ਚੱਕਰਵਾਤ ‘ਦਿਤਵਾਹ’ ਕਾਰਨ ਤਾਮਿਲਨਾਡੂ ਦੇ ਕਈ ਜ਼ਿਲ੍ਹਿਆਂ ਵਿੱਚ ਭਾਰੀ ਮੀਂਹ

ਇੱਕ ਨਹਿਰ ਦੇ ਨੇੜੇ ਪਾਣੀ ਨਾਲ ਘਿਰੇ ਰਾਮਨਾਥਪੁਰਮ ਜ਼ਿਲ੍ਹੇ ਦੇ ਇੱਕ ਖੇਤਰ ਵਿੱਚ ਇੱਕ ਸੈਲਾਨੀ ਵੈਨ ਫਸ ਗਈ। ਹਾਲਾਂਕਿ, ਯਾਤਰੀ ਪਿਛਲੇ ਦਰਵਾਜ਼ੇ ਰਾਹੀਂ ਬਾਹਰ ਨਿਕਲਣ ਵਿੱਚ ਕਾਮਯਾਬ ਰਹੇ, ਜਿਸ ਕਾਰਨ ਉਨ੍ਹਾਂ ਦਾ ਬਚਾਅ ਹੋ ਗਿਆ। ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਤੇਜ਼ ਹਨੇਰੀ ਅਤੇ ਭਾਰੀ ਮੀਂਹ ਦੇ ਮਾੜੇ ਮੌਸਮੀ ਹਾਲਾਤਾਂ ਕਾਰਨ ਲੋਕਾਂ ਨੂੰ ਬਿਨਾਂ ਵਜ੍ਹਾ ਬਾਹਰ ਨਾ ਨਿਕਲਣ ਦੀ ਚੇਤਾਵਨੀ ਦਿੱਤੀ ਹੈ।

ਇੱਕ ਸਾਵਧਾਨੀ ਵਜੋਂ ਸੈਲਾਨੀਆਂ ਨੂੰ ਧਨੁਸ਼ਕੋਡੀ ਦਾ ਦੌਰਾ ਨਾ ਕਰਨ ਲਈ ਕਿਹਾ ਗਿਆ ਹੈ। ਇਹ ਕਸਬਾ 1964 ਦੇ ਰਾਮੇਸ਼ਵਰਮ ਚੱਕਰਵਾਤ ਵਿੱਚ ਤਬਾਹ ਹੋ ਗਿਆ ਸੀ। ਰਾਜ ਦੇ ਕਈ ਹਿੱਸਿਆਂ ਜਿਨ੍ਹਾਂ ਵਿੱਚ ਤੰਜਾਵੁਰ, ਨਾਗਾਪੱਟੀਨਮ, ਮਾਈਲਾਦੁਥੁਰਾਈ, ਥਿਰੂਵਿਡੈਮਰੂਦੁਰ, ਕੁੰਭਕੋਨਮ, ਪਾਪਾਨਸਮ, ਥਿਰੂਵਯਾਰੂ, ਪੱਟੂਕੋਟਈ, ਕੁਡਾਲੋਰ ਅਤੇ ਚੇਨਈ ਦੇ ਕੁਝ ਹਿੱਸੇ ਸ਼ਾਮਲ ਹਨ, ਵਿੱਚ ਭਾਰੀ ਮੀਂਹ ਪਿਆ।

ਮੀਂਹ ਕਾਰਨ ਪ੍ਰਭਾਵਿਤ ਹੋਣ ਵਾਲੇ ਜ਼ਿਲ੍ਹਿਆਂ ਦੇ ਪ੍ਰਸ਼ਾਸਨ ਨੂੰ ਦਿਨ ਲਈ ਸਕੂਲ ਬੰਦ ਕਰਨ ਦੇ ਹੁਕਮ ਦੇਣੇ ਪਏ ਹਨ। ਰਾਮਨਾਥਪੁਰਮ ਅਤੇ ਨਾਗਾਪੱਟੀਨਮ ਜ਼ਿਲ੍ਹਿਆਂ ਵਿੱਚ ਤੇਜ਼ ਹਵਾਵਾਂ ਅਤੇ ਉੱਚੀਆਂ ਲਹਿਰਾਂ ਦੇ ਨਾਲ ਮੀਂਹ ਪੈਣ ਦੀ ਖ਼ਬਰ ਹੈ।

ਭਾਰਤੀ ਮੌਸਮ ਵਿਭਾਗ ਨੇ ਕਿਹਾ, ‘‘ਤੱਟਵਰਤੀ ਸ੍ਰੀਲੰਕਾ ਅਤੇ ਨਾਲ ਲੱਗਦੇ ਦੱਖਣ-ਪੱਛਮੀ ਬੰਗਾਲ ਦੀ ਖਾੜੀ ਉੱਤੇ ਚੱਕਰਵਾਤੀ ਤੂਫ਼ਾਨ ਦਿਤਵਾਹ ਪਿਛਲੇ 6 ਘੰਟਿਆਂ ਦੌਰਾਨ 8 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਉੱਤਰ-ਉੱਤਰ-ਪੱਛਮ ਵੱਲ ਵਧਿਆ ਅਤੇ ਅੱਜ ਸਵੇਰੇ 5.30 ਵਜੇ ਦੱਖਣ-ਪੱਛਮੀ ਬੰਗਾਲ ਦੀ ਖਾੜੀ ਅਤੇ ਨਾਲ ਲੱਗਦੇ ਉੱਤਰੀ ਸ੍ਰੀਲੰਕਾ ਉੱਤੇ ਕੇਂਦਰਿਤ ਸੀ।"

ਨਿੱਜੀ ਮੌਸਮ ਬਲੌਗਰਾਂ ਨੇ ਕਿਹਾ ਕਿ ਚੱਕਰਵਾਤ ਦੇ ਟ੍ਰੈਕ ਵਿੱਚ ਕੋਈ ਬਦਲਾਅ ਨਹੀਂ ਹੋਇਆ ਹੈ ਅਤੇ ਇਹ ਤਾਮਿਲਨਾਡੂ ਤੱਟ ਦੇ ਸਮਾਨਾਂਤਰ ਚੱਲ ਰਿਹਾ ਹੈ ਅਤੇ ਇਹ ਅੱਜ ਰਾਤ ਤੱਕ ਚੇਨਈ, ਕੁਡਾਲੋਰ ਅਤੇ ਪੁਡੂਚੇਰੀ ਵਿੱਚ ਹੋਰ ਮੀਂਹ ਲਿਆਵੇਗਾ। -ਪੀਟੀਆਈ