ਬੱਸ ਡਰਾਈਵਰ ਨੇ 34 ਸਵਾਰੀਆਂ ਨੂੰ ਬਚਾਉਣ ਲਈ ਆਪਣੀ ਜਾਨ ਕੀਤੀ ਕੁਰਬਾਨ

ਉੱਤਰਾਖੰਡ ਰੋਡਵੇਜ਼ ਦੇ ਇੱਕ ਬੱਸ ਡਰਾਈਵਰ ਨੇ ਬੁੱਧਵਾਰ ਨੂੰ ਇੱਥੇ ਇੱਕ ਉਤਰਾਈ (ਢਲਾਣ) 'ਤੇ ਬੱਸ ਦੀਆਂ ਬ੍ਰੇਕਾਂ ਫੇਲ੍ਹ ਹੋਣ ਤੋਂ ਬਾਅਦ ਵਾਹਨ ਨੂੰ ਪਹਾੜੀ ਵੱਲ ਮੋੜ ਕੇ 34 ਸਵਾਰੀਆਂ ਦੀ ਜਾਨ ਬਚਾਈ।

ਹਾਲਾਂਕਿ, ਚੰਪਾਵਤ ਦੇ ਰਹਿਣ ਵਾਲੇ ਬੇਨੀਰਾਮ ਥਵਾਲ (49) ਦੀ ਬੱਸ ਦੇ ਅਗਲੇ ਪਹੀਏ ਹੇਠਾਂ ਕੁਚਲੇ ਜਾਣ ਕਾਰਨ ਮੌਤ ਹੋ ਗਈ।

ਇਹ ਘਟਨਾ ਆਲ-ਵੈਦਰ ਰੋਡ (ਹਰ ਮੌਸਮ ਅਨੁਕੂਲ ਸੜਕ) 'ਤੇ ਚੰਪਾਵਤ ਤੋਂ ਕਰੀਬ 18 ਕਿਲੋਮੀਟਰ ਦੂਰ ਮਰੋੜਾਖਾਨ ਨੇੜੇ ਸਵੇਰੇ 10 ਵਜੇ ਦੇ ਕਰੀਬ ਵਾਪਰੀ। ਬੱਸ ਧਾਰਚੂਲਾ ਤੋਂ ਟਨਕਪੁਰ ਜਾ ਰਹੀ ਸੀ ਜਦੋਂ ਇੱਕ ਉਤਰਾਈ ਵਾਲੇ ਹਿੱਸੇ 'ਤੇ ਇਸ ਦੀਆਂ ਬ੍ਰੇਕਾਂ ਫੇਲ੍ਹ ਹੋ ਗਈਆਂ।

ਉੱਤਰਾਖੰਡ ਟਰਾਂਸਪੋਰਟ ਕਾਰਪੋਰੇਸ਼ਨ ਦੇ ਟਨਕਪੁਰ ਡਿਵੀਜ਼ਨ ਦੇ ਅਸਿਸਟੈਂਟ ਰੀਜਨਲ ਮੈਨੇਜਰ ਸੁਰੇਸ਼ ਪਾਂਡੇ ਨੇ ਦੱਸਿਆ ਕਿ ਡਰਾਈਵਰ ਨੇ ਬੱਸ ਨੂੰ ਰੋਕਣ ਅਤੇ ਸਵਾਰੀਆਂ ਦੀ ਰੱਖਿਆ  ਲਈ ਵਾਹਨ ਨੂੰ ਸੱਜੇ ਪਾਸੇ ਪਹਾੜੀ ਵੱਲ ਮੋੜ ਦਿੱਤਾ।

ਟੱਕਰ ਦੌਰਾਨ ਡਰਾਈਵਰ ਵਾਹਨ ਵਿੱਚੋਂ ਬਾਹਰ ਡਿੱਗ ਗਿਆ ਅਤੇ ਬੱਸ ਦੇ ਅਗਲੇ ਪਹੀਏ ਦੇ ਹੇਠਾਂ ਆ ਗਿਆ। ਪਹੀਏ ਹੇਠਾਂ ਕੁਚਲੇ ਜਾਣ ਕਾਰਨ ਉਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।

ਪੁਲੀਸ ਨੇ ਦੱਸਿਆ ਕਿ ਮਾਮੂਲੀ ਜ਼ਖਮੀ ਹੋਈ ਇੱਕ ਔਰਤ ਨੂੰ ਛੱਡ ਕੇ ਬਾਕੀ ਸਾਰੀਆਂ ਸਵਾਰੀਆਂ ਸੁਰੱਖਿਅਤ ਬਚ ਗਈਆਂ। ਉਨ੍ਹਾਂ ਦੱਸਿਆ ਕਿ ਜ਼ਖਮੀ ਸਵਾਰੀ ਦਾ ਲੋਹਾਘਾਟ ਉਪ-ਜ਼ਿਲ੍ਹਾ  ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ।