India-Brazil Trade: ਭਾਰਤ-ਬ੍ਰਾਜ਼ੀਲ ਵੱਲੋਂ 30 ਅਰਬ ਡਾਲਰ ਦੇ ਵਪਾਰ ਦਾ ਟੀਚਾ

ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੂਲਾ ਡਿ ਸਿਲਵਾ ਇਸ ਸਮੇਂ ‘ਇੰਡੀਆ ਏ ਆਈ ਇੰਪੈਕਟ ਸੰਮੇਲਨ’ ਵਿੱਚ ਹਿੱਸਾ ਲੈਣ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਗੱਲਬਾਤ ਲਈ ਭਾਰਤ ਦੇ ਪੰਜ ਦਿਨਾਂ ਦੌਰੇ ’ਤੇ ਹਨ। ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਦੀ ਮੌਜੂਦਗੀ ’ਚ ਕੀਤੀ ਪ੍ਰੈੱਸ ਕਾਨਫਰੰਸ ਮੌਕੇ ਪ੍ਰਧਾਨ ਮੰਤਰੀ ਸ੍ਰੀ ਮੋਦੀ ਨੇ ਕਿਹਾ, ‘ਬ੍ਰਾਜ਼ੀਲ, ਲਾਤੀਨੀ ਅਮਰੀਕਾ ਵਿੱਚ ਭਾਰਤ ਦਾ ਸਭ ਤੋਂ ਵੱਡਾ ਕਾਰੋਬਾਰੀ ਭਾਈਵਾਲ ਹੈ। ਅਸੀਂ  ਸਾਲਨਾ 30 ਅਰਬ ਡਾਲਰ ਦਾ ਦੁਵੱਲਾ ਕਾਰੋਬਾਰ ਕਰਨ ਲਈ ਪ੍ਰਤੀਬੱਧ ਹਾਂ। ਸਾਡਾ ਕਾਰੋਬਾਰ ਸਿਰਫ਼ ਅੰਕੜਾ ਨਹੀਂ ਬਲਕਿ ਭਰੋਸੇ ਦੀ ਝਲਕ ਵੀ ਹੈ।’

ਪ੍ਰਧਾਨ ਮੰਤਰੀ ਸ੍ਰੀ ਮੋਦੀ ਨੇ ਕਿਹਾ ਕਿ ਅਹਿਮ ਖਣਿਜਾਂ ਬਾਰੇ ਸਮਝੌਤਾ ਮਜ਼ਬੂਤ ਸਪਲਾਈ ਚੇਨ ਕਾਇਮ ਕਰਨ ’ਚ ਅਹਿਮ ਕਦਮ ਹੈ। ਇਸ ਦੌਰਾਨ ਭਾਰਤ ਅਤੇ ਬ੍ਰਾਜ਼ੀਲ ਨੇ ਡਿਜੀਟਲ ਭਾਈਵਾਲੀ ’ਤੇ ਸਾਂਝੇ ਐਲਾਨਨਾਮੇ ਉੱਤੇ ਸਹਿਮਤੀ ਜ਼ਾਹਰ ਕੀਤੀ ਅਤੇ ਮਾਈਨਿੰਗ, ਲਘੂ, ਛੋਟੇ ਅਤੇ ਦਰਮਿਆਨੇ ਉੱਦਮਾਂ, ਸਿਹਤ ਸੰਭਾਲ ਤੇ ਰਵਾਇਤੀ ਸੂਚਨਾ ਪ੍ਰਣਾਲੀ ਦੇ ਖੇਤਰਾਂ ਵਿੱਚ ਸਹਿਯੋਗ ਲਈ ਸਮਝੌਤਾ (ਐੱਮ ਓ ਯੂ) ਸਹੀਬੱਧ ਕੀਤਾ।

ਪ੍ਰਧਾਨ ਮੰਤਰੀ ਨੇ ਕਿਹਾ,‘ਰੱਖਿਆ ਖੇਤਰ ਵਿੱਚ ਸਾਡਾ ਸਹਿਯੋਗ ਲਗਾਤਾਰ ਵਧ ਰਿਹਾ ਹੈ। ਇਹ ਆਪਸੀ ਭਰੋਸੇ ਤੇ ਰਣਨੀਤਕ ਸਹਿਯੋਗ ਦੀ ਵੱਡੀ ਮਿਸਾਲ ਹੈ। ਅਸੀਂ ਇਹ ਭਾਈਵਾਲੀ ਮਜ਼ਬੂਤ ਕਰਨ ਲਈ ਕੰਮ ਕਰਦੇ ਰਹਾਂਗੇ। ਆਲਮੀ ਮੰਚ ’ਤੇ ਭਾਰਤ-ਬ੍ਰਾਜ਼ੀਲ ਦੀ ਭਾਈਵਾਲੀ ਮਜ਼ਬੂਤ ਤੇ ਪ੍ਰਭਾਵਸ਼ਾਲੀ ਰਹੀ ਹੈ। ਲੋਕਤੰਤਰੀ ਮੁਲਕਾਂ ਵਜੋਂ ਅਸੀਂ ਗਲੋਬਲ ਸਾਊਥ ਦੀਆਂ ਉਮੀਦਾਂ ਲਈ ਕੰਮ ਕਰਨਾ ਜਾਰੀ ਰੱਖਾਂਗੇ। ਭਾਰਤ ਅਤੇ ਬ੍ਰਾਜ਼ੀਲ ਇਸ ਗੱਲ ’ਤੇ ਸਹਿਮਤ ਹਨ ਕਿ ਦਹਿਸ਼ਤਵਾਦ ਤੇ ਇਸ ਦੇ ਸਮਰਥਕ ਸਾਰੀ ਮਨੁੱਖਤਾ ਦੇ ਦੁਸ਼ਮਣ ਹਨ।’

ਇਸ ਮੌਕੇ ਪ੍ਰਧਾਨ ਮੰਤਰੀ ਸ੍ਰੀ ਮੋਦੀ ਨੇ ਭਾਰਤ-ਮਰਕੋਸੁਰ ਵਪਾਰਕ ਸਮਝੌਤੇ ਦਾ ਜ਼ਿਕਰ ਵੀ ਕੀਤਾ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਦੋਵਾਂ ਮੁਲਕਾਂ ਵਿਚਾਲੇ ਆਰਥਿਕ ਸਬੰਧ ਮਜ਼ਬੂਤ ਬਣਨਗੇ।

ਬ੍ਰਾਜ਼ੀਲ ਨੇ ਗੱਲਬਾਤ ਦੌਰਾਨ ਭਾਰਤ ਵੱਲੋਂ ਸਮਰਥਿਤ ‘ਕੋਲਿਸ਼ਨ ਫਾਰ ਡਿਜਾਸਟਰ ਰੀਸਿਲੀਐਂਟ ਇਨਫਰਾਸਟਰਕਚਰ’ (ਸੀ ਡੀ ਆਰ ਆਈ) ਦੀ ਸਹਿ-ਅਗਵਾਈ ਕਰਨ ਦੀ ਤਜਵੀਜ਼ ਵੀ ਰੱਖੀ। ਇਸ ’ਤੇ ਪ੍ਰਧਾਨ ਮੰਤਰੀ ਸ੍ਰੀ ਮੋਦੀ ਨੇ ਕਿਹਾ,‘ਮੈਂ ਇਸ ਪਹਿਲ ਲਈ ਰਾਸ਼ਟਰਪਤੀ ਡੀ ਸਿਲਵਾ ਨੂੰ ਵਧਾਈ ਦਿੰਦਾ ਹਾਂ। ਇਸ ਖੇਤਰ ਵਿੱਚ ਬ੍ਰਾਜ਼ੀਲ ਦਾ ਵਿਆਪਕ ਅਨੁਭਵ ਸੀ ਡੀ ਆਰ ਆਈ ਨੂੰ ਹੋਰ ਮਜ਼ਬੂਤ ਬਣਾਉਣ ਵਿੱਚ ਅਹਿਮ ਯੋਗਦਾਨ ਦੇਵੇਗਾ।-ਪੀਟੀਆਈ

ਅਤਿਵਾਦ ਨੂੰ ਕਿਸੇ ਧਰਮ ਜਾਂ ਨਾਗਰਿਕਤਾ ਨਾਲ ਨਹੀਂ ਜੋੜਿਆ ਜਾਣਾ ਚਾਹੀਦਾ: ਡਿ ਸਿਲਵਾ

ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਸ੍ਰੀ ਡਿ ਸਿਲਵਾ ਨੇ ਕਸ਼ਮੀਰ ਵਿੱਚ ਦਹਿਸ਼ਤੀ ਹਮਲਿਆਂ ’ਤੇ ਨਿਸ਼ਾਨਾ ਸੇਧਿਆ ਅਤੇ ਕਿਹਾ ਕਿ ਅਤਿਵਾਦ ਨੂੰ ਕਿਸੇ ਧਰਮ ਜਾਂ ਨਾਗਰਿਕਤਾ ਨਾਲ ਨਹੀਂ ਜੋੜਿਆ ਜਾਣਾ ਚਾਹੀਦਾ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਖ਼ਤਰਨਾਕ ਆਲਮੀ ਮਾਹੌਲ ’ਚ ਭਾਰਤ ਤੇ ਬ੍ਰਾਜ਼ੀਲ ਨੂੰ ਰਣਨੀਤਕ ਸਬੰਧ ਮਜ਼ਬੂਤ ਕਰਨ ਦੀ ਲੋੜ ਹੈ ਅਤੇ ਦੋਵਾਂ ਮੁਲਕਾਂ ਵਿਚਾਲੇ ਗੱਲਬਾਤ ਦੋ ਅਹਿਮ ਦੇਸ਼ਾਂ ਦਾ ਨੇੜੇ ਆਉਣਾ ਹੈ। ਉਨ੍ਹਾਂ ਤਰਕ ਦਿੱਤਾ ਕਿ ਜਟਿਲਤਾ ਭਰੇ ਮਾਹੌਲ ਵਿੱਚ ਸੁਖਾਵਾਂ ਵਿਕਾਸ ਸੰਭਵ ਨਹੀਂ ਹੈ। ਉਨ੍ਹਾਂ ਬੀਤੇ ਵਰ੍ਹੇ ਹੋਈ ਬ੍ਰਿਕਸ ਸੰਮੇਲਨ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਵੱਲੋਂ ਦਿੱਤੀ ਗਈ ਟਿੱਪਣੀ ‘21ਵੀਂ ਸਦੀ ਦਾ ਸਾਫਟਵੇਅਰ 20ਵੀਂ ਸਦੀ ਦੇ ਟਾਈਪਰਾਈਟਰਾਂ ’ਤੇ ਨਹੀਂ ਚੱਲ ਸਕਦਾ’ ਦਾ ਹਵਾਲਾ ਵੀ ਦਿੱਤਾ।

ਦਵਾਈਆਂ ਬਣਾਉਣ ਲਈ ਸਮਝੌਤੇ ’ਤੇ ਹਸਤਾਖ਼ਰਨਵੀਂ ਦਿੱਲੀ: ਬਾਹੀਆਫਾਰਮਾ, ਬਾਇਓਕੋਨ ਬਾਇਓਲੌਜਿਕਸ ਲਿਮਟਿਡ ਅਤੇ ਬਾਇਓਨੋਵਿਸ ਨੇ ਦਵਾਈਆਂ ਬਣਾਉਣ ਲਈ ਸਮਝੌਤੇ (ਐੱਮ ਓ ਯੂ) ’ਤੇ ਹਸਤਾਖ਼ਰ ਕੀਤੇ ਹਨ। ਇਹ ਸਮਝੌਤਾ ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੁਈ ਇਨਾਸੀਓ ਲੂਲਾ ਡਿ ਸਿਲਵਾ ਅਤੇ ਭਾਰਤ ਦੇ ਵਣਜ ਅਤੇ ਵਪਾਰ ਮੰਤਰੀ ਪਿਊਸ਼ ਗੋਇਲ ਦੀ ਮੌਜੂਦਗੀ ਵਿੱਚ ਫਿੱਕੀ ਦੇ ਭਾਰਤ-ਬ੍ਰਾਜ਼ੀਲ ਬਿਜ਼ਨਸ ਫੋਰਮ ’ਚ ਸਹੀਬੱਧ ਕੀਤਾ ਗਿਆ ਜਿਸ ਨਾਲ ਬਰੈਸਟ ਕੈਂਸਰ ਦੇ ਇਲਾਜ ਲਈ ਬਣਨ ਵਾਲੀ ਦਵਾਈ ਪਰਟੁਜ਼ੂਮੈਬ ਤਿਆਰ ਕਰਨ ਦਾ ਰਾਹ ਪੱਧਰਾ ਹੋ ਗਿਆ ਹੈ।-ਪੀਟੀਆਈ