Himachal Pradesh ਵਿੱਚ 98 ਸੜਕਾਂ ਬੰਦ; 30 ਅਗਸਤ ਤੱਕ ਮੀਂਹ ਜਾਰੀ ਰਹਿਣ ਦੀ ਸੰਭਾਵਨਾ

ਮੌਨਸੂਨ ਸੀਜ਼ਨ ਦੌਰਾਨ ਪੈ ਰਹੇ ਭਾਰੀ ਮੀਂਹ ਕਾਰਨ ਨੁਕਸਾਨ ਹੋਣ ਕਰਕੇ ਪੂਰੇ ਹਿਮਾਚਲ ਪ੍ਰਦੇਸ਼ ਵਿੱਚ ਕੁੱਲ 98 ਸੜਕਾਂ ਬੰਦ ਪਈਆਂ ਹਨ, ਜਦੋਂ ਕਿ ਲਗਪਗ 21 ਟਰਾਂਸਫਾਰਮਰ ਅਤੇ 21 ਪੀਣ ਵਾਲੇ ਪਾਣੀ ਦੀਆਂ ਸਪਲਾਈ ਯੋਜਨਾਵਾਂ ਪ੍ਰਭਾਵਿਤ ਹੋਈਆਂ ਹਨ।

ਸਟੇਟ ਐਮਰਜੈਂਸੀ ਅਪਰੇਸ਼ਨ ਸੈਂਟਰ ਦੇ ਅਨੁਸਾਰ, ਕੁੱਲ ਬੰਦ ਸੜਕਾਂ ਵਿੱਚੋਂ ਮੰਡੀ ਵਿੱਚ 49, ਕੁੱਲੂ ਵਿੱਚ 28 , ਕਾਂਗੜਾ ਵਿੱਚ ਅੱਠ, ਸ਼ਿਮਲਾ, ਊਨਾ ਅਤੇ ਸਿਰਮੌਰ ਵਿੱਚ ਚਾਰ-ਚਾਰ ਅਤੇ ਲਾਹੌਲ ਤੇ ਸਪੀਤੀ ਵਿੱਚ ਇੱਕ ਸੜਕ ਬੰਦ ਹੈ। ਇਸੇ ਤਰ੍ਹਾਂ, ਕੁੱਲੂ ਵਿੱਚ 17, ਕਾਂਗੜਾ ਵਿੱਚ ਤਿੰਨ ਅਤੇ ਸ਼ਿਮਲਾ ਵਿੱਚ ਇੱਕ ਟਰਾਂਸਫਾਰਮਰ ਪ੍ਰਭਾਵਿਤ ਹੈ।

ਇਸ ਦੌਰਾਨ, 20 ਅਗਸਤ ਤੱਕ ਪੂਰੇ ਸੂਬੇ ਵਿੱਚ ਹਲਕੇ ਤੋਂ ਦਰਮਿਆਨੇ ਮੀਂਹ ਦੇ ਜਾਰੀ ਰਹਿਣ ਦੀ ਉਮੀਦ ਹੈ। ਜਿੱਥੇ ਅਗਲੇ ਤਿੰਨ ਤੋਂ ਚਾਰ ਦਿਨਾਂ ਵਿੱਚ ਵੱਧ ਤੋਂ ਵੱਧ ਤਾਪਮਾਨ 2 ਡਿਗਰੀ ਸੈਲਸੀਅਸ ਤੋਂ 4 ਡਿਗਰੀ ਸੈਲਸੀਅਸ  ਤੱਕ ਵਧਣ ਸੰਭਾਵਨਾ ਹੈ, ਉੱਥੇ ਹੀ ਘੱਟੋ-ਘੱਟ ਤਾਪਮਾਨ ਆਮ ਰਹਿਣ ਦੀ ਉਮੀਦ ਹੈ।

ਇਸ ਤੋਂ ਇਲਾਵਾ, ਪਿਛਲੇ 24 ਘੰਟਿਆਂ ਦੌਰਾਨ ਸੂਬੇ ਦੇ ਕਈ ਹਿੱਸਿਆਂ ਵਿੱਚ ਭਾਰੀ ਮੀਂਹ ਪੈਂਦਾ ਰਿਹਾ। ਬਿਲਾਸਪੁਰ ਵਿੱਚ ਨੈਣਾ ਦੇਵੀ ਵਿਖੇ 70 ਮਿਲੀਮੀਟਰ, ਧਰਮਸ਼ਾਲਾ ਵਿੱਚ 36.2 ਮਿਲੀਮੀਟਰ, ਕਾਂਗੜਾ ਵਿੱਚ 26.8 ਮਿਲੀਮੀਟਰ, ਊਨਾ ਵਿੱਚ 21.6 ਮਿਲੀਮੀਟਰ, ਸੋਲਨ ਵਿੱਚ 13.4 ਮਿਲੀਮੀਟਰ, ਮੰਡੀ ਵਿੱਚ 12.8 ਮਿਲੀਮੀਟਰ, ਅਤੇ ਨਾਹਨ ਵਿੱਚ 8.9 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ।