DMK ਨੇ ਸੂਬੇ ਭਰ ਵਿੱਚ Protest ਕੀਤੇ

ਤਾਮਿਲ ਨਾਡੂ ਵਿੱਚ ਮੁੱਖ ਵਿਰੋਧੀ ਪਾਰਟੀ ਡੀ ਐੱਮ ਕੇ ਨੇ ਅੱਜ ਮੁੱਖ ਮੰਤਰੀ ਸੀ ਜੋਸਫ ਵਿਜੈ ਵੱਲੋਂ ਮਰਹੂਮ ਪਾਰਟੀ ਆਗੂ ਮੁਤੁਵੇਲ ਕਰੁਨਾਨਿਧੀ ਅਤੇ ਪਾਰਟੀ ਪ੍ਰਧਾਨ ਐੱਮ ਕੇ ਸਟਾਲਿਨ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਦਿੱਤੇ ਗਏ ਕਥਿਤ ਅਪਮਾਨਜਨਕ ਬਿਆਨਾਂ ਦੀ ਨਿਖੇਧੀ ਕਰਦਿਆਂ ਪੂਰੇ ਸੂਬੇ ਵਿੱਚ ਪ੍ਰਦਰਸ਼ਨ ਕੀਤੇ। ਇੱਥੇ ਪ੍ਰਦਰਸ਼ਨ ਦੀ ਅਗਵਾਈ ਕਰ ਰਹੇ ਸੀਨੀਅਰ ਆਗੂ ਪੀ ਕੇ ਸੇਕਰ ਬਾਬੂ ਨੇ ਸਟਾਲਿਨ ਦੀ ਕੁਰਬਾਨੀ, ਸ਼ਖ਼ਸੀਅਤ ਅਤੇ ਇਨਸਾਨੀਅਤ ਦੀ ਪ੍ਰਸ਼ੰਸਾ ਕੀਤੀ ਅਤੇ ਉਨ੍ਹਾਂ ਨੂੰ ‘ਮਿਸਟਰ ਕਲੀਨ’ ਵਜੋਂ ਵੀ ਵਡਿਆਇਆ, ਜੋ ਨੈਤਿਕਤਾ ਅਤੇ ਕਦਰਾਂ-ਕੀਮਤਾਂ ਦੀ ਪਾਲਣਾ ਕਰਦੇ ਹਨ।

ਉਨ੍ਹਾਂ ਕਿਹਾ ਕਿ ਅਜਿਹੇ ਬੇਦਾਗ਼ ਨੇਤਾ ਨੂੰ ਟੀ ਵੀ ਕੇ ਦੀ ਅਗਵਾਈ ਵਾਲੀ ਸਰਕਾਰ ਵੱਲੋਂ ਵਿਧਾਨ ਸਭਾ ਵਿੱਚ ਨਿਸ਼ਾਨਾ ਬਣਾਇਆ ਗਿਆ ਅਤੇ ਡੀ ਐੱਮ ਕੇ ਨੇ ਬਦਨਾਮ ਐਮਰਜੈਂਸੀ (1975-77) ਦੌਰਾਨ ਸਟਾਲਿਨ ਦੀ ਕੈਦ ਦੇ ਸਬੰਧ ਵਿੱਚ ਕਾਨੂੰਨ ਮੰਤਰੀ ਆਰ ਨਿਰਮਲ ਕੁਮਾਰ ਦੇ ਦਾਅਵਿਆਂ ’ਤੇ ਇਤਰਾਜ਼ ਦਾਇਰ ਕੀਤਾ।

ਬਾਬੂ ਨੇ ਕਰੁਨਾਨਿਧੀ ਅਤੇ ਸਟਾਲਿਨ ਦੀ ਅਗਵਾਈ ਵਾਲੇ ਡੀ ਐੱਮ ਕੇ ਸ਼ਾਸਨ ਦੌਰਾਨ ਭ੍ਰਿਸ਼ਟਾਚਾਰ ਸਬੰਧੀ ਮੁੱਖ ਮੰਤਰੀ ਵਿਜੈ ਦੇ ਹਾਲ ਦੇ ਦੋਸ਼ਾਂ ਨੂੰ ਵਿਧਾਨ ਸਭਾ ਵਿੱਚ ਲਗਪਗ ਇੱਕ ਘੰਟੇ ਲਈ ਬੋਲੇ ਗਏ ਮਹਿਜ਼ ਸਿਨੇਮਾ ਸ਼ੈਲੀ ਦੇ ਡਾਇਲਾਗ ਕਰਾਰ ਦੇ ਕੇ ਖ਼ਾਰਜ ਕਰ ਦਿੱਤਾ। ਉਨ੍ਹਾਂ ਦਾਅਵਾ ਕੀਤਾ ਕਿ ਸਦਨ ਵਿੱਚ ਡੀ ਐੱਮ ਕੇ ਵੱਲੋਂ ਇਸ ਦਾ ਵਿਰੋਧ ਕੀਤਾ ਗਿਆ ਸੀ ਅਤੇ ਵਿਰੋਧੀ ਧਿਰ ਦੇ ਨੇਤਾ ਉਦੈਨਿਧੀ ਸਟਾਲਿਨ ਨੂੰ ਦੋਸ਼ਾਂ ਦਾ ਜਵਾਬ ਦੇਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ। ਉਨ੍ਹਾਂ ਨਾਲ ਹੀ ਕਿਹਾ, ‘‘ਡੀ ਐੱਮ ਕੇ ਇੱਕ ਜ਼ਖ਼ਮੀ ਸ਼ੇਰ ਹੈ ਜੋ ਮੈਦਾਨ ਵਿੱਚ ਖੜ੍ਹਾ ਹੈ ਅਤੇ ਇੱਕ ਦਿਨ ਹਰੇਕ ਚੀਜ਼ ਦਾ ਹਿਸਾਬ ਉਸੇ ਤਰੀਕੇ ਨਾਲ ਕੀਤਾ ਜਾਵੇਗਾ।’’