਾ ਬਣਾ ਕੇ ਕੀਤੀਆਂ ਜਾ ਰਹੀਆਂ ਗੋਲੀਬਾਰੀ ਦੀਆਂ ਘਟਨਾਵਾਂ ਦੀ ਲੜੀ ਦਾ ਹੀ ਹਿੱਸਾ ਹੈ, ਜਿਸ ਵਿੱਚ ਪਹਿਲਾਂ ਗਾਇਕ ਸਿੱਧੂ ਮੂਸੇਵਾਲਾ ਦਾ ਕਤਲ ਅਤੇ ਅਦਾਕਾਰ-ਗਾਇਕ ਗਿੱਪੀ ਗਰੇਵਾਲ ਦੇ ਘਰ ਬਾਹਰ ਹੋਈ ਗੋਲੀਬਾਰੀ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਪਿਛਲੇ ਕੁਝ ਦਿਨਾਂ ਵਿੱਚ ਸਰੀ, ਐਬਸਫੋਰਡ ਅਤੇ ਡੈਲਟਾ ਵਿੱਚ ਵੀ ਗੋਲੀਬਾਰੀ ਦੀਆਂ ਵੱਖ-ਵੱਖ ਘਟਨਾਵਾਂ ਸਾਹਮਣੇ ਆਈਆਂ ਹਨ।

Tags :