India Vietnam relations ਭਾਰਤ-ਵੀਅਤਨਾਮ ’ਚ 25 ਅਰਬ ਡਾਲਰ ਦੇ ਵਪਾਰ ਦਾ ਟੀਚਾ

ਦੋਵੇਂ ਪ੍ਰਧਾਨ ਮੰਤਰੀਆਂ ਨੇ ਆਲਮੀ ਹਾਲਾਤ ਦੇ ਮੱਦੇਨਜ਼ਰ ਵਪਾਰ, ਰੱਖਿਆ ਅਤੇ ਅਹਿਮ ਖਣਿਜਾਂ ਦੇ ਖੇਤਰ ’ਚ ਦੁਵੱਲੇ ਸਬੰਧਾਂ ਦੇ ਵਿਸਤਾਰ ’ਤੇ ਧਿਆਨ ਕੇਂਦਰਤ ਕੀਤਾ। ਮੋਦੀ-ਲਾਮ ਦੀ ਮੁਲਾਕਾਤ ਮਗਰੋਂ ਦੋਵੇਂ ਮੁਲਕਾਂ ਨੇ 13 ਸਮਝੌਤਿਆਂ ’ਤੇ ਦਸਤਖ਼ਤ ਕੀਤੇ ਜੋ ਡਿਜੀਟਲ ਭੁਗਤਾਨ, ਅਹਿਮ ਖਣਿਜਾਂ, ਦਵਾਈਆਂ, ਸਿੱਖਿਆ, ਬੈਂਕਿੰਗ ਅਤੇ ਸੱਭਿਆਚਾਰ ਸਮੇਤ ਵੱਖ ਵੱਖ ਖੇਤਰਾਂ ’ਚ ਡੂੰਘੀ ਭਾਈਵਾਲੀ ਦਾ ਰਾਹ ਖੋਲ੍ਹਣਗੇ। ਮੋਦੀ ਅਤੇ ਲਾਮ ਨੇ ਹਿੰਦ-ਪ੍ਰਸ਼ਾਂਤ ਖ਼ਿੱਤੇ ’ਚ ਚੀਨ ਵੱਲੋਂ ਦਬਦਬਾ ਵਧਾਉਣ ਦੀਆਂ ਕੋਸ਼ਿਸ਼ਾਂ ਦਰਮਿਆਨ ਖੇਤਰ ਦੇ ਹਾਲਾਤ ਬਾਰੇ ਵੀ ਚਰਚਾ ਕੀਤੀ ਅਤੇ ਕਾਨੂੰਨ ਪ੍ਰਬੰਧ, ਸ਼ਾਂਤੀ, ਸਥਿਰਤਾ ਤੇ ਖ਼ੁਸ਼ਹਾਲੀ ’ਚ ਯੋਗਦਾਨ ਦਿੰਦੇ ਰਹਿਣ ’ਤੇ ਵੀ ਸਹਿਮਤੀ ਜਤਾਈ। ਸਮਝਿਆ ਜਾਂਦਾ ਹੈ ਕਿ ਦੱਖਣੀ ਚੀਨ ਸਾਗਰ ’ਚ ਚੀਨ ਦਾ ਵਧਦਾ ਫ਼ੌਜੀ ਦਬਦਬਾ ਵੀ ਦੋਵੇਂ ਧਿਰਾਂ ਦੀ ਵਫ਼ਦ ਪੱਧਰ ਦੀ ਵਾਰਤਾ ’ਚ ਸਾਹਮਣੇ ਆਇਆ।

ਇਸ ਮਹੀਨੇ ਦੇ ਸ਼ੁਰੂ ’ਚ ਹੀ ਰਾਸ਼ਟਰਪਤੀ ਚੁਣੇ ਜਾਣ ਮਗਰੋਂ ਲਾਮ ਨੇ ਮੰਗਲਵਾਰ ਨੂੰ ਭਾਰਤ ਦੀ ਆਪਣੀ ਪਹਿਲੀ ਸਰਕਾਰੀ ਯਾਤਰਾ ਸ਼ੁਰੂ ਕੀਤੀ। ਉਹ ਤਿੰਨ ਦਿਨਾ ਭਾਰਤ ਦੌਰੇ ’ਤੇ ਆਏ ਹਨ। ਮੋਦੀ ਨੇ ਇਕ ਬਿਆਨ ’ਚ ਕਿਹਾ ਕਿ ਦਹਾਕੇ ਪਹਿਲਾਂ ਵੀਅਤਨਾਮ, ਆਸੀਆਨ ’ਚ ਭਾਰਤ ਦਾ ਪਹਿਲਾ ਵਿਆਪਕ ਰਣਨੀਤਕ ਭਾਈਵਾਲ ਬਣਿਆ ਸੀ ਅਤੇ ਉਸ ਸਮੇਂ ਤੋਂ ਹੀ ਦੋਵੇਂ ਮੁਲਕਾਂ ਨੇ ਤਰੱਕੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਐੱਮ ਓ ਯੂ ਨਾਲ ਹੁਣ ਵੀਅਤਨਾਮ ’ਚ ਭਾਰਤੀ ਦਵਾਈਆਂ ਵੱਧ ਮਿਲਣਗੀਆਂ। ਵੀਅਤਨਾਮ ਨੂੰ ਭਾਰਤੀ ਖੇਤੀਬਾੜੀ ਵਸਤਾਂ, ਮੱਛੀ ਅਤੇ ਪਸ਼ੂ ਉਤਪਾਦਾਂ ਦੀ ਬਰਾਮਦ ਵੀ ਹੋਰ ਆਸਾਨ ਹੋ ਜਾਵੇਗੀ।