ਆਤਮ-ਨਿਰਭਰ ਤੇ ਸੁਰੱਖਿਅਤ ਭਾਰਤ ਲਈ ਰੱਖਿਆ ਖੇਤਰ ਅਹਿਮ: Rajnath Singh
ਡੀ ਆਰ ਡੀ ਓ ਦੇ ਪ੍ਰੋਗਰਾਮ ’ਚ ਸ਼ਿਰਕਤ ਕੀਤੀ
ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਮੰਗਲਵਾਰ ਨੂੰ ਕਿਹਾ ਕਿ ਭਵਿੱਖ ਦੀ ਜੰਗ ਵਿੱਚ ਤਕਨੀਕੀ ਅਗਵਾਈ ਹੀ ਰਣਨੀਤਕ ਤਰੱਕੀ ਦਾ ਰਾਹ ਪੱਧਰਾ ਕਰੇਗੀ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਸੋਚ ਨਾਲ ਹੀ ਭਲਕ ਦੀਆਂ ਫ਼ੌਜੀ ਸਮਰੱਥਾਵਾਂ ਬਣਨਗੀਆਂ। ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀ ਆਰ ਡੀ ਓ) ਵੱਲੋਂ ਕਰਵਾਏ ‘ਵਿਮਰਸ਼-2026’ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਰੱਖਿਆ ਮੰਤਰੀ ਨੇ ਕਿਹਾ ਕਿ 2047 ਤੱਕ ਵਿਕਸਿਤ ਭਾਰਤ ਦਾ ਟੀਚਾ ਮੁਲਕ ਨੂੰ ਸਿਰਫ਼ ਆਰਥਿਕ ਪੱਖੋਂ ਮਜ਼ਬੂਤ ਬਣਾਉਣਾ ਨਹੀਂ, ਸਗੋਂ ਤਕਨੀਕੀ ਤੌਰ ’ਤੇ ਆਤਮ-ਨਿਰਭਰ, ਸਮਾਜਿਕ ਤੌਰ ’ਤੇ ਸਮਾਵੇਸ਼ੀ, ਵਾਤਾਵਰਨ ਪੱਖੋਂ ਟਿਕਾਊ ਅਤੇ ਰਣਨੀਤਕ ਤੌਰ ’ਤੇ ਸੁਰੱਖਿਅਤ ਬਣਾਉਣਾ ਹੈ।
ਉਨ੍ਹਾਂ ਕਿਹਾ ਕਿ ਰੱਖਿਆ ਖੇਤਰ ਇਸ ਵਿਜ਼ਨ ਦਾ ‘ਨੀਂਹ ਪੱਥਰ’ ਹੈ। 2047 ਤੱਕ ਅਹਿਮ ਤਕਨਾਲੋਜੀਆਂ ਵਿੱਚ ਆਤਮ-ਨਿਰਭਰਤਾ, ਦੇਸੀ ਸਮੱਗਰੀ ਦੀ ਵੱਡੀ ਹਿੱਸੇਦਾਰੀ, ਰੱਖਿਆ ਬਰਾਮਦਾਂ ਵਿੱਚ ਵਾਧਾ ਅਤੇ ਵਿਸ਼ਵ ਸਪਲਾਈ ਚੇਨ ਵਿੱਚ ਭਾਰਤ ਦੀ ਮਜ਼ਬੂਤ ਮੌਜੂਦਗੀ ਯਕੀਨੀ ਬਣਾਉਣੀ ਹੋਵੇਗੀ। ਰਾਜਨਾਥ ਸਿੰਘ ਨੇ ਕਿਹਾ ਕਿ ਡੀ ਆਰ ਡੀ ਓ ਅਤੇ ਉਦਯੋਗ ਦਾ ਸਹਿਯੋਗ ਸਿਰਫ਼ ਉਤਪਾਦਨ ਤੱਕ ਸੀਮਤ ਨਾ ਰਹੇ ਸਗੋਂ ਖੋਜ, ਡਿਜ਼ਾਈਨ, ਟੈਸਟਿੰਗ, ਪ੍ਰਮਾਣੀਕਰਨ ਅਤੇ ਪੂਰੀ ਨਿਰਮਾਣ ਲੜੀ ਤੱਕ ਵਧਾਇਆ ਜਾਵੇ। ਉਨ੍ਹਾਂ ਏ ਆਈ ਤੇ ਡਰੋਨ ਵਰਗੀਆਂ ਉੱਭਰ ਰਹੀਆਂ ਤਕਨਾਲੋਜੀਆਂ ਵਿੱਚ ਤੇਜ਼ੀ ਨਾਲ ਨਵੀਨਤਾ ’ਤੇ ਜ਼ੋਰ ਦਿੱਤਾ। ਨਵੀਂ ਤਕਨਾਲੋਜੀ, ਖ਼ਾਸਕਰ ਏ ਆਈ ਅਤੇ ਡਰੋਨ ਭਵਿੱਖੀ ਜੰਗਾਂ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ ਅਤੇ ਉਨ੍ਹਾਂ ਇਸ ਸੈਕਟਰ ਤੋਂ ਤਕਨੀਕੀ ਖੋਜ ਤੇਜ਼ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ‘ਆਤਮ-ਨਿਰਭਰਤਾ’ ਸਿਰਫ਼ ਮਸ਼ੀਨਾਂ ਬਣਾਉਣ ਦਾ ਨਾਮ ਨਹੀਂ, ਸਗੋਂ ਇੱਕ ਸੋਚ ਹੋਣੀ ਚਾਹੀਦੀ ਹੈ।
