ਛੱਤੀਸਗੜ੍ਹ: ਪ੍ਰਧਾਨ ਮੰਤਰੀ ਵੱਲੋਂ ਪੁਲੀਸ ਮੁਖੀਆਂ ਨਾਲ ਮੀਟਿੰਗ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਪੁਲੀਸ ਦੇ ਡਾਇਰੈਕਟਰ ਜਨਰਲਾਂ (ਡੀ ਜੀ ਪੀਜ਼) ਤੇ ਇੰਸਪੈਕਟਰ ਜਨਰਲਾਂ (ਆਈ ਜੀ ਪੀਜ਼) ਦੀ ਸਾਲਾਨਾ ਕਾਨਫਰੰਸ ਦੀ ਅਗਵਾਈ ਕੀਤੀ ਅਤੇ ਭਾਰਤ ਦੇ ਸੁਰੱਖਿਆ ਪ੍ਰਬੰਧਾਂ ਦੇ ਵੱਖ-ਵੱਖ ਪਹਿਲੂਆਂ ’ਤੇ ਤਫ਼ਸੀਲ ’ਚ ਵਿਚਾਰ-ਵਟਾਂਦਰਾ ਕੀਤਾ। ਸਰਕਾਰ ਨੇ ਇੱਕ ਬਿਆਨ ’ਚ ਇਹ ਜਾਣਕਾਰੀ ਦਿੱਤੀ। ਸ੍ਰੀ ਮੋਦੀ ਨੇ ਪੁਲੀਸ ਮੁਖੀਆਂ ਦੀ ਕਾਨਫਰੰਸ ਨੂੰ ‘‘ਇਸ ਖੇਤਰ ਵਿੱਚ ਸਰਵੋਤਮ ਅਭਿਆਸਾਂ ਅਤੇ ਆਧੁਨਿਕ ਪੱਖਾਂ ਨੂੰ ਸਾਂਝਾ ਕਰਨ ਦਾ ਬਿਹਤਰੀਨ ਪਲੈਟਫਾਰਮ’’ ਕਰਾਰ ਦਿੱਤਾ। ਰਾਏਪੁਰ ਵਿੱਚ ਸਥਿਤ ਇੰਸਟੀਚਿਊਟ ਆਫ ਮੈਨਜਮੈਂਟ ਵਿੱਚ ਦੇਸ਼ ਭਰ ਤੋਂ ਪੁਲੀਸ ਦੇ ਡਾਇਰੈਕਟਰ ਜਨਰਲਾਂ ਤੇ ਇੰਸਪੈਕਟਰ ਜਨਰਲਾਂ ਦੀ 60ਵੀਂ ਬੰਦ ਕਮਰਾ ਕਾਨਫਰੰਸ ਦਾ ਉਦਘਾਟਨ ਲੰਘੇ ਦਿਨ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕੀਤਾ ਸੀ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸ਼ੁੱਕਰਵਾਰ ਰਾਤ ਇੱਥੇ ਪਹੁੰਚੇ ਸਨ ਅਤੇ ਅੱਜ ਵਿਚਾਰ-ਵਟਾਂਦਰੇ ’ਚ ਸ਼ਾਮਲ ਹੋਏ।ਕਾਨਫਰੰਸ ਵਿੱਚ ਕੌਮੀ ਸੁਰੱਖਿਆ ਸਲਾਹਕਾਰ ਅਜੀਤ ਡੋਵਾਲ, ਇੰਟੈਲੀਜੈਂਸ ਬਿਊਰੋ (ਆਈ ਬੀ) ਦੇ ਮੁਖੀ ਤਪਨ ਕੁਮਾਰ ਡੇਕਾ ਤੇ ਕੇਂਦਰੀ ਜਾਂਚ ਬਿਊਰੋ (ਸੀ ਬੀ ਆਈ) ਦੇ ਡਾਇਰੈਕਟਰ ਪਰਵੀਨ ਸੂਦ ਤੋਂ ਇਲਾਵਾ ਕੇਂਦਰੀ ਤੇ ਸੂਬਾ ਬਲਾਂ ਦੇ ਹੋਰ ਪੁਲੀਸ ਮੁਖੀ ਸ਼ਾਮਲ ਹੋਏ।