ਪੱਚੀ ਵਰ੍ਹਿਆਂ ਤੋਂ ਟਰੈਫਿਕ ਲਾਈਟਾਂ ਬੰਦ
ਸ਼ਹਿਰ ’ਚ ਲੱਗਦੇ ਜਾਮ ਤੋਂ ਬਾਘਾ ਪੁਰਾਣਾ ਵਾਸੀ ਪ੍ਰੇਸ਼ਾਨ
ਬਾਘਾ ਪੁਰਾਣਾ ਸ਼ਹਿਰ ਵਿੱਚ ਟਰੈਫਿਕ ਦੀ ਸਮੱਸਿਆ ਹੁਣ ਗੰਭੀਰ ਰੂਪ ਧਾਰ ਚੁੱਕੀ ਹੈ। ਸ਼ਹਿਰ ਦੇ ਕੇਂਦਰੀ ਮੁੱਖ ਚੌਕ ਵਿੱਚ ਲੱਗੀਆਂ ਟਰੈਫਿਕ ਲਾਈਟਾਂ ਇਸ ਨਾਕਾਮ ਪ੍ਰਬੰਧ ਦੀ ਜਿਉਂਦੀ ਜਾਗਦੀ ਉਦਾਹਰਨ ਹਨ। ਲਗਭਗ 25 ਸਾਲ ਪਹਿਲਾਂ ਲਾਈਆਂ ਗਈਆਂ ਬੱਤੀਆਂ ਅੱਜ ਤੱਕ ਢੰਗ ਨਾਲ ਚੱਲ ਨਹੀਂ ਸਕੀਆਂ। ਟਰੈਫਿਕ ਪ੍ਰਬੰਧਾਂ ਦੀ ਕਮੀ ਸਿਰਫ਼ ਬੱਤੀਆਂ ਤੱਕ ਹੀ ਸੀਮਤ ਨਹੀਂ। ਸ਼ਹਿਰ ਦੇ ਬੱਸ ਅੱਡੇ ਦੇ ਬਾਹਰ ਖੜੀਆਂ ਰਹਿੰਦੀਆਂ ਬੱਸਾਂ ਵੀ ਜਾਮ ਦਾ ਵੱਡਾ ਕਾਰਨ ਬਣ ਰਹੀਆਂ ਹਨ।
ਕਈ ਵਾਰ ਬੱਸਾਂ 10 ਤੋਂ 15 ਮਿੰਟ ਤੱਕ ਸੜਕ ਦੇ ਵਿਚਕਾਰ ਖੜੀਆਂ ਰਹਿੰਦੀਆਂ ਹਨ, ਜਿਸ ਨਾਲ ਦੋਵਾਂ ਪਾਸਿਆਂ ਦੀ ਆਵਾਜਾਈ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੁੰਦੀ ਹੈ। ਇਸ ਦੌਰਾਨ ਟਰੈਫਿਕ ਪੁਲੀਸ ਵੱਲੋਂ ਕੋਈ ਤੁਰੰਤ ਕਾਰਵਾਈ ਨਹੀਂ ਕੀਤੀ ਜਾਂਦੀ।
ਟਰੈਫਿਕ ਸਿਪਾਹੀਆਂ ਦੀ ਘੱਟ ਨਫਰੀ ਵੀ ਗੰਭੀਰ ਸਮੱਸਿਆ ਹੈ। ਮੌਜੂਦਾ ਸਮੇਂ ਵਿੱਚ ਸਿਪਾਹੀ ਸਿਰਫ ਮੁੱਖ ਚੌਕ ਤੱਕ ਹੀ ਸੀਮਤ ਰਹਿੰਦੇ ਹਨ, ਜਦਕਿ ਹੋਰ ਭੀੜ ਵਾਲੇ ਇਲਾਕੇ ਚੰਨੂ ਵਾਲਾ ਚੌਕ, ਧਰਮਸ਼ਾਲਾ ਚੌਕ ਅਤੇ ਬੱਸ ਅੱਡਾ ਸਿਪਾਹੀਆਂ ਤੋਂ ਸੱਖਣੇ ਹੀ ਰਹਿੰਦੇ ਹਨ। ਇੱਥੇ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਆਮ ਗੱਲ ਹੈ। ਐਮਰਜੈਂਸੀ ਸੇਵਾਵਾਂ ਜਿਵੇਂ ਐਂਬੂਲੈਂਸ ਜਾਂ ਫਾਇਰ ਬ੍ਰਿਗੇਡ ਨੂੰ ਵੀ ਜਾਮ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਸਥਾਨਕ ਲੋਕਾਂ ਮੁਤਾਬਕ ਜੇ ਟਰੈਫਿਕ ਪ੍ਰਬੰਧ ਠੀਕ ਹੋ ਜਾਵੇ ਤਾਂ ਸ਼ਹਿਰ ਦਾ ਅਰਥਚਾਰਾ ਵੀ ਸੁਧਰ ਸਕਦਾ ਹੈ। ਲੋਕਾਂ ਨੇ ਇਸ ਸਮੱਸਿਆ ਦਾ ਤੁਰੰਤ ਪੱਕਾ ਹੱਲ ਕੱਢਣ ਦੀ ਮੰਗ ਕੀਤੀ।
ਟਰੈਫਿਕ ਟੀਮ ਦੇ ਇੰਚਾਰਜ ਨੇ ਕਿਹਾ ਕਿ ਉਹ ਟਰੈਫਿਕ ਚਾਲੂੁ ਰੱਖਣ ਲਈ ਪੂਰੀ ਵਾਹ ਲਾਉਂਦੇ ਹਨ ਪਰ ਲੋਕਾਂ ਨੂੰ ਵੀ ਆਪਣੇ ਫਰਜ਼ ਪਹਿਚਾਣੇ ਚਾਹੀਦੇ ਹਨ।
