ਪੱਤਰ ਪ੍ਰੇਰਕ
ਭੁੱਚੋ ਮੰਡੀ, 4 ਅਗਸਤ
ਪਿੰਡ ਬੁਰਜ ਕਾਹਨ ਸਿੰਘ ਵਾਲਾ ਵਿੱਚ ਬੀਤੀ ਰਾਤ ਮੀਂਹ ਕਾਰਨ ਇੱਕ ਗਰੀਬ ਵਿਧਵਾ ਕਰਮਜੀਤ ਕੌਰ ਦੇ ਕਮਰੇ ਦੀ ਛੱਤ ਡਿੱਗ ਪਈ। ਸਰਪੰਚ ਖੁਸ਼ਦੀਪ ਕੌਰ ਦੇ ਉੱਦਮ ਸਦਕਾ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ, ਪਰ ਘਰ ਦਾ ਸਾਮਾਨ ਨੁਕਸਾਨਿਆ ਗਿਆ। ਸਰਪੰਚ ਖੁਸ਼ਦੀਪ ਕੌਰ ਅਤੇ ਕਾਂਗਰਸੀ ਆਗੂ ਹਰਵਿੰਦਰ ਸਿੰਘ ਝੰਡਾ ਨੇ ਦੱਸਿਆ ਕਿ ਕਰਮਜੀਤ ਕੌਰ ਕੋਲ ਇੱਕ ਹੀ ਕਮਰਾ ਸੀ, ਜਿਸ ਵਿੱਚ ਉਹ ਆਪਣੇ ਦੋ ਬੱਚਿਆਂ ਨਾਲ ਦਿਨ ਕੱਟ ਰਹੀ ਸੀ। ਕੱਲ੍ਹ ਅਚਾਨਕ ਕਮਰਾ ਇੱਕ ਪਾਸੇ ਤੋਂ ਹੇਠਾ ਵੱਲ ਦਬ ਗਿਆ ਅਤੇ ਰਾਤ ਨੂੰ ਕਮਰੇ ਦੀ ਛੱਤ ਡਿੱਗ ਪਈ। ਕਮਰੇ ਦੀ ਖਤਰਨਾਕ ਹਾਲਤ ਨੂੰ ਦੇਖਦਿਆਂ ਪਹਿਲਾਂ ਹੀ ਪੀੜਤ ਪਰਿਵਾਰ ਨੇ ਘਰ ਦੇ ਕੁਝ ਸਾਮਾਨ ਨੂੰ ਗੁਆਂਢੀਆਂ ਦੇ ਘਰ ਤਬਦੀਲ ਕਰ ਦਿੱਤਾ ਸੀ ਜਿਸ ਕਾਰਨ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ ਪਰ ਕੁੱਝ ਸਾਮਾਨ ਜਿਸ ਨੂੰ ਅਗਲੇ ਦਿਨ ਚੁੱਕਣਾ ਸੀ, ਉਹ ਮਲਬੇ ਵਿੱਚ ਦੱਬਿਆ ਗਿਆ। ਉਨ੍ਹਾਂ ਦਾਨੀ ਸੱਜਣਾਂ ਨੂੰ ਮਦਦ ਦੀ ਅਪੀਲ ਕੀਤੀ ਹੈ।