ਤਿੱਬਤ ਵਿੱਚ Isha Foundation ਦੇ 77 ਮੈਂਬਰ ਲਾਪਤਾ
ਹੜ੍ਹ ਦੇ ਸਮੇਂ ਇਮੀਗ੍ਰੇਸ਼ਨ ਦਫ਼ਤਰ ਵਿੱਚ ਮੌਜੂਦ ਸੀ ਈਸ਼ਾ ਫਾਊਂਡੇਸ਼ਨ ਦਾ ਇਹ ਸਮੂਹ
ਚੀਨ-ਨੇਪਾਲ ਸਰਹੱਦ ਨੇੜਲੇ ਇਲਾਕਿਆਂ ਵਿੱਚ ਆਏ ਭਿਆਨਕ ਹੜ੍ਹ ਤੋਂ ਬਾਅਦ ਈਸ਼ਾ ਫਾਊਂਡੇਸ਼ਨ ਦੇ 77 ਤੀਰਥ ਯਾਤਰੀ ਅਜੇ ਵੀ ਲਾਪਤਾ ਹਨ। ਇਸ ਹੜ੍ਹ ਵਿੱਚ ਸੈਂਕੜੇ ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂ ਕਿ ਹਜ਼ਾਰਾਂ ਲੋਕ ਲਾਪਤਾ ਹਨ।
ਤਿੱਬਤ ਖੁਦਮੁਖਤਿਆਰ ਖੇਤਰ ਦੇ ਗਯਿਰੋਂਗ ਟਾਊਨਸ਼ਿਪ ਵਿੱਚ ਬੁੱਧਵਾਰ ਸਵੇਰੇ ਅਚਾਨਕ ਆਏ ਹੜ੍ਹ ਨੇ ਚੀਨ-ਨੇਪਾਲ ਸਰਹੱਦ ਖੇਤਰ ਦੇ ਨੇੜੇ ਸਥਿਤ ਪਿੰਡਾਂ ਅਤੇ ਕਸਬਿਆਂ ਵਿੱਚ ਭਾਰੀ ਤਬਾਹੀ ਮਚਾਈ। ਇਸ ਦੌਰਾਨ ਤਿੱਬਤ ਵਿੱਚ ਤਿੰਨ ਅਤੇ ਨੇਪਾਲ ਵਿੱਚ 359 ਲੋਕਾਂ ਦੀ ਮੌਤ ਹੋ ਗਈ, ਜਦੋਂ ਕਿ ਸੈਂਕੜੇ ਲੋਕ ਲਾਪਤਾ ਹਨ।
ਭਾਰਤੀ ਅਧਿਆਤਮਿਕ ਗੁਰੂ ਜੱਗੀ ਵਾਸੂਦੇਵ ਸਾਧਗੁਰੂ ਦੁਆਰਾ ਸਥਾਪਿਤ ਸੰਸਥਾ, ਈਸ਼ਾ ਫਾਊਂਡੇਸ਼ਨ ਦੀ ਅਗਵਾਈ ਵਾਲੀ 77 ਮੈਂਬਰੀ ਟੀਮ ਦਾ ਅਜੇ ਤੱਕ ਕੁੱਝ ਪਤਾ ਨਹੀਂ ਲੱਗਿਆ ਹੈ।
ਈਸ਼ਾ ਫਾਊਂਡੇਸ਼ਨ ਹਰ ਸਾਲ ਕੈਲਾਸ਼ ਮਾਨਸਰੋਵਰ ਦੀਆਂ ਕਈ ਤੀਰਥ ਯਾਤਰਾਵਾਂ ਦਾ ਆਯੋਜਨ ਕਰਦੀ ਹੈ। ਤੀਰਥ ਯਾਤਰੀਆਂ ਦਾ ਸਮੂਹ ਕਾਠਮੰਡੂ ਤੋਂ ਨੇਪਾਲ ਹੁੰਦੇ ਹੋਏ ਤਿੱਬਤ ਜਾਂਦਾ ਹੈ, ਜਿੱਥੇ ਯਾਤਰਾ ਦੌਰਾਨ ਪੈਦਲ ਟ੍ਰੈਕਿੰਗ ਵੀ ਕਰਨੀ ਪੈਂਦੀ ਹੈ।
ਸਦਗੁਰੂ ਨੇ ਬੁੱਧਵਾਰ ਨੂੰ ਫੇਸਬੁੱਕ ਦੇ ਆਪਣੇ ਆਧਿਕਾਰਤ ਪੇਜ 'ਤੇ ਸਾਂਝੇ ਕੀਤੇ ਗਏ ਸੁਨੇਹੇ ਵਿੱਚ ਕਿਹਾ ਕਿ ਕੈਲਾਸ਼ ਤੀਰਥ ਯਾਤਰਾ 'ਤੇ ਗਿਆ ਉਨ੍ਹਾਂ ਦਾ ਇੱਕ ਸਮੂਹ ਨੇਪਾਲ ਪਰਤਦੇ ਸਮੇਂ ਅਚਾਨਕ ਆਏ ਹੜ੍ਹ ਵਿੱਚ ਫਸ ਗਿਆ।
ਉਨ੍ਹਾਂ ਦੱਸਿਆ ਕਿ ਹੜ੍ਹ ਆਉਣ ਸਮੇਂ ਇਹ ਸਮੂਹ ਜਿਰੋਂਗ ਸਥਿਤ ਇਮੀਗ੍ਰੇਸ਼ਨ ਦਫ਼ਤਰ ਵਿੱਚ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਹੜ੍ਹ ਦਾ ਪਾਣੀ ਦਫ਼ਤਰ ਦੀ ਇਮਾਰਤ ਅਤੇ ਸ਼ਹਿਰ ਦੇ ਵੱਡੇ ਹਿੱਸੇ ਵਿੱਚ ਭਰ ਗਿਆ। ਉਨ੍ਹਾਂ ਕਿਹਾ ਕਿ ਨੇਪਾਲ ਦੇ ਤਿਮੁਰੇ ਵਿੱਚ ਤਿੰਨ ਸਵੈ-ਸੇਵਕ ਫਸੇ ਹੋਏ ਸਨ।
ਸਦਗੁਰੂ ਨੇ ਕਿਹਾ ਕਿ ਇਮੀਗ੍ਰੇਸ਼ਨ ਦਫ਼ਤਰ ਵਿੱਚ ਮੌਜੂਦ ਲਾਪਤਾ ਲੋਕਾਂ ਦੇ ਠਿਕਾਣੇ ਬਾਰੇ ਅਜੇ ਕੋਈ ਆਧਿਕਾਰਤ ਜਾਣਕਾਰੀ ਨਹੀਂ ਹੈ।
ਨੇਪਾਲ ਸਰਕਾਰ ਨੇ ਕਿਹਾ ਹੈ ਕਿ ਉਸ ਇਮੀਗ੍ਰੇਸ਼ਨ ਕੇਂਦਰ ਦੇ ਸਾਰੇ ਕਰਮਚਾਰੀ ਸੰਪਰਕ ਤੋਂ ਬਾਹਰ ਹਨ।
ਲਾਪਤਾ ਤੀਰਥ ਯਾਤਰੀਆਂ ਵਿੱਚ ਅਮਰੀਕਾ ਦੇ 22, ਕੈਨੇਡਾ ਦੇ 12, ਆਸਟਰੇਲੀਆ ਦੇ 11, ਬ੍ਰਿਟੇਨ ਦੇ ਨੌਂ, ਜਰਮਨੀ ਦੇ ਚਾਰ, ਫਰਾਂਸ ਅਤੇ ਨੇਪਾਲ ਦੇ ਤਿੰਨ-ਤਿੰਨ, ਨੀਦਰਲੈਂਡ, ਨਿਊਜ਼ੀਲੈਂਡ, ਸਿੰਗਾਪੁਰ ਅਤੇ ਸਪੇਨ ਦੇ ਦੋ-ਦੋ ਅਤੇ ਫਿਨਲੈਂਡ, ਹੰਗਰੀ, ਇਜ਼ਰਾਈਲ, ਲਿਥੁਆਨੀਆ, ਫਿਲੀਪੀਨਜ਼, ਪੁਰਤਗਾਲ, ਰੂਸ ਅਤੇ ਦੱਖਣੀ ਅਫ਼ਰੀਕਾ ਦਾ ਇੱਕ-ਇੱਕ ਨਾਗਰਿਕ ਸ਼ਾਮਲ ਹੈ।
ਸਦਗੁਰੂ ਨੇ ਲਿਖਿਆ, "ਅਸੀਂ ਅਧਿਕਾਰੀਆਂ ਨਾਲ ਮਿਲ ਕੇ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ ਕਿ ਕੀ ਅਸੀਂ ਉਸ ਸਥਾਨ ਤੱਕ ਪਹੁੰਚ ਸਕਦੇ ਹਾਂ। ਜੋਖਮ ਭਾਵੇਂ ਜਿੰਨਾ ਵੀ ਹੋਵੇ, ਅਸੀਂ ਬਚਾਅ ਅਭਿਆਨ ਵਿੱਚ ਸ਼ਾਮਲ ਹੋਣ ਲਈ ਤਿਆਰ ਹਾਂ।"
ਉਨ੍ਹਾਂ ਦੱਸਿਆ ਕਿ ਤੀਰਥ ਯਾਤਰਾ ਵਿੱਚ 21 ਸਮੂਹ ਸ਼ਾਮਲ ਸਨ, ਜਿਨ੍ਹਾਂ ਵਿੱਚੋਂ 495 ਲੋਕ ਸੁਰੱਖਿਅਤ ਪਰਤ ਚੁੱਕੇ ਹਨ, ਜਦੋਂ ਕਿ 743 ਲੋਕ ਫਿਲਹਾਲ ਤਿੱਬਤ ਅਤੇ 148 ਲੋਕ ਨੇਪਾਲ ਵਿੱਚ ਹਨ।
ਸਦਗੁਰੂ ਨੇ ਕਿਹਾ ਕਿ ਉਹ ਇਸ ਖੇਤਰ ਵਿੱਚ ਮੌਜੂਦ ਹਨ ਅਤੇ ਬਚਾਅ ਅਭਿਆਨ ਜਾਰੀ ਹੈ।
