ਭਾਰਤ ਪੱਛਮੀ ਏਸ਼ੀਆ ’ਚ ਸ਼ਾਂਤੀ ਲਈ ਉਸਾਰੂ ਭੂਮਿਕਾ ਨਿਭਾ ਸਕਦਾ: Mirwaiz Umar Farooq

ਇਰਾਨੀ ਰਾਸ਼ਟਰਪਤੀ ਅਤੇ ਵਿਦੇਸ਼ ਮੰਤਰੀ ਨਾਲ ਮੁਲਾਕਾਤ ਕੀਤੀ; ਦੋ ਪੰਨਿਆਂ ਦਾ ਪੱਤਰ ਲਿਖ ਕੇ ਸ਼ਾਂਤੀ ਦਾ ਹੋਕਾ ਦਿੱਤਾ

PTI

ਨਵੀਂ ਦਿੱਲੀ, 02:52 AM Sep 14, 2026 IST

ਹੁਰੀਅਤ ਕਾਨਫਰੰਸ ਦੇ ਚੇਅਰਮੈਨ ਅਤੇ ਜੰਮੂ ਕਸ਼ਮੀਰ ਦੇ ਮੁੱਖ ਮੌਲਵੀ ਮੀਰਵਾਇਜ਼ ਉਮਰ ਫਾਰੂਕ, ਪੀਡੀਪੀ ਦੇ ਵਿਧਾਇਕ ਮੁੰਤਜ਼ਿਰ ਮਹਿਦੀ ਅਤੇ ਹੋਰ ਕਸ਼ਮੀਰੀ ਆਗੂ ਨਵੀਂ ਦਿੱਲੀ ਵਿੱਚ ਬਰਿਕਸ ਸੰਮੇਲਨ ਮੌਕੇ ਇਰਾਨ ਦੇ ਵਿਦੇਸ਼ ਮੰਤਰੀ ਸਈਦ ਅੱਬਾਸ ਅਰਾਗ਼ਚੀ ਨੂੰ ਮਿਲਦੇ ਹੋਏ। -ਫੋਟੋ: ਪੀਟੀਆਈ

ਪੱਛਮੀ ਏਸ਼ੀਆ ’ਚ ਜੰਗ ਫੈਲਣ ਦੇ ਖ਼ਦਸ਼ਿਆਂ ਦਰਮਿਆਨ ਕਸ਼ਮੀਰ ਦੇ ਮੁੱਖ ਪ੍ਰਚਾਰਕ ਮੀਰਵਾਇਜ਼ ਉਮਰ ਫਾਰੂਕ ਨੇ ਸੰਜਮ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਭਾਰਤ ਟਕਰਾਅ ਨੂੰ ਹੋਰ ਵਧਣ ਤੋਂ ਰੋਕਣ ਅਤੇ ਵਾਰਤਾ ਸ਼ੁਰੂ ਕਰਾਉਣ ’ਚ ਉਸਾਰੂ ਭੂਮਿਕਾ ਨਿਭਾ ਸਕਦਾ ਹੈ। ਇਰਾਨੀ ਰਾਸ਼ਟਰਪਤੀ ਮਸੂਦ ਪੇਜ਼ੇਸ਼ਕੀਅਨ ਨੂੰ ਲਿਖੇ ਦੋ ਪੰਨਿਆਂ ਦੇ ਪੱਤਰ ’ਚ ਮੀਰਵਾਇਜ਼ ਨੇ ਜੰਗ ਕਾਰਨ ਮੁਸਲਿਮ ਭਾਈਚਾਰੇ ’ਚ ਇੱਕ ਹੋਰ ਵੰਡ ਪੈਦਾ ਹੋਣ ਖ਼ਿਲਾਫ਼ ਵਰਜਦਿਆਂ ਪੈਰੋਕਾਰਾਂ ਨੂੰ ਅਪੀਲ ਕੀਤੀ ਕਿ ਉਹ ਫਿਰਕੂਵਾਦ ਅਤੇ ਸਿਆਸੀ ਦੁਸ਼ਮਣੀਆਂ ਖ਼ਿਲਾਫ਼ ਰਲ ਕੇ ਡਟੇ ਰਹਿਣ। ਉਨ੍ਹਾਂ ਭਾਰਤ ਨੂੰ ਮਹਾਤਮਾ ਗਾਂਧੀ ਦੇ ਅਹਿੰਸਾ ਦੇ ਸੁਨੇਹੇ ਵਾਲਾ ਮੁਲਕ ਕਰਾਰ ਦਿੱਤਾ ਅਤੇ ਕਿਹਾ ਕਿ ਉਹ ਵਾਰਤਾ ਤੇ ਕੂਟਨੀਤੀ ਰਾਹੀਂ ਮਸਲੇ ਹੱਲ ਕਰਨ ’ਚ ਆਪਣਾ ਯੋਗਦਾਨ ਪਾ ਸਕਦਾ ਹੈ।ਇਰਾਨੀ ਰਾਸ਼ਟਰਪਤੀ ਨੂੰ ਲਿਖੇ ਪੱਤਰ ’ਚ ਮੀਰਵਾਇਜ਼ ਨੇ ਕਿਹਾ, ‘‘ਨਵੀਂ ਦਿੱਲੀ ਦੇ ਦੌਰੇ ਦੌਰਾਨ ਮਹਾਮਹਿਮ ਨਾਲ ਮੁਲਾਕਾਤ ਅਤੇ ਵਿਚਾਰ ਵਟਾਂਦਰਾ ਕਰ ਕੇ ਮਾਣ ਮਹਿਸੂਸ ਹੋਇਆ ਹੈ। ਬੇਯਕੀਨੀ ਦੇ ਮਾਹੌਲ ਦਰਮਿਆਨ ਆਪ ਵੱਲੋਂ ਸ਼ਾਂਤੀ ਦੀਆਂ ਕੋਸ਼ਿਸ਼ਾਂ ਦੇ ਕੇਂਦਰ ’ਚ ਮਨੁੱਖਤਾ ਨੂੰ ਰੱਖਣ ’ਤੇ ਜ਼ੋਰ ਦੇਣ ਦੀ ਮੈਂ ਪ੍ਰਸ਼ੰਸਾ ਕਰਦਾ ਹਾਂ।’’ ਬਰਿਕਸ ਸਿਖਰ ਸੰਮੇਲਨ ਦੌਰਾਨ ਇਹ ਪੱਤਰ ਇਰਾਨੀ ਵਿਦੇਸ਼ ਮੰਤਰੀ ਅੱਬਾਸ ਅਰਾਗਚੀ ਨੂੰ ਸੌਂਪਿਆ ਗਿਆ। ਮੀਰਵਾਇਜ਼ ਨੇ ਇਰਾਨ ਦੇ ਲੋਕਾਂ ਨਾਲ ਇੱਕਜੁੱਟਤਾ ਜ਼ਾਹਿਰ ਕਰਦਿਆਂ ਫ਼ਲਸਤੀਨ ’ਚ ਲਗਾਤਾਰ ਤਬਾਹੀ, ਲੈਬਨਾਨ ’ਚ ਅਸਥਿਰਤਾ ਸਮੇਤ ਖ਼ਿੱਤੇ ’ਚ ਵਧ ਰਹੇ ਮਾਨਵੀ ਸੰਕਟ ’ਤੇ ਚਿੰਤਾ ਜਤਾਈ। ਉਨ੍ਹਾਂ ਕੌਮਾਂਤਰੀ ਭਾਈਚਾਰੇ ਨੂੰ ਨਿਆਂ, ਮਨੁੱਖਤਾ ਅਤੇ ਸ਼ਾਂਤੀ ਦੇ ਪੱਖ ’ਚ ਭੁਗਤਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਹਰੇਕ ਜ਼ਿੰਦਗੀ ਕੀਮਤੀ ਹੈ। ਸਾਬਕਾ ਵੱਖਵਾਦੀ ਆਗੂ ਨੇ ਕਿਹਾ ਕਿ ਦੁਨੀਆ ਦੀਆਂ ਗੰਭੀਰ ਚੁਣੌਤੀਆਂ ਦਾ ਹੱਲ ਜੰਗਾਂ ਰਾਹੀਂ ਨਹੀਂ ਸਗੋਂ ਵਾਰਤਾ ਨਾਲ ਕੱਢਿਆ ਜਾ ਸਕਦਾ ਹੈ। ਉਨ੍ਹਾਂ ਅਖਰੋਟ ਦੀ ਲੱਕੜ ਨਾਲ ਬਣੀ ਸ੍ਰੀਨਗਰ ਦੀ ਇਤਿਹਾਸਕ ਜਾਮਾ ਮਸਜਿਦ ਦੀ ਤਸਵੀਰ ਇਰਾਨੀ ਰਾਸ਼ਟਰਪਤੀ ਨੂੰ ਭੇਟ ਕੀਤੀ ਹੈ।

Tags :