ਪਵਨ ਗੋਇਲ
ਭੁੱਚੋ ਮੰਡੀ, 26 ਅਕਤੂਬਰ
ਦਿੱਲੀ ਕਿਸਾਨ ਅੰਦੋਲਨ ਦੇ ਸ਼ਹੀਦ ਕਿਸਾਨ ਜੈ ਸਿੰਘ ਤੁੰਗਵਾਲੀ ਦੇ ਪਰਿਵਾਰ ’ਤੇ ਕੁਦਰਤੀ ਨੇ ਕਹਿਰ ਢਾਹਿਆ ਹੈ। ਦਸ ਮਹੀਨੇ ਪਹਿਲਾਂ 17 ਦਸੰਬਰ 2020 ਨੂੰ ਜੈ ਸਿੰਘ ਦਿੱਲੀ ਬਾਰਡਰ ’ਤੇ ਸ਼ਹੀਦ ਹੋ ਗਿਆ ਸੀ ਅਤੇ ਹੁਣ ਦੋ ਦਿਨ ਪਹਿਲਾਂ ਰਾਤ ਸਮੇਂ ਪਏ ਮੀਂਹ ਨੇ ਸਾਢੇ ਪੰਜ ਏਕੜ ਵਿੱਚ ਖੜ੍ਹੀ ਬਾਸਮਤੀ ਦੀ ਫ਼ਸਲ ਬਰਬਾਦ ਕਰ ਦਿੱਤੀ। ਇਸ ਨਾਲ ਵਿਧਵਾ ਕੁਲਵਿੰਦਰ ਕੌਰ ਨੂੰ ਦੋ ਨਾਬਾਲਗ ਧੀਆਂ ਅਤੇ ਛੋਟੇ ਪੁੱਤਰ ਦੀ ਪੜ੍ਹਾਈ ਸਣੇ ਖ਼ਰਚਿਆਂ ਦਾ ਬੋਝ ਚੁੱਕਣ ਦੀ ਚਿੰਤਾ ਸਤਾ ਰਹੀ ਹੈ। ਸ਼ਹੀਦ ਦੇ ਪਿਤਾ ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਾਢੇ ਅੱਠ ਏਕੜ ਵਿੱਚ ਬਾਸਮਤੀ ਲਾਈ ਸੀ। ਇਸ ਵਿੱਚੋਂ ਤਿੰਨ ਏਕੜ ਦੀ ਫ਼ਸਲ 22 ਅਕਤੂਬਰ ਨੂੰ ਵੇਚ ਦਿੱਤੀ ਸੀ। ਅਗਲੇ ਹੀ ਦਿਨ ਪਏ ਮੀਂਹ ਨੇ ਬਾਕੀ ਦੀ ਪੰਜ ਏਕੜ ਫਸਲ ਧਰਤੀ ’ਤੇ ਵਿਛਾ ਦਿੱਤੀ।ਭਾਕਿਯੂ ਏਕਤਾ ਉਗਰਾਹਾਂ ਦੇ ਜ਼ਿਲ੍ਹਾ ਪ੍ਰਧਾਨ ਸ਼ਿੰਗਾਰਾ ਸਿੰਘ ਮਾਨ, ਬਲਾਕ ਆਗੂ ਹੁਸ਼ਿਆਰ ਸਿੰਘ ਅਤੇ ਬਲਜੀਤ ਸਿੰਘ ਪੂਹਲਾ ਨੇ ਸਰਕਾਰ ਤੋਂ ਪੀੜਤ ਪਰਿਵਾਰ ਨੂੰ 60 ਹਜ਼ਾਰ ਰੁਪਏ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਮੁਆਵਜ਼ੇ ਦੀ ਮੰਗ ਕੀਤੀ।