CBSE ਵੱਲੋਂ ਚੇਅਰਮੈਨ ਤੇ ਸਕੱਤਰ ਦਾ ਤਬਾਦਲਾ

ਸਿੱਖਿਆ ਮੰਤਰਾਲੇ ਵਿਚਲੇ ਸੂਤਰਾਂ ਨੇ ਇਸ ਖ਼ਬਰ ਏਜੰਸੀ ਨੂੰ ਦੱਸਿਆ ਕਿ ਭਾਰਤ ਸਰਕਾਰ ਦੀਆਂ ਸਾਈਬਰ ਸੁਰੱਖਿਆ ਏਜੰਸੀਆਂ, ਜਿਨ੍ਹਾਂ ਵਿੱਚ ਭਾਰਤੀ ਸਾਈਬਰ ਕਰਾਈਮ ਕੋਆਰਡੀਨੇਸ਼ਨ ਸੈਂਟਰ (ਆਈ 4 ਸੀ) ਵੀ ਸ਼ਾਮਲ ਹੈ, ਸੀ ਬੀ ਐੱਸ ਈ ਦੇ ਔਨ-ਸਕਰੀਨ ਮਾਰਕਿੰਗ (ਓ ਐੱਸ ਐੱਮ) ਮੁੜ-ਮੁਲਾਂਕਣ ਪੋਰਟਲ ਨੂੰ ਨਿਸ਼ਾਨਾ ਬਣਾ ਕੇ ਕੀਤੇ ਸਾਈਬਰ ਹਮਲਿਆਂ ਉੱਤੇ ਨੇੜਿਓਂ ਨਜ਼ਰ ਰੱਖ ਰਹੀਆਂ ਹਨ ਤੇ ਸਬੰਧਤਾਂ ਖ਼ਿਲਾਫ਼ ਸਖ਼ਤ ਪੀਨਲ ਕਾਰਵਾਈ ਕੀਤੀ ਜਾਵੇਗੀ। ਸੀ ਬੀ ਐੱਸ ਈ ਨੇ ਉਪਰੋਕਤ ਕਾਰਵਾਈ ਅਜਿਹੇ ਮੌਕੇ ਕੀਤੀ ਹੈ ਜਦੋਂ ਬੋਰਡ ਨੂੰ ਆਪਣੇ ਪੋਸਟ-ਰਿਜ਼ਲਟ ਪੋਰਟਲ ਵਿੱਚ ਤਕਨੀਕੀ ਨਾਕਾਮੀ ਦੀਆਂ ਰਿਪੋਰਟਾਂ ਤੇ ਓ ਐੱਸ ਐੱਮ ਵਿੱਚ ਊਣਤਾਈਆਂ ਕਰ ਕੇ ਵੱਡਾ ਦਬਾਅ ਝੱਲਣਾ ਪੈ ਰਿਹਾ ਹੈ।

ਇਸੇ ਦੌਰਾਨ ਸੀਨੀਅਰ ਅਫਸਰਾਂ ਲੋਖੰਡੇ ਪ੍ਰਸ਼ਾਂਤ ਸੀਤਾਰਾਮ ਤੇ ਵਰੁਣ ਭਾਰਦਵਾਜ ਨੂੰ ਸੀ ਬੀ ਐੱਸ ਈ ਦਾ ਕ੍ਰਮਵਾਰ ਨਵਾਂ ਚੇਅਰਪਰਸਨ ਤੇ ਸਕੱਤਰ ਨਿਯੁਕਤ ਕੀਤਾ ਗਿਆ ਹੈ। ਸੀਤਾਰਾਮ 2001 ਬੈਚ ਦੇ ਏ ਜੀ ਐੱਮ ਯੂ ਟੀ ਕੇਡਰ ਦੇ ਆਈ ਏ ਐੱਸ ਅਧਿਕਾਰੀ ਹਨ ਤੇ ਇਸ ਵੇਲੇ ਗ੍ਰਹਿ ਮੰਤਰਾਲੇ ’ਚ ਵਧੀਕ ਸਕੱਤਰ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਨਿਯੁਕਤੀਆਂ ਬਾਰੇ ਕੈਬਨਿਟ ਕਮੇਟੀ ਨੇ ਇਨ੍ਹਾਂ ਨਿਯੁਕਤੀਆਂ ਨੂੰ ਪ੍ਰਵਾਨਗੀ ਦਿੱਤੀ ਹੈ। ਚੇਅਰਪਰਸਨ ਦੇ ਅਹੁਦੇ ਤੋਂ ਲਾਂਭੇ ਕੀਤੇ ਰਾਹੁਲ ਸਿੰਘ ਨੂੰ ਖੇਤੀ ਤੇ ਕਿਸਾਨ ਭਲਾਈ ਮੰਤਰਾਲੇ ’ਚ ਵਧੀਕ ਸਕੱਤਰ ਨਿਯੁਕਤ ਕੀਤਾ ਹੈ। ਇਸੇ ਤਰ੍ਹਾਂ ਸੀ ਬੀ ਐੱਸ ਈ ਸਕੱਤਰ ਹਿਮਾਂਸ਼ੂ ਗੁੁਪਤਾ (2012 ਬੈਚ ਆਈ ਏ ਐੱਸ ਅਧਿਕਾਰੀ) ਨੂੰ ਵਾਪਸ ਉਨ੍ਹਾਂ ਦੇ ਪਿੱਤਰੀ ਕੇਡਰ ਭੇਜ ਦਿੱਤਾ ਹੈ। ਉਨ੍ਹਾਂ ਦੀ ਥਾਂ ਲਗਾਏ ਵਰੁਣ ਭਾਰਦਵਾਜ 2008 ਬੈਚ ਦੇ ਭਾਰਤੀ ਸੂਚਨਾ ਸੇਵਾ ਕਮਿਸ਼ਨ ਦੇ ਅਧਿਕਾਰੀ ਹਨ। ਉਹ ਮੌਜੂਦਾ ਸਮੇਂ ਸਿੱਖਿਆ ਮੰਤਰਾਲੇ ’ਚ ਡਾਇਰੈਕਟਰ ਸਨ।

17 ਸਾਲਾ ਸਾਰਥਕ ਸਿਧਾਂਤ ਸੰਸਦੀ ਕਮੇਟੀ ਅੱਗੇ ਪੇਸ਼

ਨਵੀਂ ਦਿੱਲੀ: ਸੀ ਬੀ ਐੱਸ ਈ ਦੇ ਆਨਲਾਈਨ ਮਾਰਕਿੰਗ ਸਿਸਟਮ ਦੀ ਮਾਰ ਝੱਲਣ ਵਾਲੇ ਝਾਰਖੰਡ ਦੇ 17 ਸਾਲਾ ਵਿਦਿਆਰਥੀ ਸਾਰਥਕ ਸਿਧਾਂਤ ਨੇ ਮੰਗਲਵਾਰ ਨੂੰ ਸੰਸਦੀ ਕਮੇਟੀ ਅੱਗੇ ਪੇਸ਼ ਹੋ ਕੇ 12ਵੀਂ ਜਮਾਤ ਦੀਆਂ ਪ੍ਰੀਖਿਆਵਾਂ ਵਿੱਚ ਆਨਲਾਈਨ ਮਾਰਕਿੰਗ ਲਈ ਵਿਕਰੇਤਾ ਦੀ ਚੋਣ ਲਈ ਟੈਂਡਰਿੰਗ ਅਮਲ ਵਿੱਚ ਕਥਿਤ ਬੇਨਿਯਮੀਆਂ ਬਾਰੇ ਪੇਸ਼ਕਾਰੀ ਦਿੱਤੀ। ਸੂਤਰਾਂ ਨੇ ਦੱਸਿਆ ਕਿ ਸਾਰਥਕ, ਜੋ ਖ਼ੁਦ ਪ੍ਰੀਖਿਆ ਵਿੱਚ ਬੈਠਾ ਸੀ, ਨੇ ਸੀ ਬੀ ਐੱਸ ਈ ਦੀ ਆਨਲਾਈਨ ਮਾਰਕਿੰਗ ਲਈ ਵਿਕਰੇਤਾਵਾਂ ਦੀ ਚੋਣ ਕਰਨ ਲਈ ਟੈਂਡਰਿੰਗ ਅਮਲ ਵਿੱਚ ਊਣਤਾਈਆਂ ਵੱਲ ਇਸ਼ਾਰਾ ਕੀਤਾ ਅਤੇ ਬੋਰਡ ਲਈ ਪ੍ਰਸ਼ਨਾਂ ਦਾ ਇੱਕ ਸੈੱਟ ਰੱਖਿਆ। ਉਸ ਨੇ ਸੰਸਦੀ ਕਮੇਟੀ ਅੱਗੇ ਆਪਣੀਆਂ ਲੱਭਤਾਂ ਬਾਰੇ ਸੱਤ ਸਫ਼ਿਆਂ ਦੀ ਕਾਪੀ ਵੀ ਰੱਖੀ। ਕਾਂਗਰਸ ਐੱਮ ਪੀ ਦਿਗਵਿਜੈ ਸਿੰਘ ਦੀ ਅਗਵਾਈ ਵਾਲੀ ਕਮੇਟੀ ਨੇ ਬੜੇ ਠਰੰਮੇ ਨਾਲ ਉਸ ਦੀ ਗੱਲ ਸੁਣੀ ਤੇ ਸੀ ਬੀ ਐੱਸ ਈ ਅਧਿਕਾਰੀਆਂ ਤੋਂ ਉਸ ਦੇ ਜਵਾਬ ਮੰਗੇ।

 

‘ਮਾੜੇ ਅਨਸਰਾਂ’ ਵੱਲੋਂ ਮੁੜ-ਮੁਲਾਂਕਣ ਪੋਰਟਲ ’ਚ ਅੜਿੱਕਾ ਡਾਹੁਣ ਦੀ ਕੋੋਸ਼ਿਸ਼: ਸੀ ਬੀ ਐੱਸ ਈ

ਨਵੀਂ ਦਿੱਲੀ: ਸੀ ਬੀ ਐੱਸ ਈ ਨੇ ਮੰਗਲਵਾਰ ਨੂੰ ਕਿਹਾ ਕਿ ‘ਮਾੜੇ ਅਨਸਰਾਂ’ ਨੇ ਸਾਈਬਰ ਹਮਲਿਆਂ ਰਾਹੀਂ ਇਸ ਦੇ ਪੁਨਰ-ਮੁਲਾਂਕਣ ਪੋਰਟਲ ’ਤੇ ਸੇਵਾਵਾਂ ਵਿੱਚ ਅੜਿੱਕਾ ਡਾਹੁਣ ਦੀ ਕੋਸ਼ਿਸ਼ ਕੀਤੀ, ਜਿਸ ਵਿੱਚ ਸੇਵਾ ਤੋਂ ਇਨਕਾਰ ਕਰਨ ਵਾਲਾ ਹਮਲਾ ਵੀ ਸ਼ਾਮਲ ਹੈ। ਇਸ ਕਾਰਨ ਪਲੈਟਫਾਰਮ ’ਤੇ ਦੋ ਮਿੰਟਾਂ ਅੰਦਰ 15 ਲੱਖ ਹਿੱਟ ਹੋਏ ਅਤੇ ਅਣਅਧਿਕਾਰਤ ਫਾਈਲ ਐਕਸੈਸ ਦੀਆਂ ਇੱਕ ਲੱਖ ਤੋਂ ਵੱਧ ਕੋਸ਼ਿਸ਼ਾਂ ਹੋਈਆਂ। ਬੋਰਡ ਨੇ ਕਿਹਾ ਕਿ ਪੋਰਟਲ ਇਸ ਵੇਲੇ 8,000 ਤੋਂ ਵੱਧ ਸਮਕਾਲੀ ਵਰਤੋਕਾਰਾਂ ਦਾ ਸਮਰਥਨ ਕਰ ਰਿਹਾ ਹੈ, ਅਤੇ 16,000 ਤੋਂ ਵੱਧ ਵਿਦਿਆਰਥੀਆਂ ਨੇ ਦੁਪਹਿਰ 3 ਵਜੇ ਤੱਕ ਆਪਣੀਆਂ ਅਰਜ਼ੀਆਂ ਸਫ਼ਲਤਾਪੂਰਵਕ ਜਮ੍ਹਾਂ ਕੀਤੀਆਂ ਹਨ।