ਜਮਸ਼ੇਦਪੁਰ, 18 ਅਗਸਤ
ਝਾਰਖੰਡ ਦੇ ਪੂਰਬੀ ਜ਼ਿਲ੍ਹੇ ਸਿੰਘਭੂਮ ਦੀ ਅਦਾਲਤ ਨੇ ਜਮਸ਼ੇਦਪੁਰ ਦੀ ਗਾਗੀਡੀਹ ਕੇਂਦਰੀ ਜੇਲ੍ਹ ਵਿੱਚ ਦੋ ਗਰੁੱਪਾਂ ਵਿੱਚ ਹੋਈ ਝੜਪ ਦੌਰਾਨ ਮਾਰੇ ਗਏ ਕੈਦੀ ਦੇ ਸਬੰਧ ਵਿੱਚ 15 ਲੋਕਾਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਹੈ। ਜੇਲ੍ਹ ਵਿੱਚ ਇਹ ਝੜਪ ਵਰ੍ਹਾ 2019 ਵਿੱਚ ਹੋਈ ਸੀ। ਐਡੀਸ਼ਨਲ ਜ਼ਿਲ੍ਹਾ ਜੱਜ ਰਾਜਿੰਦਰ ਕੁਮਾਰ ਸਿਨਹਾ ਦੀ ਅਦਾਲਤ ਨੇ ਇਨ੍ਹਾਂ 15 ਵਿਅਕਤੀਆਂ ਨੂੰ ਧਾਰਾ 302 (ਹੱਤਿਆ) ਅਤੇ 120-ਬੀ (ਅਪਰਾਧਿਕ ਸਾਜ਼ਿਸ਼) ਤਹਿਤ ਦੋਸ਼ੀ ਮੰਨਦਿਆਂ ਮੌਤ ਦੀ ਸਜ਼ਾ ਸੁਣਾਈ ਹੈ। ਇਸੇ ਦੌਰਾਨ ਅਦਾਲਤ ਨੇ ਇਸ ਕੇਸ ਵਿੱਚ ਸੱਤ ਜਣਿਆਂ ਨੂੰ ਧਾਰਾ 307 (ਹੱਤਿਆ ਦੀ ਕੋਸ਼ਿਸ਼) ਤਹਿਤ ਦੋਸ਼ੀ ਮੰਨਦਿਆਂ 10 ਸਾਲਾਂ ਦੀ ਕੈਦ ਦੇ ਹੁਕਮ ਸੁਣਾਏ ਹਨ। ਜਿਨ੍ਹਾਂ 10 ਦੋਸ਼ੀਆਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ ਹੈ, ਉਨ੍ਹਾਂ ਵਿੱਚੋਂ ਦੋ ਫ਼ਰਾਰ ਹਨ। ਦੋਹਾਂ ਗਰੁੱਪਾਂ ਵਿਚਾਲੇ ਜੇਲ੍ਹ ਵਿੱਚ 25 ਜੂਨ 2019 ਨੂੰ ਝੜਪ ਹੋਈ ਸੀ ਤੇ ਕੈਦੀ ਮਨੋਜ ਕੁਮਾਰ ਸਿੰਘ ਗੰਭੀਰ ਜ਼ਖ਼ਮੀ ਹੋ ਗਿਆ ਸੀ। ਹਸਪਤਾਲ ਲਿਜਾਣ ਸਮੇਂ ਉਸ ਨੇ ਰਸਤੇ ਵਿੱਚ ਹੀ ਦਮ ਤੋੜ ਦਿੱਤਾ ਸੀ। -ਪੀਟੀਆਈ