ਰਾਜਸਥਾਨ ਕੈਨਾਲ ’ਚ ਨਹਾਉਣ ਗਏ ਦੋ ਨਾਬਾਲਗ ਡੁੱਬੇ

ਇਥੋਂ ਦੇ ਪਿੰਡ ਵਣੀ ਕੋਲੋਂ ਲੰਘਦੀ ਰਾਜਸਥਾਨ ਕੈਨਾਲ ਵਿੱਚ ਨਹਾਉਣ ਗਏ ਦੋ ਨਾਬਾਲਗ ਡੁੱਬ ਗਏ। ਦੋਵਾਂ ਦਾ ਹਾਲੇ ਤੱਕ ਕੁਝ ਪਤਾ ਨਹੀਂ ਲਗਿਆ। ਪਿੰਡ ਵਣੀ ਤੋਂ ਕਰੀਬ 7-8 ਨੌਜਵਾਨ ਪਿੰਡ ਕੋਲੋਂ ਲੰਘਦੀ ਰਾਜਸਥਾਨ ਕੈਨਾਲ ਵਿੱਚ ਨਹਾਉਣ ਗਏ ਸਨ। ਪਾਣੀ ਦੇ ਤੇਜ਼ ਵਹਾਅ ਕਾਰਨ ਮੋਹਿਤ (17) ਅਤੇ ਮਨੀਸ਼ (14) ਪਾਣੀ ਵਿੱਚ ਰੁੜ੍ਹ ਗਏ। ਸੂਰੇਵਾਲਾ ਪੁਲੀਸ ਚੌਕੀ ਅਤੇ ਤੇ ਕਰੀਵਾਲਾ ਪੁਲੀਸ ਚੌਕੀ ਦੀਆਂ ਟੀਮਾਂ ਅਤੇ ਪਿੰਡ ਵਾਸੀ ਮੌਕੇ ’ਤੇ ਪੁੱਜੇ। ਦੋਵਾਂ ਦਾ ਮੋਟਰਸਾਈਕਲ ਅਤੇ ਕੱਪੜੇ ਨਹਿਰ ਦੇ ਕੰਢੇ ਤੋਂ ਮਿਲੇ ਹਨ।

ਗੋਤਾਖੋਰਾਂ ਦੀ ਟੀਮ ਲਗਾਤਾਰ ਨਾਬਲਾਗਾਂ ਦੀ ਭਾਲ ਕਰ ਰਹੀ ਹੈ। ਰਾਜਸਥਾਨ ਪੁਲੀਸ ਵੀ ਗੋਤਾਖੋਰਾਂ ਦੀ ਮਦਦ ਕਰ ਰਹੀ ਹੈ। ਦੋਵੇਂ ਆਪਣੇ ਮਾਪਿਆਂ ਦੇ ਇਕਲੌਤੇ ਹਨ। ਮੋਹਿਤ ਦਸਵੀਂ ਦਾ ਵਿਦਿਆਰਥੀ ਹੈ ਅਤੇ ਉਸ ਦਾ ਪਿਤਾ ਮਜ਼ਦੂਰ ਹੈ।

ਮਨੀਸ਼ ਕੁਮਾਰ 7ਵੀਂ ਦਾ ਵਿਦਿਆਰਥੀ ਹੈ ਅਤੇ ਉਸ ਦੇ ਪਿਤਾ ਦਾ ਕੁਝ ਸਮਾਂ ਪਹਿਲਾਂ ਦੇਹਾਂਤ ਹੋ ਗਿਆ ਸੀ। ਮਨੀਸ਼ ਆਪਣੀ ਮਾਂ, ਭੈਣ ਅਤੇ ਦਾਦੀ ਨਾਲ ਵਣੀ ਪਿੰਡ ਵਿੱਚ ਰਹਿੰਦਾ ਸੀ। ਉਸ ਦੀ ਮਾਂ ਮਜ਼ਦੂਰੀ ਕਰਦੀ ਹੈ।