ਹਾੜ੍ਹ ਦੀ ਗਰਮੀ ਨੇ ਵੱਟ ਕੱਢੇ
ਮਾਲਵਾ ਪੱਟੀ ’ਚ ਤਾਪਮਾਨ 37 ਤੋਂ 38 ਡਿਗਰੀ; ਹੁੰਮਸ ਕਾਰਨ ਲੋਕ ਪ੍ਰੇਸ਼ਾਨ
ਮਾਲਵਾ ਪੱਟੀ ਦੇ ਵੱਡੇ ਹਿੱਸੇ ਵਿੱਚ ਮੌਨਸੂਨ ਦੀ ਉਡੀਕ ਲੰਮੀ ਹੋਣ ਨਾਲ ਹੁੰਮਸ ਭਰੀ ਗਰਮੀ ਨੇ ਲੋਕਾਂ ਦਾ ਜਿਉਣਾ ਮੁਹਾਲ ਕਰ ਦਿੱਤਾ ਹੈ। ਭਾਵੇਂ ਪਿਛਲੇ ਕੁਝ ਦਿਨਾਂ ਦੌਰਾਨ ਦਿਨ ਦਾ ਤਾਪਮਾਨ 40 ਡਿਗਰੀ ਤੋਂ ਘਟ ਕੇ 37 ਤੋਂ 38 ਡਿਗਰੀ ਸੈਲਸੀਅਸ ਦੇ ਵਿਚਕਾਰ ਆ ਗਿਆ ਹੈ ਪਰ ਹਵਾ ਵਿੱਚ ਵਧੀ ਨਮੀ ਕਾਰਨ ਹੁੰਮਸ ਨੇ ਗਰਮੀ ਹੋਰ ਵੀ ਵਧਾ ਦਿੱਤੀ ਹੈ। ਸਭ ਤੋਂ ਵੱਧ ਅਸਰ ਝੋਨੇ ਦੀ ਲੁਆਈ ਵਿੱਚ ਰੁੱਝੇ ਮਜ਼ਦੂਰਾਂ ’ਤੇ ਪੈ ਰਿਹਾ ਹੈ, ਜੋ ਪਾਣੀ ਨਾਲ ਭਰੇ ਖੇਤਾਂ ਵਿੱਚ ਘੰਟਿਆਂਬੱਧੀ ਕੰਮ ਕਰਨ ਲਈ ਮਜਬੂਰ ਹਨ।
ਜ਼ਿਕਰਯੋਗ ਹੈ ਕਿ ਮੌਨਸੂਨ ਦਾ ਪਹਿਲਾ ਮੀਂਹ ਅਜੇ ਤੱਕ ਮਾਲਵਾ ਪੱਟੀ ਦੇ ਕਈ ਇਲਾਕਿਆਂ ਤੱਕ ਨਹੀਂ ਪਹੁੰਚਿਆ। ਗਰਮੀ ਕਾਰਨ ਲੋਕ ਪ੍ਰੇਸ਼ਾਨ ਹਨ ਪਰ ਖੇਤਾਂ ਵਿੱਚ ਪਾਣੀ ਦੇ ਵਿਚਕਾਰ ਕੰਮ ਕਰਨ ਵਾਲੇ ਮਜ਼ਦੂਰਾਂ ਲਈ ਹਾਲਾਤ ਹੋਰ ਵੀ ਔਖੇ ਬਣੇ ਹੋਏ ਹਨ।
ਪਰਵਾਸੀ ਮਜ਼ਦੂਰ ਅਸ਼ੋਕ, ਵਕੀਲ, ਰਿਸ਼ੀਪਾਲ, ਵਿਨੋਦ ਅਤੇ ਰਾਮਪਾਲ ਯਾਦਵ ਨੇ ਦੱਸਿਆ ਕਿ ਉਨ੍ਹਾਂ ਦੀ 17 ਮੈਂਬਰੀ ਟੋਲੀ ਆਮ ਦਿਨਾਂ ਵਿੱਚ ਇੱਕ ਦਿਨ ਵਿੱਚ 4ਤੋਂ 5 ਏਕੜ ਤੱਕ ਝੋਨੇ ਦੀ ਲੁਆਈ ਕਰ ਲੈਂਦੀ ਸੀ ਪਰ ਪਿਛਲੇ ਕੁਝ ਦਿਨਾਂ ਤੋਂ ਵਧੀ ਹੁੰਮਸ ਕਾਰਨ ਕੰਮ ਦੀ ਰਫ਼ਤਾਰ ਕਾਫ਼ੀ ਘਟ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਖੇਤਾਂ ਵਿੱਚ ਦਰੱਖ਼ਤਾਂ ਦੀ ਘਾਟ ਹੈ, ਹਵਾ ਨਾ ਚੱਲਣ ਅਤੇ ਪਾਣੀ ’ਚ ਲਗਾਤਾਰ ਖੜ੍ਹੇ ਰਹਿਣ ਨਾਲ ਥਕਾਵਟ ਜਲਦੀ ਮਹਿਸੂਸ ਹੁੰਦੀ ਹੈ, ਜਿਸ ਕਾਰਨ ਕੰਮ ਪ੍ਰਭਾਵਿਤ ਹੋ ਰਿਹਾ ਹੈ।
ਮੌਸਮ ਮਾਹਿਰਾਂ ਮੁਤਾਬਕ ਮੌਨਸੂਨ ਦੀ ਆਮਦ ਤੋਂ ਪਹਿਲਾਂ ਹਵਾ ਵਿੱਚ ਨਮੀ ਵਧਣ ਕਾਰਨ ਹੁੰਮਸ ਹੋਣਾ ਆਮ ਗੱਲ ਹੈ। ਉਨ੍ਹਾਂ ਵੱਧ ਤੋਂ ਵੱਧ ਪਾਣੀ ਪੀਣ, ਸਿਰ ਢੱਕ ਕੇ ਕੰਮ ਕਰਨ, ਦੁਪਹਿਰ ਵੇਲੇ ਸੰਭਵ ਹੋਵੇ ਤਾਂ ਕੁਝ ਸਮਾਂ ਆਰਾਮ ਕਰਨ ਅਤੇ ਲਗਾਤਾਰ ਕੰਮ ਕਰਨ ਤੋਂ ਬਚਣ ਦੀ ਸਲਾਹ ਦਿੱਤੀ ਹੈ।
