ਬਠਿੰਡਾ ਨਿਗਮ ਦੀ ਜ਼ਮੀਨ ਪਟੇ ’ਤੇ ਦੇਣ ਦਾ ਮਾਮਲਾ ਭਖ਼ਿਆ

ਮਨੋਜ ਸ਼ਰਮਾ

ਬਠਿੰਡਾ, 1 ਜੁਲਾਈ

ਬਠਿੰਡਾ ਨਗਰ ਨਿਗਮ ਦੀ ਲੀਜ਼ 'ਤੇ ਦਿੱਤੀ ਗਈ ਜ਼ਮੀਨ ’ਚ ਇਕ ਸਭਾ ਵੱਲੋਂ ਚਲਾਏ ਜਾ ਸਕੂਲ ਦਾ ਮਾਮਲਾ ਮੁੜ ਭਖ਼ ਗਿਆ ਹੈ। ਦੋ ਦਿਨ ਪਹਿਲਾਂ ਇਥੋਂ ਬਦਲੇ ਗਏ ਕਮਿਸ਼ਨਰ ਅਜੈ ਅਰੋੜਾ ਨੇ ਅਹੁਦਾ ਛੱਡਣ ਤੋਂ ਪਹਿਲਾਂ ਨਿਗਮ ਦੇ ਇੱਕ ਸੀਨੀਅਰ ਅਧਿਕਾਰੀ ’ਤੇ ਗੰਭੀਰ ਦੋਸ਼ ਲਾਉਂਦਿਆਂ ਉਸ ਨੂੰ ‘ਕਾਰਨ ਦੱਸੋ’ ਨੋਟਿਸ ਜਾਰੀ ਕੀਤਾ ਸੀ। ਜਾਣਕਾਰੀ ਅਨੁਸਾਰ ਇਹ ਮਾਮਲਾ ਸਮੇਂ-ਸਮੇਂ ’ਤੇ ਉਭਾਰਿਆ ਜਾਂਦਾ ਰਿਹਾ ਹੈ।

ਸੂਤਰਾਂ ਮੁਤਾਬਕ ਇਹ ਮਾਮਲਾ ਗੋਲ ਡਿੱਗੀ ਨੇੜਲੀ ਨਿਗਮ ਦੀ ਜਾਇਦਾਦ ਨੂੰ ਲੀਜ਼ ’ਤੇ ਦੇਣ ਨਾਲ ਜੁੜਿਆ ਹੋਇਆ ਹੈ। ਇਹ ਜ਼ਮੀਨ ਇੱਕ ਸਕੂਲ ਨੂੰ ਲੰਬੇ ਸਮੇਂ ਲਈ ਦਿੱਤੀ ਗਈ ਸੀ। ਲੀਜ਼ ਦੀ ਰਾਸ਼ੀ 1949 ਤੋਂ 2017 ਤੱਕ ਭਰੀ ਜਾਂਦੀ ਰਹੀ। ਮੰਨਿਆ ਜਾ ਰਿਹਾ ਹੈ ਕਿ 2017 ਤੋਂ ਬਾਅਦ ਅਸਲ ਫ਼ਾਈਲ ਗਾਇਬ ਕਰ ਦਿੱਤੀ ਗਈ ਤੇ ਨਵੀਂ ਫ਼ਾਈਲ ਤਿਆਰ ਕੀਤੀ ਗਈ, ਜਿਸ ਵਿੱਚ ਜਾਇਦਾਦ ਦੀ ਘੱਟ ਹਿੱਸਾ ਲੀਜ਼ ’ਤੇ ਦਿਖਾਇਆ ਗਿਆ।

ਕਮਿਸ਼ਨਰ ਵੱਲੋਂ 27 ਜੂਨ ਨੂੰ ਨਿਗਮ ਦੇ ਅਧਿਕਾਰੀ ਨੂੰ ਜਾਰੀ ਕੀਤੇ ਨੋਟਿਸ ਵਿੱਚ ਦੋਸ਼ ਲਾਇਆ ਗਿਆ ਕਿ ਉਨ੍ਹਾਂ ਨੇ ਕਥਿਤ ਅਸਲ ਦਸਤਾਵੇਜ਼ ਲੁਕਾਏ ਤੇ ਅਦਾਲਤ ਵਿੱਚ ਸਹੀ ਪੱਖ ਨਹੀਂ ਪੇਸ਼ ਕੀਤਾ ਗਿਆ। ਉਨ੍ਹਾਂ ਨੂੰ ਤਿੰਨ ਦਿਨਾਂ ’ਚ ਲਿਖ਼ਤੀ ਜਵਾਬ ਦੇਣ ਲਈ ਕਿਹਾ ਗਿਆ ਹੈ ਤੇ ਅਸਲ ਫ਼ਾਈਲ ਤੁਰੰਤ ਪੇਸ਼ ਕਰਨ ਦੀ ਹਦਾਇਤ ਕੀਤੀ ਗਈ ਸੀ। ਅਜਿਹਾ ਨਾ ਕਰਨ ਦੀ ਸੂਰਤ ਵਿੱਚ ਕਾਨੂੰਨੀ ਕਾਰਵਾਈ ਦੀ ਚਿਤਾਵਨੀ ਗਈ ਹੈ। ਇਸ ਮਾਮਲੇ ਨੂੰ ਲੈ ਕੇ ਕਈ ਕੌਂਸਲਰਾਂ ਅਤੇ ਸਮਾਜ ਸੇਵਕਾਂ ਵੱਲੋਂ ਵਿਜੀਲੈਂਸ ਵਿਭਾਗ ਕੋਲ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਜਾ ਰਹੀ ਹੈ। ਮਾਮਲਾ ਉਭਰਨ ਤੋਂ ਬਾਅਦ ਨਿਗਮ ਦੇ ਕਈ ਅਧਿਕਾਰੀਆਂ ਵਿੱਚ ਘਬਰਾਹਟ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ।