ਨਸ਼ਾ ਤਸਕਰੀ: ਫਾਰਮਾ ਕੰਪਨੀ ਦੇ ਮਾਲਕਾਂ ਦੇ ਗ੍ਰਿਫ਼ਤਾਰੀ ਵਾਰੰਟ

ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐੱਨ ਸੀ ਬੀ) ਦੀ ਚੰਡੀਗੜ੍ਹ ਯੂਨਿਟ ਨੇ ਹਿਮਾਚਲ ਦੇ ਕਾਲਾ ਅੰਬ ’ਚ ਡਿਜੀਟਲ ਵਿਜ਼ਨ ਨਾਮਕ ਫਾਰਮਾ ਕੰਪਨੀ ਦੇ ਮਾਲਕਾਂ ਵਿਰੁੱਧ ਕਥਿਤ ਤੌਰ ’ਤੇ 600 ਕਰੋੜ ਰੁਪਏ ਦੀ ਨਸ਼ਾ ਤਸਕਰੀ ਮਾਮਲੇ ਵਿੱਚ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਹਨ। ਮੁਲਜ਼ਮ ਪਰਸ਼ੋਤਮ ਲਾਲ ਗੋਇਲ ਨਿਵਾਸੀ ਅੰਬਾਲਾ ਤੇ ਉਸ ਦੇ ਪੁੱਤਰ ਕੋਨਿਕ ਅਤੇ ਮੈਨਿਕ ਗੋਇਲ ਮਹੀਨਿਆਂ ਤੋਂ ਐੱਨ ਸੀ ਬੀ ਦੀ ਤਿੱਖੀ ਨਜ਼ਰ ਹੇਠ ਸਨ। ਪਹਿਲੀ ਨਵੰਬਰ ਨੂੰ ਐੱਨ ਸੀ ਬੀ ਨੇ ਮੁਲਜ਼ਮ ਅਨੁਜ ਕੁਮਾਰ ਨੂੰ ਗ੍ਰਿਫ਼ਤਾਰ ਕੀਤਾ। ਅਨੁਜ ਤੋਂ ਪੜਤਾਲ ਕਰਨ ਮਗਰੋਂ ਮਾਮਲੇ ਵਿੱਚ ਹੋਰ ਮੁਲਜ਼ਮਾਂ ਨੂੰ ਨਾਮਜ਼ਦ ਕੀਤਾ ਗਿਆ। ਮਾਮਲੇ ਦੀ ਜਾਂਚ ਦੌਰਾਨ ਐੱਨ ਸੀ ਬੀ ਨੇ ਹਾਲ ਹੀ ਵਿੱਚ 611 ਕਿਲੋ ਸਾਈਕੋਟ੍ਰੋਪਿਕ ਪਾਊਡਰ, 573 ਕਿਲੋ ਟ੍ਰਾਮਾਡੋਲ ਮਿਸ਼ਰਣ, 12 ਲੱਖ ਨਸ਼ੀਲੀਆਂ ਗੋਲੀਆਂ, 50 ਹਜ਼ਾਰ ਟ੍ਰਾਮਾਡੋਲ ਕੈਪਸੂਲ ਅਤੇ 5 ਹਜ਼ਾਰ ਮਿਡਾਜ਼ੋਲਮ ਸ਼ੀਸ਼ੀਆਂ ਸਣੇ ਤਸਕਰੀ ਦੀ ਵੱਡੀ ਖੇਪ ਜ਼ਬਤ ਕੀਤੀ ਹੈ। ਅਧਿਕਾਰੀਆਂ ਅਨੁਸਾਰ ਨਾਜਾਇਜ਼ ਪਦਾਰਥਾਂ ਦੀ ਕੁੱਲ ਕੀਮਤ ਲਗਪਗ 600 ਕਰੋੜ ਰੁਪਏ ਹੈ। ਮਾਮਲੇ ’ਚ ਹੁਣ ਤੱਕ 15 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ।