FIFA World Cup 2026: ਕੈਨੇਡਾ ਦੇ ਵੀਜ਼ਿਆਂ ਲਈ ਭਾਰਤ ਦੇ ਸਿਰਫ਼ 505 ਲੋਕਾਂ ਨੂੰ ਮਿਲੀ ਮਨਜ਼ੂਰੀ
ਵੱਡੀ ਗਿਣਤੀ ਵਿੱਚ ਬਿਨੈਕਾਰਾਂ ਨੂੰ ਵੀਜ਼ਾ ਤੋਂ ਨਾਂਹ; ਸੋਸ਼ਲ ਮੀਡੀਆ 'ਤੇ ਭੁਲੇਖਾ ਪਾਊ ਪ੍ਰਚਾਰ ਤੋਂ ਸਰਕਾਰ ਦੀ ਚਿਤਾਵਨੀ
ਉੱਤਰੀ ਅਮਰੀਕਾ ਵਿੱਚ 11 ਜੂਨ ਤੋਂ 19 ਜੁਲਾਈ 2026 ਤੱਕ ਹੋਏ ਫ਼ੀਫ਼ਾ ਵਿਸ਼ਵ ਕੱਪ ਦੌਰਾਨ ਕੈਨੇਡਾ ਵਿੱਚ ਮੈਚ ਦੇਖਣ ਦੀ ਇੱਛਾ ਰੱਖਣ ਵਾਲੇ ਹਜ਼ਾਰਾਂ ਵਿਦੇਸ਼ੀ ਪ੍ਰਸ਼ੰਸਕਾਂ ਨੂੰ ਵੀਜ਼ਾ ਨਾ ਮਿਲਣ ਕਾਰਨ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ।
ਇਮੀਗ੍ਰੇਸ਼ਨ, ਰਿਫ਼ਿਊਜੀ ਐਂਡ ਸਿਟੀਜ਼ਨਸ਼ਿਪ ਕੈਨੇਡਾ (IRCC) ਵੱਲੋਂ 'ਰੇਡੀਓ ਕੈਨੇਡਾ ਇੰਟਰਨੈਸ਼ਨਲ' ਨਾਲ ਸਾਂਝੇ ਕੀਤੇ ਅੰਕੜਿਆਂ ਅਨੁਸਾਰ, 14 ਨਵੰਬਰ 2025 ਤੋਂ 30 ਅਪਰੈਲ 2026 ਦਰਮਿਆਨ ਫ਼ੀਫ਼ਾ ਵਿਸ਼ਵ ਕੱਪ ਦੇ ਸੰਦਰਭ ਵਿੱਚ ਕੈਨੇਡੀਅਨ ਵਿਜ਼ਟਰ ਵੀਜ਼ੇ ਲਈ 28,595 ਅਰਜ਼ੀਆਂ ਪ੍ਰਾਪਤ ਹੋਈਆਂ। ਇਨ੍ਹਾਂ ਵਿੱਚੋਂ ਕੇਵਲ 6,535 ਬਿਨੈਕਾਰਾਂ ਨੂੰ ਹੀ ਵੀਜ਼ਾ ਜਾਰੀ ਕੀਤਾ ਗਿਆ, ਜਦਕਿ ਵੱਡੀ ਗਿਣਤੀ ਵਿੱਚ ਅਰਜ਼ੀਆਂ ਜਾਂ ਤਾਂ ਰੱਦ ਹੋ ਗਈਆਂ ਜਾਂ ਫ਼ੈਸਲੇ ਦੀ ਉਡੀਕ ਵਿੱਚ ਰਹੀਆਂ।
ਵੀਜ਼ਾ-ਮੁਕਤ ਦੇਸ਼ਾਂ ਲਈ ਪ੍ਰਕਿਰਿਆ ਰਹੀ ਸੁਖਾਲੀ
ਦੂਜੇ ਪਾਸੇ, ਕੈਨੇਡਾ ਦੇ ਵੀਜ਼ਾ-ਮੁਕਤ ਦੇਸ਼ਾਂ ਦੇ ਨਾਗਰਿਕਾਂ ਲਈ ਸਥਿਤੀ ਕਾਫ਼ੀ ਆਸਾਨ ਰਹੀ। ਆਸਟਰੇਲੀਆ, ਡੈਨਮਾਰਕ, ਫਿਨਲੈਂਡ, ਫਰਾਂਸ ਅਤੇ ਜਰਮਨੀ ਸਮੇਤ ਹੋਰ ਦੇਸ਼ਾਂ ਦੇ 4,110 ਨਾਗਰਿਕਾਂ ਨੇ ਇਲੈਕਟ੍ਰਾਨਿਕ ਟਰੈਵਲ ਆਥਰਾਈਜ਼ੇਸ਼ਨ (eTA) ਲਈ ਅਰਜ਼ੀ ਦਿੱਤੀ, ਜਿਨ੍ਹਾਂ ਵਿੱਚੋਂ 3,925 ਨੂੰ ਮਨਜ਼ੂਰੀ ਮਿਲ ਗਈ। ਜਿੱਥੇ ਵਿਜ਼ਟਰ ਵੀਜ਼ੇ ਦੀ ਫ਼ੀਸ 100 ਕੈਨੇਡੀਅਨ ਡਾਲਰ ਹੈ, ਉੱਥੇ eTA ਲਈ ਸਿਰਫ਼ 7 ਡਾਲਰ ਫ਼ੀਸ ਅਦਾ ਕਰਨੀ ਪੈਂਦੀ ਹੈ।
ਭਾਰਤ ਤੇ ਪਾਕਿਸਤਾਨ ਦੀ ਵੀਜ਼ਾ ਦਰ ਘੱਟ; ਘਾਨਾ ਤੇ ਸਪੇਨ ਅੱਗੇ
ਭਾਰਤ ਤੋਂ ਫ਼ੀਫ਼ਾ ਵਿਸ਼ਵ ਕੱਪ ਦੇ ਮੈਚਾਂ ਲਈ 2,460 ਲੋਕਾਂ ਨੇ ਵਿਜ਼ਟਰ ਵੀਜ਼ੇ ਦੀ ਅਰਜ਼ੀ ਦਿੱਤੀ ਸੀ, ਪਰ ਇਨ੍ਹਾਂ ਵਿੱਚੋਂ ਕੇਵਲ 505 ਬਿਨੈਕਾਰ ਹੀ ਵੀਜ਼ਾ ਪ੍ਰਾਪਤ ਕਰਨ ਵਿੱਚ ਸਫ਼ਲ ਰਹੇ। ਪਾਕਿਸਤਾਨ ਦੇ 2,255 ਬਿਨੈਕਾਰਾਂ ਵਿੱਚੋਂ ਸਿਰਫ਼ 155 ਨੂੰ ਮਨਜ਼ੂਰੀ ਮਿਲੀ, ਜੋ ਸਭ ਤੋਂ ਘੱਟ ਸਫ਼ਲਤਾ ਦਰਾਂ ਵਿੱਚੋਂ ਇੱਕ ਰਹੀ। ਇਸ ਦੇ ਉਲਟ, ਘਾਨਾ ਤੋਂ 3,185 ਅਰਜ਼ੀਆਂ ਵਿੱਚੋਂ 2,140 ਲੋਕਾਂ ਨੂੰ ਵੀਜ਼ਾ ਜਾਰੀ ਕੀਤਾ ਗਿਆ। ਵਿਸ਼ਵ ਕੱਪ ਜੇਤੂ ਸਪੇਨ ਦੇ ਸਾਰੇ 65 ਬਿਨੈਕਾਰਾਂ ਨੂੰ ਵੀ ਕੈਨੇਡਾ ਨੇ ਮਨਜ਼ੂਰੀ ਦੇ ਦਿੱਤੀ।
ਅਧਿਕਾਰੀ ਸੱਦੇ ਅਤੇ ਵਰਕ ਪਰਮਿਟ ਵਿੱਚ ਛੋਟ
ਫ਼ੀਫ਼ਾ ਵੱਲੋਂ ਮੈਚ ਅਧਿਕਾਰੀਆਂ, ਟੀਮ ਮੈਂਬਰਾਂ ਅਤੇ ਹੋਰ ਅਧਿਕਾਰਤ ਕੰਮਾਂ ਲਈ ਭੇਜੇ ਗਏ 2,450 ਸੱਦਾ ਪੱਤਰਾਂ ਵਿੱਚੋਂ ਲਗਪਗ 2,000 ਵਿਅਕਤੀਆਂ ਨੂੰ ਵੀਜ਼ਾ ਜਾਰੀ ਕੀਤਾ ਗਿਆ। ਇਸ ਤੋਂ ਇਲਾਵਾ ਟੂਰਨਾਮੈਂਟ ਨਾਲ ਸਬੰਧਿਤ ਕੁਝ ਅਸਥਾਈ ਕਰਮਚਾਰੀਆਂ ਲਈ ਵਰਕ ਪਰਮਿਟ ਦੀਆਂ ਸ਼ਰਤਾਂ ਵਿੱਚ ਵੀ ਛੋਟ ਦਿੱਤੀ ਗਈ ਤਾਂ ਜੋ ਪ੍ਰਬੰਧਾਂ ਵਿੱਚ ਕੋਈ ਰੁਕਾਵਟ ਨਾ ਆਵੇ।
ਝੂਠੇ ਪ੍ਰਚਾਰ ਤੋਂ ਸਾਵਧਾਨ ਰਹਿਣ ਦੀ ਅਪੀਲ
ਇਸ ਦੌਰਾਨ ਸੋਸ਼ਲ ਮੀਡੀਆ 'ਤੇ ਕਈ ਇਮੀਗ੍ਰੇਸ਼ਨ ਏਜੰਟਾਂ ਨੇ ਹਿੰਦੀ, ਉਰਦੂ ਅਤੇ ਪੰਜਾਬੀ ਵਿੱਚ ਵੀਡੀਓਜ਼ ਜਾਰੀ ਕਰਕੇ ਫ਼ੀਫ਼ਾ ਵਿਸ਼ਵ ਕੱਪ ਨੂੰ ਕੈਨੇਡਾ ਵਿੱਚ ਪੱਕੇ ਤੌਰ 'ਤੇ ਵੱਸਣ ਦਾ "ਸੁਨਹਿਰੀ ਮੌਕਾ" ਦੱਸਦਿਆਂ ਲੋਕਾਂ ਨੂੰ ਭਰਮਿਤ ਕਰਨ ਦੀ ਕੋਸ਼ਿਸ਼ ਕੀਤੀ। 'ਸੀ.ਬੀ.ਸੀ. ਨਿਊਜ਼' ਵੱਲੋਂ ਇਸ ਮਾਮਲੇ ਨੂੰ ਉਜਾਗਰ ਕਰਨ ਮਗਰੋਂ ਕੈਨੇਡੀਅਨ ਇਮੀਗ੍ਰੇਸ਼ਨ ਵਿਭਾਗ ਨੇ ਸਪੱਸ਼ਟ ਕੀਤਾ ਕਿ ਕੋਈ ਵੀ ਏਜੰਟ ਵੀਜ਼ੇ ਦੀ ਗਾਰੰਟੀ ਨਹੀਂ ਦੇ ਸਕਦਾ ਅਤੇ ਲੋਕਾਂ ਨੂੰ ਅਜਿਹੇ ਝੂਠੇ ਦਾਅਵਿਆਂ ਤੋਂ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ।
2026 ਵਿਸ਼ਵ ਕੱਪ ਦੇ ਮੇਜ਼ਬਾਨੀ ਪ੍ਰਬੰਧ
ਜ਼ਿਕਰਯੋਗ ਹੈ ਕਿ 2026 ਦਾ ਫ਼ੀਫ਼ਾ ਵਿਸ਼ਵ ਕੱਪ ਕੈਨੇਡਾ, ਅਮਰੀਕਾ ਅਤੇ ਮੈਕਸੀਕੋ ਵੱਲੋਂ ਸਾਂਝੇ ਤੌਰ 'ਤੇ ਕਰਵਾਇਆ ਗਿਆ। ਟੂਰਨਾਮੈਂਟ ਦੇ 104 ਮੈਚਾਂ ਵਿੱਚੋਂ 13 ਮੈਚ ਕੈਨੇਡਾ ਦੇ ਟੋਰਾਂਟੋ ਅਤੇ ਵੈਨਕੂਵਰ ਵਿੱਚ ਖੇਡੇ ਗਏ। ਫੈਡਰਲ ਸਰਕਾਰ ਨੇ ਸੁਰੱਖਿਆ ਪ੍ਰਬੰਧਾਂ ਲਈ 145 ਮਿਲੀਅਨ ਡਾਲਰ ਖ਼ਰਚ ਕੀਤੇ, ਜਦਕਿ ਮੇਜ਼ਬਾਨੀ 'ਤੇ ਕੁੱਲ ਲਾਗਤ ਇੱਕ ਅਰਬ ਡਾਲਰ ਤੋਂ ਵੱਧ ਰਹੀ।
